Nüxíraxü̃xü̃ ga popera ga Timutéuca̱x naxümatüxü̃ ga Pauru 4
4
Duü̃xü̃gü i nüxü̃ rüxoexü̃ nax yaxõgüãxü̃chiga
1Tupanaãxẽ ya Üünecü rü meama nüxü̃ nixu rü ngẽxguma yangaicagu nax nagúxchaü̃xü̃ i naane rü nümaxü̃ i duü̃xü̃gü rü tá nüxü̃ narüxoe nax yaxõgüãxü̃. Rü tá nawe narüxĩ i duü̃xü̃gü i nawomüxẽẽgüxü̃ i Chatanáarü ngu̱xẽẽtae nangúexẽẽxü̃.
2Rü ngẽma duü̃xü̃gü i nüxü̃ rüxoexü̃ nax yaxõgüãxü̃ rü tá nüxü̃́ inarüxĩnüe i ngẽma duü̃xü̃gü i nawomüxẽẽgüxü̃ rü idorata̱xaxgüxü̃. Erü ngẽma duü̃xü̃gü i dorata̱xaxgüxü̃ rü düxwa namaxã nixü nax chixexü̃guxicatama naxĩnüexü̃.
3Rü ngẽma duü̃xü̃gü rü nanachu̱xu nax yangĩgüxü̃ i duü̃xü̃gü. Rü duü̃xü̃güna nanachu̱xu nax nangõ̱xgüãxü̃ i ñuxre i õnagü rü woochire̱x Tupana nanaxü i guxü̃ma i õnagü nax moxẽ naxca̱x inaxãgüãcüma nangõ̱xgüãxü̃ca̱x i norü duü̃xü̃gü i yaxõgüxü̃ i norü orexü̃ cua̱xgüxü̃.
4-5Natürü guxü̃ma ya Tupana üxü̃ rü name. Rü taxuacüma nüxü̃ taxo ega Tupanana moxẽ naxca̱x ixãxíraãcüma nangõ̱xgu. Erü Tupanaarü ore rü ngẽma yumüxẽ rü nanaxüünexẽxẽ i ngẽma õna, rü ngẽmaca̱x name nax nangṍxü̃.
Ngechuchu ya Cristuarü mugüruxü̃ i mexü̃chiga
6Rü ngẽxguma ngẽma cumaxã nüxü̃ chixuxü̃ i oremaxã cunangúexẽẽgu i taenexẽ i yaxõgüxü̃, rü Ngechuchu ya Cristuarü mugüruxü̃ ya mecü tá quixĩ. Rü ngẽxguma nawa cungúechagu i ngẽma ore i marü quixõxü̃, rü ngẽxguma nagu quixũẽchagu i ngẽma mexü̃ i ngu̱xẽẽtae i marü nagu quixũxü̃, rü ngẽxguma tá nixĩ i wüxi ya mecü ya Ngechuchu ya Cristuarü mugüruxü̃ quixĩxü̃.
7Rü tama name nax naga cuxĩnüxü̃ i ñoma i naanecüã̱xarü ore i norü ĩnüwa ne ũxü̃ i tama aixcüma ixĩxü̃. Natürü name nixĩ i guxü̃guma cugü cuporaxẽxẽ nax yexeraãcü Tupanaxü̃ cungechaü̃xü̃ca̱x rü naxca̱x cumaxü̃xü̃ca̱x.
8Rü wüxi i mexü̃ nixĩ nax yaxĩã̱xcüüxẽẽxü̃ i taxü̃ne nax naporaxü̃ca̱x. Natürü ngẽmaarü yexera narümemae nixĩ nax yigü iporaxẽẽxü̃ nax Tupanaga ixĩnüxü̃ca̱x erü ngẽma rü guxü̃wama tüxü̃́ name i ñu̱xma nax imaxẽxü̃ rü guxü̃gutáma i daxũguxü̃ i naanewa rü ta.
9Rü aixcüma nixĩ i ngẽma ore i cumaxã nüxü̃ chixuxü̃, rü name nixĩ i guxãma tayaxõgü.
10Rü ngẽmaca̱x nixĩ i ipuracüexü̃ rü yigü iporaãẽxẽẽxü̃ nax nüxü̃ ixuxü̃ca̱x i ngẽma ore i mexü̃, erü nüxü̃́ tayaxõgü ya tórü Tupana ya Maxü̃cü ya guxãarü Maxẽxẽẽruxü̃ ixĩcü, rü yexera ngẽma nüxü̃́ yaxõgüxü̃arü ixĩcü.
11Rü chanaxwa̱xe i cunangúexẽxẽ i ngẽma ore rü duü̃xü̃güxü̃ cumu nax naga naxĩnüexü̃ca̱x.
12¡Mea cugüna nadau nax taxúema cuxü̃ naxoxü̃ca̱x naxca̱x i ngẽma nax cungextü̱xüxü̃! Rü name nixĩ i wüxi i mexü̃ i cua̱xruxü̃ quixĩ naxca̱x i guxü̃ma i ngẽma yaxõgüxü̃. Rü ngẽmaca̱x cunaxwa̱xe i mexü̃ i oremaxã quidexa, rü mea duü̃xü̃güpe̱xewa cumaxü̃, rü aixcüma nüxü̃ cungechaü̃ i guxü̃ma i duü̃xü̃gü, rü mea Tupanaaxü̃́ cuyaxõ, rü nape̱xewa mea cumaxü̃.
13Rü chanaxwa̱xe i ngutaque̱xewa i duü̃xü̃güpe̱xewa nüxü̃ cudaumatü i Tupanaarü ore, rü duü̃xü̃gümaxã nüxü̃ quixu nax ñuxũ ñaxü̃chiga yixĩxü̃. Rü chanaxwa̱xe i ngẽmaãcü cunangúexẽxẽ rü nüxü̃́ cunangúchaü̃xẽxẽ i ngẽma taenexẽgü ñu̱xmatáta ngéma changu i chomax.
14Rü tama name i nüxü̃ curüngü̃ma i ngẽma cua̱x ga Tupana cuxna ãxü̃ ga yexguma yema yaxõgüxü̃arü ãẽ̱xgacügü cuétü üxme̱xgüãcüma cumaxã nüxü̃ yaxugügu nax Tupana cuxna naxãxü̃ ga yema cua̱x.
15¡Mea naxü i guxü̃ma i ngẽma cumaxã nüxü̃ chixuxü̃, nax ngẽmaãcü guxü̃ i duü̃xü̃gü nüxü̃ daugüxü̃ca̱x nax guxü̃ i ngunexü̃gu yexeraãcü mea Tupanaca̱x nax cumaxü̃xü̃!
16¡Naxuãxẽ rü mea cugüna nadau rü mea nangúexẽxẽ i ngẽma ore rü mea naxüama i ngẽma puracü ya Tupana nagu cuxü̃ muxü̃! Erü ngẽxguma mea cunaxü̱xgu i ngẽma puracü, rü tá cunayaxu i maxü̃ i taguma gúxü̃ rü ngẽma cuxü̃́ irüxĩnüexü̃ rü tá ta nanayauxgü i ngẽma maxü̃.
Currently Selected:
Nüxíraxü̃xü̃ ga popera ga Timutéuca̱x naxümatüxü̃ ga Pauru 4: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.