YOHANES 12
12
Mawu Yesus nisẹ̌bohangu l᷊ana mawěngi su soan Betania
(Mat. 26:6-13; Mrk. 14:3-9)
1Ěnnungu ěllo kal᷊amonan Sal᷊imbangu Paskah, Mawu Yesus e nakoạ sol᷊ong Betania. Su soa ene pẹ̌tẹ̌tanakeng i Lazarus tau e niapẹ̌bangungʼE wọu papate. 2Sene Mawu Yesus e nipẹ̌saken sire, kụ i Marta e nakoạ mẹ̌sasiliwirẹ̌ e. I Lazarus dingangu manga sake e naiang sěngkapěngidopẹ̌ dingangu Mawu Yesus. 3#Luk. 7:37-38 Ene i Maria e nasongọe ringangu l᷊ana mawěngi narwastu mal᷊ěga-l᷊ěgadẹ̌ e mangawe maloara su litere. I sie naměmbingu l᷊ana ene su l᷊aedʼu Mawu Yesus, bọu ene niěmmụ u utạ e. Kụ kaguwạu wal᷊e ene měngkatewe rimal᷊urung běngin lana e. 4Arawe i Yudas Iskariot, sěngkatau wọu muritʼu Mawu Yesus – kụ samurine kawe nẹ̌sunial᷊ʼi Sie – kawe nẹ̌bera, 5”Unụ e lana mawěngi ene tawe nịbawal᷊ụ e ringangu roitẹ̌ sal᷊aka#12:5: Doitẹ̌ sal᷊aka: Kakělla pasalẹ̌ 6:7. arěgane těllu hasụ su dinare kụ doite nipẹ̌gaghěllịko su taumata apang kasiang?” 6I Yudas nẹ̌bera kerene wal᷊inewe ual᷊ingu i sie kawe měnẹ̌nitị taumata kasiang, kaiso kawe ual᷊ingu i sie tahatako. I sie masau mangal᷊ạ doitẹ̌ bọu tatahoěngu roitʼu l᷊awo kạdaresọ si sie.
7Mawu Yesus něhengetang, ”Balạ e kere sẹ̌sane wawine ěndaị e! I sie nẹ̌koạ kerene kai ěllon pěndal᷊ẹ̌bing Siạ e. 8#Pang. 15:11 Tau kasiange mambeng hanesẹ̌be ringang i kamene, arawe Iạ e tala wue.”
Dumarokạ si Lazarus
9Mal᷊awọ tau Yahudi nakaringihẹ̌ u Mawu Yesus kai ene su Betania, kụ i sire něngkakoạ sol᷊ong tampạ ene. I sire natamai wal᷊inewe tumbạu ual᷊ingu piạ i Yesus, kaiso mal᷊aing ual᷊ingu i sire mapulu měmanda si Lazarus kụ sen niapẹ̌bangung wọu papatene kahian Sie. 10Hakịu ene manga imang těmbonange mal᷊aing mapulu měmate si Lazarus; 11ual᷊ingu i sie nakawodaị tau Yahudi mal᷊awọ naněntang i sire kụ němpangimang su Mawu Yesus.
Mawu Yesus simuẹ̌ su Yerusalem piạ pěhěngkinge
(Mat. 21:1-11; Mrk. 11:1-11; Luk. 19:28-40)
12Sěngkariọěllone taumata l᷊awọ kụ seng narěnta waugu měmantugẹ̌ ěllon Paskah nakaringihẹ̌ u Mawu Yesus e seng kạdal᷊enge mẹ̌timona Yerusalem. 13#Mzm. 118:26 Tangu i sire němpangal᷊ạ e manga raungu korma mase nahunsẹ̌bang naněnsomahẹ̌ si Sie, kạpěmpẹ̌gione, ”Hosana! Kaal᷊amatengko i Sie riměnta su arengu Mawu. Kaal᷊amatengko Ratun Israel!”
14Mawu Yesus nakahombangke kalide kawuhuang sěmbaụ kụ nisakeěnge. Tangu natuhụ e kerẹewe mạbawohẹ su Winohẹ Susi:
15 #
Za. 9:9
”Abe katakụ, sangiangu Sion!
Kakěllạ e mahi Ratunu e,
mạiangke su wowon kalide kawuhuang!”
16Su tempo ene manga muritʼu Mawu Yesus bẹ̌dang ta nakaěnna kěbị ene. Kutẹu sarạeng Mawu Yesus niwantughangken kapapohongʼE, buhụ e i sire nakatahěndung apang kinoạ u taumata si Sie kai seng kạbawohẹ su ral᷊ungu Winohẹ Susi e mạanun Sie.
17Apan taumata kụ ene su tempon Mawu Yesus nẹ̌kui si Lazarus apạsěbang bọu lěbing dingangu niapẹ̌bangung i sie wọu papatene, mang měmpẹ̌sẹ̌sahiding hal᷊ẹ̌ ene. 18Hakịu ene taumata l᷊awọ e něngkakoạ sol᷊ong anun Mawu Yesus u i sire nakaringihẹ̌ u kai i Sie nẹ̌koạ kal᷊aherang ene. 19Tangu manga tau Farisi e němpahumbisara sěmbaụ su wal᷊ine, ”I kitẹ e tawe makakoạ manga apa! Kakěllạ e, sěnaung dunia e němpẹ̌tol᷊e si Sie!”
Tau Yunani pirang katau měmpědẹ̌deạ Mawu Yesus
20Bọu tal᷊oaran taumata něngkakoạ sol᷊ong Yerusalem měmpẹ̌kal᷊ịomaneng sutempọen pẹ̌daral᷊uasẹ̌ e kai piạ tau Yunani pirang katau. 21I sire himaung si Filipus kụ nẹ̌bera, ”Anu, kereu wotonge, i kami kai mapulu mẹ̌sombang u Mawu Yesus.” (I Filipus e asal᷊e kai wọu Betsaida su Galilea.)
22Tangu i Filipus tamai mẹ̌habaru ene si Andreas, kụ bọu ene irẹ̌dua něhabarẹ̌ su Mawu Yesus. 23Mawu Yesus něhengetang si sire, ”Seng tempone Ahusʼu Taumata ipakawantugẹ̌. 24Mambeng těngadẹ̌ bawera-Ku ini: Kereu wakịu gandung sěmbaụ tawe suangeng su ěntana e kụ mate, ute i sie mang kạtatanạ sěmbaụ. Arawe kamageng u wakị u gandung ene mate, ute i sie wuhụe mẹ̌bua mal᷊awọ. 25#Mat. 10:39, 16:25; Mrk. 8:35; Luk. 9:24, 17:33 I sai mětẹ̌těnděkạ su pẹ̌bawiahe, sarung kailangengu ene. Arawe i sai měbẹ̌binsịu pẹ̌tatumbiahe su dunia ini e, sarung makatanudẹ̌ baugu pẹ̌bawiahe tutune ringangu kakalẹ̌. 26I sai mapulu mẹ̌tangkiang si Siạ e harusẹ̌ tumol᷊e Siạ; tadeạu mẹ̌tatangkiang-Ku e makataking bue si Siạ e suapạewen Iạ ene sene. I sai mẹ̌tangkiang Siạ e sarung adateng i Amang-Ku.”
Mawu Yesus měbẹ̌bisara mạanun kapapohongʼE
27”Naung-Ku e tụtaghiawahẹ̌; apạ e Takụ ipẹ̌bera su orasẹ̌ ini e? Arau Iạ mẹ̌berạeng, ’Amang, liuko Iạ bọu orasẹ̌ ini e tangu’? Kaiso paghudu mambeng kahombangeng u tempon sigẹ̌sạ ini e nakakarěnta si Siạ e. 28Amang, apakawantugẹ̌ko arengʼU!” Tangu nakaringihe tingihẹ̌ bọu l᷊angị maul᷊ị u, ”Iạ seng bọu namantugẹ̌, dingangu sarung lai mamantugẹ̌ kapia.”
29Taumata l᷊awọ kụ ene sene nakaringihẹ̌ bue tingihẹ̌ ene. Ungkuěng i sire u, ”Ene kai rěllụ!” Kai piạko l᷊ai nẹ̌bera u, ”Bal᷊ine! Kai malạekatẹ̌ měmẹ̌misara si Sie!”
30Mase Mawu Yesus něhengetang si sire, ”Tingihẹ̌ kinaringihẹ̌ e, wal᷊inewe waugu kapian batangeng-Ku, kaiso kai waugu kapiang kamene. 31Ini e seng tempone dunia ihukung; kai orasẹ̌ ini e mangangawasang dunia e nipakawatang. 32Arawe Iạ e, kereu Iạ e seng iapakarangẹ bọu dunia e, ute kěbị taumata e Takụ sarung pakasue wol᷊engang sol᷊ong anu-Ku.” 33I Sie něhengetang kerene ute kai mělẹ̌lahẹu saheng kapapohongʼE sarung.
34 #
Mzm. 110:4; Yes. 9:6; Yeh. 37:25; Dan. 7:14 Taumata l᷊awọ e nẹ̌bera si Sie, ”Tumuhụ toratẹ̌ e, Datu Měnanal᷊amatẹ̌ e sarung mẹ̌biahẹ̌ sarang karěngụ e. Kụ kereapa i Kau makapẹ̌bera u Ahusʼu Taumata e harusẹ̌ iapakarangẹ su wowon dunia e? I sai tangu Ahusʼu Taumata e?”
35Mawu Yesus simimbang, ”Tumbạeng baugu kadodọ tempo tualagẹ̌ e ene sutal᷊oarang kamene. Kụ pěmpahundal᷊engke těntal᷊ang tualagẹ̌ e wědang ene, tadeạu i kamene kumbahang karěndungang. I sain dụdal᷊eng su ral᷊ungu kararěndung e bẹ̌gawen timonane měnsang sol᷊ong a. 36Pěmpangimangke su tualagẹ̌ e, u karěngụewen tualagẹ̌ e wẹ̌dang ene ringang i kamene, tadeạu i kamene mariadiwe manga anạ u tualagẹ̌.”
Tau Yahudi apan ta mangangimang
Bọuten Mawu Yesus něhengetang kerene, i Sie něngal᷊ingke wọu ene kụ tawe mapulu mẹ̌těngkatodẹ u watangengʼE si sire. 37Manilaing seng mal᷊awọ hal᷊ẹ̌ makạdal᷊inaụ kinoạ u Mawu Yesus e su těngon sire, kai i sire mang tawe mangimang si Sie. 38#Yes. 53:1 Tangu naghanape těbal᷊u Nabi i Yesaya,
”Mawu, i sai wue mangimangu habarʼi kami?
Kai si sai kawasan Mawu e ipakal᷊ahẹ?”
39Kai ual᷊ingu ene i sire tawe měmpangimang, u i Yesaya seng bọu l᷊ai naněbal᷊ẹ̌ u,
”Mawu něhengetang,
40 #
Yes. 6:10
’Iạ mapakawutan matang sire,
ringangu mapakarapal᷊u naung i sire;
tadeạu i sire tawe makasilo,
ringangu mạdiring i sire makaěnna.
Tadeạu i sire kumbahang mẹ̌bal᷊ị su anu-Ku,
kụ mapakaul᷊en sire.’ ”
41I Yesaya něluntingihẹ̌ kerene, u i sie seng nakasahidi kasěllahu Mawu Yesus, ringangu měbẹ̌bisara mạanun Sie.
42Manilaing kerene, lawọ taumata ore lai sutal᷊oarang měngangawasang Yahudi nangimang su Mawu Yesus. Kai i sire tawe wahani měngakung ene ipakal᷊ahẹ, batụu i sire matakụ kiwuạu tau Farisi e tawe mapakawalan sire sumuẹ̌ su wal᷊em pẹ̌kakal᷊iomanengang. 43I sire ěndokang u mapulu makahombang daralon taumata sul᷊ungu mẹ̌tatal᷊ahino su těngom Mawu Ruata.
Hengetang u Mawu Yesus sarung měhukung
44Mase Mawu Yesus něhengetang, ”I sai mangimang si Siạ e, wal᷊inewe si Siạ i sie mangimang e, kaiso kawe si Sie kụ něndolohʼu Iạ e. 45Dingangu i sain nakasilo Siạ, ute nakasilo si Sie něndolohʼu Iạ e. 46Iạ riměnta su dunia ini e kai kere tualagẹ̌, tadeạu kal᷊awọu taumata kụ mangimang Siạ e tawẹ u matanạ su ral᷊ungu kararěndung. 47I sai dụdaringihẹ̌ těntiro-Ku, kụ kawe tawe tumatuhụ ene – bal᷊inewe Iạ měhukung i sie. Batụu Iạ e riměnta wal᷊inewe měhukung dunia e, kaiso kawe mangambang dunia. 48I sai mạnuhudʼu Iạ e ringangu tawe rumaringihẹ̌ bawera-Ku e, seng piạ mělahukunge. Hengetang kụ Takụ iwẹ̌bunạ e, ute ene sarung měhukung i sie su Ěllong Kiamatẹ̌ e. 49Batụu Iạ e tawe mẹ̌bawisara wọu kapulu-Ku sẹ̌saku; i Amang kụ něndolohʼu Iạ, ute i Sie měpẹ̌parenta si Siạ apa kụ hinon Takụ iwera ringangu Takụ iwunạ. 50Dingangu Iạ masingkạ u titanʼE ene makạual᷊i pẹ̌bawiahẹ̌ tutune ringangu kakal᷊ẹ̌. Tangu Iạ mạanụewen kere apan nitěntiron Amang si Siạ.”
Currently Selected:
YOHANES 12: SXN
Highlight
Share
Copy
Want to have your highlights saved across all your devices? Sign up or sign in