YOHANES 18
18
Mawu Yesus nisamẹ
(Mat. 26:47-56; Mrk. 14:43-50; Luk. 22:47-53)
1Sarạeng Mawu Yesus bọu nẹ̌kal᷊iomaneng kerene, i Sie ringangu manga muritʼE nakoạ sol᷊ong sěmbẹ̌kang Sal᷊ụ u Kidron. Sene piạ bawaelang sěmbaụ, ku Mawu Yesus dingangu manga muritʼE simuẹ̌ su wawaelang ene. 2I Yudas tau e měbẹ̌bal᷊ụ e masingkạ u tampạ ene; batụu Mawu Yesus e masau mẹ̌komol᷊ẹ̌ dingangu manga muritʼE sene. 3Tangu i Yudas tamaị e sol᷊ong tampạ ene kụ nẹ̌bawa wuntuang u sordadong Romawi ringangu manga měndariagạ Bal᷊em Mawu pirang katau apan nirolohu manga imang těmbonange ringangu i sire tau Farisi. I sire němpẹ̌bawa aghidẹ̌, lěntera, ringangu oborẹ̌. 4Mawu Yesus masingkạ u patikụ apan sarung mariadi su watangengʼE. Tangu i Sie rimani si sire kụ nakiwal᷊o, ”I kamene kai mědẹ̌deạ si sai?”
5”Yesus, tau Nazaret,” ungkuěng i sire.
”Seng Iạ e i Sie,” ungkuěng u Mawu Yesus.
I Yudas tahapẹ̌sunial᷊ẹ̌ e rụdarisị sene ringang i sire. 6Piạ e Mawu Yesus něhengetang si sire u, ”Seng Iạ e i Sie,” ute kěbị e němpẹ̌sohọ kụ apidu něngkawatang su ěntana. 7Saụ kạpia Mawu Yesus nakiwal᷊o si sire, ”I kamene kai mědẹ̌deạ si sai?”
”Mědẹ̌deạ si Yesus tau Nazaret,” angkuěng i sire.
8”Seng Takụ niwera u, seng Iạ e i Sie,” ungkuěngu Mawu Yesus. ”Kụ kereu mambeng Iạ e rẹ̌deakeng i kamene, ute walạekere i sire wal᷊ine ini e aparal᷊eng.” (9Dingangu něhengetang kerene, nariadị e apa kụ seng nipẹ̌hengetang u Mawu Yesus nạung: ”Amang, bọu i sire apan nisarakang i Amang si Siạ e, tawẹu sarang sěngkatau nailang.”)
10I Simon Petrus měngkatewe nanawụ pẹda niwawane kụ namilị darolohangu imang gagherẹ hakịu nahěnsị tul᷊ine koaneng. Arengu ěllang ene ute kai i Malkus. 11#Mat. 26:39; Mrk. 14:36; Luk. 22:42 Tangu Mawu Yesus něhengetang si Petrus, ”Suhị e saụ pedanu e su homane! Unụe i kau mạngěnnau Iạ e tawe sarung měnginung bọu lainumangu kasasigěsạ e kụ seng nionggọ i Amang si Siạ e?”
Mawu Yesus niwawa nipẹ̌těngon Hanas
12Mase manga sordadong Roma ringangu manga těmbonange ringangu manga měndariagạ Yahudi e nanamẹ e ringangu něhapusẹ̌ Mawu Yesus. 13Humotong i sire nangěntudʼu Mawu Yesus niapẹ̌těngon Hanas, i amang i Kayafas kinaratingang. I Kayafas e kai imang mawantugẹ̌ su taung ene. 14#Yoh. 11:49-50 Kụ kai i sie nạung seng naněgu manga měngangawasang Yahudi e ěndokangbe sěngkatau mate ipěngal᷊uang sěngkawanuaěnge.
I Petrus nẹ̌sunial᷊u Mawu Yesus
(Mat. 26:69-70; Mrk. 14:66-68; Luk. 22:55-57)
15I Simon Petrus dingangu muritẹ̌ lai sěngkatau timol᷊e Mawu Yesus. Manga muritẹ̌ bal᷊ine ini e kai sěngkanarangu imang mawantugẹ̌, hakịewen i sie simuẹ̌ sěngkakasuẹ̌ dingangu Mawu Yesus sol᷊ong děllahu wal᷊eng imang mawantugẹ̌ e, 16arawe i Petrus e mạngampal᷊ẹ̌ sul᷊ikude, sutukadẹ̌. Susamurine manga muritẹ̌ bal᷊ine e simẹ̌bang ku nẹ̌bisara ringangu mẹ̌tatangkiang bawine měndariagạ tukadẹ̌, mase nẹ̌bawa si Petrus simuẹ̌ sol᷊ong dal᷊unge. 17Tau wawine mẹ̌tatangkiang mělahapa tukadẹ̌ ene e nẹ̌bera si Petrus, ”Ei, bal᷊inewe i kau lai sěmbaụ bọu timol᷊e tau rasị e?”
”Bal᷊ine,” ungkuěng i Petrus.
18Su tempo ene mawal᷊ěnguhẹ̌, kụ manga mẹ̌tatangkiang dingangu manga měndariagạ e seng němpěhunụ u putung su woheng kụ němpěndarangke sene. I Petrus himaungke tamai kụ dimarisị něndarang dingangi sire.
Imang mawantugẹ̌ mạnaněsui Mawu Yesus
(Mat. 26:59-66; Mrk. 14:55-64; Luk. 22:66-71)
19Imang mawantugẹ̌ e mạnaněsui su Mawu Yesus e mạanun manga muritʼE ringangu kakakoạ u těntironʼE. 20Mawu Yesus simimbang, ”Iạ e měngkate hanesẹ̌ měbẹ̌bisara matul᷊idẹ̌ su těngon l᷊awọ. Iạ e hanesẹ̌ mạněntiro su manga wal᷊eng pẹ̌kakal᷊iomanengang dingangu su ral᷊ungu Wal᷊em Mawu, tampạeng pẹ̌kakomol᷊angu tau Yahudi e. Iạ e tawẹ sarang sěnsul᷊e piạ apa niwisara pěkẹ̌kal᷊irung. 21Kụ kawe unụe i Tuang mananẹ̌sui si Siạ? Pakiwal᷊ọe si sire apan seng nakaringihẹ̌ si Siạ mạněntiro. Nal᷊ahẹ u i sire masingkạ u apan Takụ niwera.”
22Piạ i Yesus kạpělehengetange kerene, sěngkatau wọu měndariagạ sene nameru si Sie ringangu nẹ̌bera, ”Kai kawahani i Kau mẹ̌bisara kerene su těngon imang mawantugẹ̌!”
23Mawu Yesus simimbang, ”Kereu Iạ maul᷊ị u apang kụ nẹ̌sal᷊a, ute paul᷊ikọ kaia sal᷊ane! Kai kereu wawera-Ku e kawe nihino, kawe unụe i kau nameru si Siạ?”
24Su samurine i Hanas nangorọ e taumata niapangěntudẹ̌ Mawu Yesus mạl᷊ahante sol᷊ong anun Imang Mawantugẹ̌ i Kayafas.
I Petrus něsaụ kapia nẹ̌sunial᷊u Mawu Yesus
(Mat. 26:71-75; Mrk. 14:69-72; Luk. 22:58-62)
25I Simon Petrus bědangbe lain dụdarisị mẹ̌děndarang sene. I sire němpẹ̌berạ e si sie, ”Bal᷊inewe i kau l᷊ai tụtol᷊e tau ene?” Arawe i Petrus e mang nẹ̌sunial᷊ẹ̌ u, ”Wal᷊ine!”
26Sěngkatau rarolohangu imang mawantugẹ̌, anạ u sěmbaụ i anu tul᷊ine nisahing i Petrus e nẹ̌bera, ”Bal᷊inẹbe iạ nakasilo si kau su wawaelang ene mědẹ̌dingang i Sie?”
27Mase i Petrus nẹ̌sunial᷊ʼi Sie kạpia, ”Tala,” – kụ nẹ̌kětạ u orasẹ̌ ene manụ kimukụ e.
Mawu Yesus nẹ̌těngon Pilatus
(Mat. 27:1-2, 11-14; Mrk. 15:1-5; Luk. 23:1-5)
28Ěllo e seng mẹ̌běmbanaho i sire nangěntudʼu Mawu Yesus bọu wal᷊eng Kayafas sol᷊ong istanang guběrnurẹ̌. I sire tau Yahudi e tawe nahunsuẹ̌ sol᷊ong dal᷊ungu istana, mạdiring makasal᷊amạ si sire tuhụ dal᷊engu agama, batụu i sire mapulu l᷊ai měmpangidopu simokol᷊u Paskah. 29Ual᷊ingu ene i Pilatus simẹ̌bang nakoạ sol᷊ong anun sire kụ nakiwal᷊o, ”Kai apa pẹ̌sasal᷊an tau ěndaị e iwẹ̌bawang kamene?”
30I sire němpẹ̌simbang u, ”Mangawe i Sie tawẹ sal᷊ane, ute i kami e tawe manondan Sie su anun Tuang Guběrnurẹ̌.”
31I Pilatus nẹ̌bera si sire, ”Al᷊ạe i Sie kụ hukungke tuhụewe toratʼi kamene hala!”
Kai tau Yahudi e simimbang u, ”I kami e tawe wotonge měnawong hukumangu papate su taumata.” (32#Yoh. 3:14, 12:32 Ini nariadị e tadeạu naghanapẹ̌ kere seng nipěhengetang u Mawu Yesus mạanung kakakoạ u i Sie sarung mapohong.)
33I Pilatus simuẹ̌ kạpia su istana kụ nẹ̌kui Mawu Yesus, kụ nakiwal᷊o u, ”I Kau e ratung tau Yahudi e?”
34Mawu Yesus simimbang, ”Apa kakiwal᷊o ini e wọu watangeng hala arau kai piạ u wal᷊ine kụ seng něhabaru Iạ e si Tuang?”
35I Pilatus simimbang, ”Iạ kawe tau Yahudi tangu? Taumata kụ něnarakang i Kau si siạ e kai kawanuanʼU hala ringangu manga imang těmbonange. Kụ apạe seng nikakoạ u e?”
36Ungkuěngu Mawu Yesus, ”Kararatuang-Ku e wal᷊inewe wọu dunia ini. Kai manga kararatuang-Ku e wọu dunia ini, ute angkeěng apan taumata-Ku e sarung mẹ̌tahutěndạ u Iạ e, tadeạu tawe isarakang su manga měngangawasan Yahudi. Kaiso mambeng kahěngang u kararatuang-Ku e asal᷊e wal᷊inewe wọu dunia ini!”
37Tangu i Pilatus nakiwal᷊o si Sie, ”Mạeng kerene Datu i Kau tangu?”
Mawu Yesus simimbang, ”I kau nẹ̌bera u Iạ kai ratu. Iạ e nawantelẹ̌ dingangu riměnta su dunia e kětạeng baugu timona sěmbaụ, tadeạu kai mẹ̌sahiding katěngadẹ̌. I saing kụ asal᷊e wọu katěngadẹ̌ e, mambeng dụdaringihẹ̌ si Siạ.”
38I Pilatus nakiwal᷊o si Sie, ”Kai a mangal᷊ene katěngadẹ̌ e?”
Mawu Yesus nihukung pateěng
(Mat. 27:15-31; Mrk. 15:6-20; Luk. 23:13-25)
Mase i Pilatus simẹ̌bang kạpia wọu istana kụ nẹ̌bera su tau Yahudi, ”Iạ e tawe nakareạ pẹ̌sasal᷊a sarang sěmbaụ si Sie. 39Kai tumuhụ tundung kamene, iạ e sěntiniạ makapẹ̌liwirʼu sěngkatau wọu taumatan hukumang su Ěllon Sal᷊imbangu Paskah e. I kamene mapulu iạ mapakal᷊iwirʼu ratun tau Yahudi e waugʼi kamene?”
40I sire simimbang němpamansagẹ̌ u, ”Tala, kumbahang i Sie, paměllọen Barabas!” (I Barabasẹ̌ ute kai sěngkatau tahapěhampasẹ̌ sahiun tahapěmate.)
Currently Selected:
YOHANES 18: SXN
Highlight
Share
Copy
Want to have your highlights saved across all your devices? Sign up or sign in