RAROLOHANG 12
12
Pẹ̌tatatingkaị mạhumpal᷊iu
1Mangawe tempo ene lai Ratu i Herodes#12:1: Ratu i Herodes: Kụ kai Herodes Agripa I, datu waugu kěbị banuang bansang Yahudi. nanětạ mạnumbiagẹ̌ dal᷊ohon jamaatẹ̌. 2Ual᷊ingu parentane, tangu i Yakobus tuhang i Yohanes pinakipateng peda. 3Ene i Herodes nakasilọ e lulune kai nẹ̌tatahino su naungu tau Yahudi, tangu i sie mal᷊aing nẹ̌koạ l᷊ai mẹ̌sul᷊ungu ene; i sie něndolohu taumata piněnamẹ lai si Petrus. Hal᷊ẹ̌ ene nariadi su tempong Hari Basarẹ̌ u Borotẹ̌ Tawẹ Kabọ e, 4#Sas. 12:1-27 sarạeng bọu pinakisamẹ, i Petrus nitaho su ral᷊ungu tahungkụ. Sordado ěpạ u kamonaěng pětahạ ěpạ u katau niapěndiagạ si Petrus sene. Nal᷊iụeng ěllon Paskah e, buhụ e i Herodes něhukung i Petrus su těngon lawọ. 5Kụ i Petrus tangú kạtatahang su tahungkụ, kai arawe ral᷊ohon jamaatẹ̌ e měngkate měkẹ̌kal᷊iomaneng dingangu kạguwạu naung i sire su Mawu e waugʼi Petrus.
I Petrus nipasẹ̌bang bọu tahungkụ
6Su sěhěbi kal᷊amonan Herodes sarung mapẹ̌těngon Petrus su taumata l᷊awọ e, i Petrus mětẹ̌tikị kạpapěgong u wawěntung darua mạtatal᷊oara su sordado měndariagạ e ruang katau. Su tukadu tahungkụ, manga měndal᷊ukadẹ̌ bal᷊ine e mal᷊aing kạpělẹ̌lukade su tahungkụ. 7Ene malạekatẹ̌ e sěngkianụ e rimarisị sene, kụ piạ e tualagẹ̌ siměnnang su ral᷊ungu tahungkụ e. Malạekatẹ̌ e měngkatewe něngangiọ si Petrus sarangkewe i sie nẹ̌bangung. Bọu ene malạekatẹ̌ e nẹ̌berạe, ”Ei lighạko pẹ̌bangung!” Su tempo ene lai sěngkianụ e nanawo hante uase wọu l᷊iman Petrus. 8Bọu e malạekatẹ̌ e nẹ̌bera, ”Luheko pakeangu ringangu ikịko tal᷊ing sapatunu.” Tangu i Petrus e měngkatewe něluheng pakeange ringangu něngikị tal᷊ing sapatune. Bọu ene malạekatẹ̌ e saụewe nẹ̌bera, ”Pẹ̌kakingkaengken kakingkaengu kụ tol᷊e si siạ.” 9Tangu i Petrus timol᷊e malạekatẹ̌ e kụ simẹ̌bang bọu tahungkụ. Kaiso i Petrus e tawe nakapěndang u apạewen iapakạdiadin malạekatẹ̌ e kawe kahěngang. Su naung i Petrus e katihọ e ene kai kětạeng sěmbaụ papasilo. 10Su tempong i sire limiu tampạ u lukadẹ̌ humotong dingangu karuane, i sire nahumpạen tukadẹ̌ uase, sasẹ̌bangeng sol᷊ong soa. Tukadẹ̌ ene kai natope sẹ̌sane, kụ siměbangke i sire mase rimal᷊eng bọu ral᷊eng manintạ. Sěngkělěndịu malạekatẹ̌ ene naghěngging naněntang i Petrus.
11Bọu ene wuhụewe i Petrus nakahěngang u kai apa nariadi si sie, kụ nẹ̌bera, ”Orasẹ̌ ini iạ masingkạ u Mawu e mambeng kahěnga-hěngang seng něndolohu malạekatʼE pělẹ̌liwiru iạ bọu kawasang Herodes dingangu wọu kěbị haghing kakanoạ u tau Yahudi e si siạ.”
12Sarạeng nakaěnnạe hal᷊ẹ̌ ene ute, i Petrus nakoạ sol᷊ong bal᷊eng Maria, i ninang i Yohanes isẹ̌sěbạ l᷊ai si Markus. Sene piạko taumata l᷊awọ mạtatampung dingangu kapẹ̌kẹ̌kal᷊iomanenge. 13I Petrus měnẹ̌nengkelẹ̌ tukadu l᷊ikude, tangu sěngkatau mẹ̌tatangkiang bawine arenge i Rode, himaungke nanope tukadẹ̌. 14Apidu i sie nakakiral᷊a tingihʼi Petrus. Ual᷊ingu ral᷊uase, i sie měngkate ringangu masahawụ simuẹ̌ kapia, tawe manga nanope tukadẹ̌ e, bọu ene něhabarẹ̌ suapan taumata sene u i Petrus kai ene sul᷊ikude. 15”I kau kai pulu!” angkuěng i sire. Kai i Rode mang mạul᷊ị u katěngade u mambeng kahěnga-hěngang i Petrus. Kụ i sire němpẹ̌bera, ”Ene kai malạekatẹ̌!”
16Ene i Petrus mang kạpanengkele tukadẹ̌. Tangu piạ e i sire nanope tukadẹ̌, kụ nakasilọ e si Petrus, tangu i sire měngkate rimal᷊inaụ tạ sihinge. 17I Petrus něnidang l᷊imane tadeạu i sire pakạděmmasẹ̌, mase i sie nẹ̌běkẹ e si sire sahen pěndal᷊ěsọ u Mawu si sire simẹ̌bang bọu ral᷊ungu tahungkụ. Bọu e i sie nẹ̌bera, ”Habarẹ̌ko ini si Yakobus, dingangu su manga anạ u sěmbaụ l᷊ai wal᷊ine.” Bọu ene i Petrus kai naněntangu tampạ ene kụ nẹ̌deạ tampạ bal᷊ine.
18Sěngkariọěllone mal᷊ukadẹ̌ e nariadịe pẹ̌tatanggarạ sutal᷊oarang manga sordado mělal᷊ukadẹ̌ e. I sire měngkate niwingọ u apa nariadi si Petrus e. 19Mase i Herodes něndolohu taumata apědẹ̌deạ si Petrus, kutẹu i sire kai tawe nakareạ. Ene i Herodes nẹ̌parenta tadeạu manga měndariagạ ene pakịsẹ̌sui e, mase pakịpate.
Bọu ene i Herodes něngal᷊ing bọu Yudea kụ nẹ̌tanạ manga pira ěllo su Kaisarea.
Kapapaten Herodes
20I Herodes měngkate limangehẹ̌ marasai su tau Tirus dingangu Sidon. Ual᷊ingu ene tangu i sire riměnta sěngkapahunděnta nẹ̌těngon sie. Kahumotongange i sire něnahionge si Blastus, těmbonangu měnanahimata wal᷊en Datu i Herodes, hakịu i sie mạnumběka wọu i sire. Mase i sire nẹ̌těngon Herodes, mědẹ̌dorong tadeạu mẹ̌dame, batụu i sire katewe makạhombang kaěng bọu wanuan Herodes.
21Piạ sahěllo kụ seng nipoěng, i Herodes něluhẹem pakeangʼu kawawantugʼe bọu e naiang su kaderang kararatuang kụ nanětạ e nẹ̌pidato su těngong kawanua. 22Kawanuạ e kụ kapědẹ̌daringihe, ute němpěmansage, ”Ini e kai tingihu ruata, wal᷊inewe tingihu taumata!” 23Su tempo ene lai malạekatu Mawu e nameru si Herodes, batụu i sie tawe měngangadatẹ̌ Mawu Ruata. I Herodesẹ̌ e nipakikinạ su ul᷊idẹ̌ bọu ene nate.
24Tangu hengetang u Mawu e mangkeng kakạsawuhe ringangu kakạtoghase.
25Sarạeng i Barnabas dẹ̌duan Saulus e nanguadipẹ̌ hal᷊ẹ̌ irẹ̌dua e, irẹ̌dua nẹ̌sul᷊e wọu#12:25: Wọu: binohẹ u nạung pira-pira: sol᷊ong. Yerusalem kụ němaringang i Yohanes, Markus, kụ němpẹ̌dingang.
Currently Selected:
RAROLOHANG 12: SXN
Highlight
Share
Copy
Want to have your highlights saved across all your devices? Sign up or sign in