Ore i mexü̃ ga Matéu ümatüxü̃ 17
17
Ngechuchu rü toraxü̃ãcü nango̱x
(Mr. 9.2-13; Lc. 9.28-36)
1Rü 6 ga ngunexü̃wena rü Ngechuchu ínayagagü ga Pedru rü Chantiágu rü Cuáü̃ ga Chantiáguenexẽ. Rü wüxi ga ma̱xpǘnewa namaxã naxũ. Rü nüxicatama yéma nayexmagü.
2Rü yéma yema ngúexü̃güpe̱xewa rü toraxü̃ãcü nango̱x ga Ngechuchu. Rü üa̱xcürüxü̃ niyauracüxü ga nachiwe. Rü naxchiru rü nacómüxü̃chi, rü ñoma ngóonexü̃rüxü̃ nixĩ.
3Rü ñu̱xũchi yéma naxca̱x nangõ̱xgü ga Moiché rü Ería. Rü Ngechuchumaxã yéma nidexagü.
4Rü yexguma ga Pedru rü ñanagürü Ngechuchuxü̃: —Pa Corix, name nixĩ nua tangexmagü. Rü ngẽxguma cunaxwa̱xegu rü tá tanaxü ya tomaepü̱x ya düxenü, rü wüxi ya cuxca̱x, rü nai ya Moichéca̱x, rü nai ya Eríaca̱x —ñanagürü.
5Rü yexguma íyadexayane ga Pedru rü wüxi ga caixanexü̃ ga nangóonexẽẽxü̃ rü natanügu nayanga̱i̱xema. Rü yema caixanexü̃wa inanaxũ ga wüxi ga naga ga ñaxü̃: —Daa nixĩ ya Chaune ya nüxü̃ changechaü̃xü̃chicü rü namaxã chataãẽxü̃chicü. ¡Rü naga pexĩnüe! —ñanagürü.
6Rü yexguma yemaxü̃ naxĩnüegu ga yema ngúexü̃gü, rü ñaxtüanegu nanangücuchitanü, yerü poraãcü namuü̃e.
7Natürü ga Ngechuchu rü naxca̱x nixũ, rü nüxü̃ ningõgüchigü, rü ñanagürü nüxü̃: —¡Ipechigü rü taxṹ i pemuü̃exü̃! —ñanagürü.
8Rü yexguma wenaxarü nadaunagütanügu, rü Ngechuchuxü̃xicatama nadaugü rü taxúema ga toguxexü̃ nadaugü.
9Rü yexguma ínaxĩgügu ga guma ma̱xpǘnewa, rü Ngechuchu nayaxucu̱xẽgü nax taxúemaama nüxü̃ yaxugüexü̃ca̱x ga yema yéma nüxü̃ nadaugüxü̃, ñu̱xmatáta yuwa ínadaxgu rü wena namaxü̃gu.
10Rü ñu̱xũchi ga yema norü ngúexü̃gü rü Ngechuchuna nacagü, rü ñanagürügü: —¿Tü̱xcüü̃ i ngẽma mugüwa ngu̱xẽẽtaegüxü̃ rü ñanagürügü: “Ería tá nixĩ ya nüxíra cuxü̃pa nua ũcü?” —ñanagürügü.
11Rü Ngechuchu nanangãxü̃, rü ñanagürü: —Aixcüma nixĩ nax Ería nüxíra núma ũxü̃ nax chauxü̃pa yamexẽẽãxü̃ca̱x i guxü̃ma.
12Natürü choma pemaxã nüxü̃ chixu, rü Ería rü marü núma naxũ, natürü nüma ga duü̃xü̃gü rü tama nüxü̃ nacua̱xgü nax texe yixĩxü̃. Rü guxü̃ma ga yema nüma ga duü̃xü̃gü nanaxwa̱xegüxü̃ nixĩ nax ngúxü̃ nüxü̃ ningexẽẽgüxü̃. Rü ngẽxgumarüxü̃ tá ta nixĩ nax ngúxü̃ nüxü̃ yangexẽxẽgüxü̃ ya Tupana Nane ya duü̃xü̃xü̃ ixĩcü —ñanagürü.
13Rü yexguma ga yema ngúexü̃gü rü nüxü̃ nicua̱xãchitanü ga Cuáü̃ ga báiü̃xẽẽruü̃chiga nax yixĩxü̃ ga yema Ngechuchu namaxã nüxü̃ ixuxü̃.
Ngechuchu nanamexẽxẽ ga wüxi ga bucü ga ngo̱xo nawa yexmacü
(Mr. 9.14-29; Lc. 9.37-43)
14Rü yexguma duü̃xü̃gü íyexmaxü̃wa nangugügu, rü wüxi ga yatü Ngechuchuca̱x nixũ. Rü nape̱xegu nayacaxã́pü̱xü rü ñanagürü nüxü̃:
15—Pa Corix, ¡cuxü̃́ nangechaü̃tümüxü̃ ya chaune! Erü muẽ̱xpü̱xcüna ngo̱xo nanaxãũãẽxẽxẽ, rü poraãcü ngúxü̃ ninge. Rü muẽ̱xpü̱xcüna üxüxétügu nayangu, rüe̱xna dexágu nayangu.
16Rü nua curü ngúexü̃güxü̃tawa chanaga, natürü nümagü rü tama nüxü̃ nacua̱xgü nax namexẽẽgüaxü̃́ —ñanagürü.
17Rü yexguma Ngechuchu nanangãxü̃, rü ñanagürü nüxü̃ ga yema duü̃xü̃gü ga yéma yexmagüxü̃: —Pa Duü̃xü̃gü i Tama Yaxõgüxü̃ i Chixri Maxẽxü̃, ¿ñuxguratáta i pemaxã chanuxmaxü̃ rü yáxna pemaxã chaxĩnüxü̃? ¡Nua penaga ya yimá bucü! —ñanagürü.
18Rü Ngechuchu nananga ga yema ngo̱xo ga gumá bucüwa yexmaxü̃. Rü yemaacü ínanata̱xüchi ga yema ngo̱xo. Rü yexgumatama naxca̱x nitaane ga gumá bucü.
19Rü yemawena ga norü ngúexü̃gü rü noxrüwama Ngechuchumaxã nidexagü. Rü nüxna nacagüe, rü ñanagürügü nüxü̃: —Pa Corix, ¿tü̱xcüü̃ i toma rü taxuacüma ítanata̱xüchi i ngẽma ngo̱xo? —ñanagürügü.
20Rü Ngechuchu nanangãxü̃, rü ñanagürü nüxü̃: —Pema rü taxuacüma ípenata̱xüchi erü tama aixcüma peyaxõgü. Rü aixcüma pemaxã nüxü̃ chixu, rü ngẽxguma chi woo wüxi ya motachachirerüxü̃ naxíraxü̃chigu i perü õ, rü chi daa ma̱xpǘnemaxã nüxü̃ pixuxgu nax yaxũgachixü̃ca̱x, rü chi pega naxĩnü. Rü taxuxü̃chima pexü̃́ naguxcha ega aixcüma peyaxõgügu.
21Natürü ñaarüxü̃ i ngo̱xo rü tama ínaxũxü̃ ega tama ixaureãcüma iyumüxẽgu —ñanagürü.
Ngechuchu rü wenaxarü nanaxunagü ga norü yuxchiga
(Mr. 9.30-32; Lc. 9.43-45)
22Rü yexguma norü ngúexü̃gümaxã Gariréaarü naanegu yaxũxgu ga Ngechuchu, rü norü ngúexü̃gümaxã nüxü̃ nixu, rü ñanagürü: —Tupana Nane ya duü̃xü̃xü̃ ixĩcü, rü tá duü̃xü̃güme̱xẽgu nangu.
23Rü tá nayama̱xgü, natürü tomaepü̱x i ngunexü̃guwena rü wena táxarü namaxü̃ —ñanagürü. Rü yexguma yema orexü̃ naxĩnüegu ga norü ngúexü̃gü, rü poraãcü nangechaü̃gü.
Ngechuchu ngĩxü̃ inaxã ga yema diẽru ga Tupanapata ga taxü̃neca̱x ngĩxü̃ nayauxgücü
24Ngechuchu rü norü ngúexü̃gümaxã Capernáü̃arü ĩanewa naxĩ. Rü yexguma yéma nangugügu rü Pedruxü̃ ínayadaugü ga yema yatügü ga Tupanapata ga taxü̃neca̱x diẽru ngĩxü̃ yauxgüxü̃. Rü Pedruna nacagüe rü ñanagürügü: —¿Yimá curü Cori rü tama ẽ̱xna ngĩxü̃ inaxã i ngẽma diẽru i Tupanapata ya taxü̃neca̱x ixĩcü? —ñanagürügü.
25Rü Pedru nanangãxü̃, rü ñanagürü: —Ngẽmáacü nanaxütanü —ñanagürü. Rü yixcama ga yexguma ĩxgu naxücu̱xgu ga Pedru, rü Ngechuchuxíra Pedrumaxã nidexa, rü ñanagürü nüxü̃: —¿Ñuxũ ñacuxü̃ i cumax, Pa Chimóü̃x, rü ngextá nixĩ i nayauxgüãxü̃ i norü diẽru i guxü̃ i nachixü̃anegüarü ãẽ̱xgacügü? ¿Cuxca̱x i nügütanüwatama rü ẽ̱xna togü i duü̃xü̃gütanüwa? —ñanagürü.
26Rü Pedru nanangãxü̃, rü ñanagürü: —Ngẽma togü i duü̃xü̃gütanüwa nixĩ i nayauxgüãxü̃ —ñanagürü. Rü ñu̱xũchi Ngechuchu nanangãxü̃ rü ñanagürü: —Rü ngẽxguma ngẽmaãcü yixĩxgu, rü yixema nax Tupanaarü ixĩgüxü̃ rü taxuca̱xma tanaxütanügü.
27Natürü ngẽma nax taxúema tamaxã nuxü̃ca̱x, rü chanaxwa̱xe i cuyaxütanüxü̃ i ngẽma diẽru. ¡Rü yea naxtaxawa naxũ, rü ngéma yapoxwaxe! ¡Rü ngẽma nüxíraxü̃xü̃ i choxni i cunapoxwaü̃xü̃ rü naã̱xwa tá nüxü̃ icuyangau i wüxi i diẽru i nagu mexü̃ nax yangutanüxẽẽxü̃ca̱x i cha̱u̱xca̱x rü cuxca̱x rü ta! ¡Rü Tupanapatawa nange i ngẽma diẽru, rü yaxütanü! —ñanagürü.
Currently Selected:
Ore i mexü̃ ga Matéu ümatüxü̃ 17: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.