Litanga 48
48
1Kunangwa inyima wevindu yivi, mulala ya volera Yosefa, Henza, Dada wowo a lwalanga; naye ya hila avana veve vaviri, Manase na Efiraim. 2Na mulala ya volera Yakobo, Henza, mwana wowo Yosefa yadzanga ku ive: na Israeli yedinyeridza ni yikala ku kitali. 3Na Yakobo ya volera Yosefa, Nyasaye Wanyala Vyosi ya loleka ku inze ha Luz mu kivala kya Kanani, na ya ngasidza, 4na a mbolera, Henza, nda ku ha lwivulu, na nda ku meda, na nda ku kola kuva kiduma kya avandu, kandi nda haana kivala yiki ku visukululwi vivyo inyima wowo kuva miyandu gyemihiga nemihiga. 5Na kalunu avana vovo avayai vaviri, avivulwa ku ive mu kivala kya Egepeti lwa inze nkikiri kuduka ku ive mu Egepeti, va veye vange; Efiraim na Manase, kuli Rubeni na Simeoni, va la va vange. 6Na avana va u livula lwenyima ku yava, va la va avovo; va la langwa ku ameta ga avamwavo vavo mu miyandu gyavo. 7Kandi ku inze, inyinga nda twula Padan, Raheli ya kudzira mu kivala kya Kanani ku inzira, lwa kwa duka himbi Efirathu: na inze nda mu ta yo ku inzira i tsitsanga Efirathu, (ha zana ha langwa Beth-lehemu).
8Na Israeli ya henza avana va Yosefa, na a teva, Yava ni vaha? 9Na Yosefa ya volera dada wewe Yava va veye avana vange, va Nyasaye ya mpera hano. Naye ya vola Mwadza, u va sunde himbi ku inze na nda va gasidza. 10Na tsimoni tsya Israeli tsya li tsya vakula kigira busakulu bwibwe, kuduka si ya nyala kulola. Naye ya va sunda himbi kuye; na ya va busa na a va kumberera. 11Na Israeli ya volera Yosefa, Si nda ganagana kulola mumoni mumwo: na, henza, Nyasaye u mpeye kulola avana vovo kandi. 12Na Yosefa ya leta avana veve va twula ha masigamo gege; naye yeyinaminya kuduka hasi. 13Na Yosefa ya va vugula vombi, Efiraim ku mukono mulungi gwigwe kukagatidza ku mukono gwa Israeli mmosi, na Manase ku mukono mmosi gwigwe kukagatidza ku mukono gwa Israeli mulungi, na a va sunda himbi kuye. 14Na Israeli ya nyira mukono mulungi, na a vika ku mutwe gwa Efiraim wa li umuke, na mukono gwigwe mmosi ku mutwe gwa Manase, ya nyira makono nelimanya; kigira Manase ya li wokutanga kwivulwa. 15Naye ya gasidza Yosefa, na a vola, Nyasaye wavaguga vange Abrahamu na Isaka va genda imbiri wewe, Nyasaye wa ndageridza mu buhindiri bwange bwosi kuduka lero, 16Ingelosi wa mbonnya kuntwulidza ku budamano bwosi, a gasidze avayai; na lieta lyange litalirwe kuvo, na lieta lya vaguga vange Abrahamu na Isaka; navo va viruke, nokukula kuva avanyingi mu lirova. 17Na lwa Yosefa ya lola dada wewe na aviki mukono mulungi ku mutwe gwa Efiraim, si ga mu yanzidza mba: na ya ginga mukono gwa dada wewe, kugutwulidza ku mutwe gwa Efiraim, nokuguvika ku mutwe gwa Manase. 18Na Yosefa ya volera dada wewe, Ga ta va ndiyo, dada wange; kigira wokutanga ni uyu; u vike mukono mulungi ku mutwe gwigwe. 19Na dada wewe ya sula, na a vola, Mmanya, mwana wange, mmanya; uyu kandi a la gwa ihiri, kandi a la va munene: navutswa amwavo wewe muke a la va munene kuvita uyu, na kisukululwi kikye ki la gwa ubunyingi bwetsihiri. 20Naye ya va gasidza ku lidiku zana na a vola, Ku litala ive, Israeli va ia gasidza, ni va vola, Nyasaye a kole ive kuva kuli Efiraim na kuli Manase: na ya vika Efiraim imbiri wa Manase. 21Na Israeli ya volera Yosefa, Henza, nkudzanga: navutswa Nyasaye a la va halala nemwinye, naye a la mu hila kumuvika kandi mu kivala kya avaguga venyu. 22Kandi mmali kukuha kidieli kilala kuvita avamwavo vovo, kya nda twulidza mu mukono gwa Avamori nekivavi kyange nobuta bwange.
Currently Selected:
Litanga 48: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967