Litanga 46
46
1Kunangwa Israeli ya samula halala na vyoso vya ya li navyo, na a duka Beer-sheba, na a haana vihaanwa ku Nyasaye wa dada wewe Isaka. 2Na Nyasaye ya volera Israeli mu maloto gobudiku, na a vola, Yakobo, Yakobo. Naye ya bugira, Mbeye hano. 3Naye ya vola, Inze mbeye Nyasaye, Nyasaye wa dada wowo: u ta tia kusulunguta Egepeti mba; kigira yeyo nda ku kola kuva ihiri inene: 4Inze nda sulunguta halala nive kutsia Egepeti; na ligali nda ku leta hano kandi: na Yosefa a la vika mukono gwigwe ku tsimoni tsitsyo. 5Na Yakobo ya vuka kutwula Beer-sheba: na avana va Israeli va ginga Yakobo dada wavo, na avakekeke vavo, na avakali vavo, mu magari ga Farao ya leta kumuginga 6Na va hila imitugu gyavo, nobutugi bwosi bwa va nyola mu kivala kya Kanani, ni va duka Egepeti, Yakobo, na visukululwi vivye halala naye: 7avayai veve, na avayai vavayai veve halala naye, na avakana veve, na avakana vavayai veve, na lwivulo lwilwe lwosi ya leta halala naye mu Egepeti.
8Na ameta ga vana va Israeli ava duka Egepeti ni yaga, Yakobo na avayai veve: Rubeni, munene wa Yakobo. 9Na avana va Rubeni: Hanoku, na Palu, na Heziron, na Karmi. 10Na avana va Simeoni: Jemueli, na Jamini, na Ohadu, na Jakin, na Zoharu, na Shaulu mwana wa mukali Mukanani. 11Na avana va Levi: Gerishon, Kohathu, na Merari. 12Na avana va Yuda: Eru, na Onan, na Shela, na Pereze, na Zera, navutswa Eru na Onan va kudzera mu Kanani. Na avana va Pereze va li Heziron na Hamulu. 13Na avana va Isakari: Tola, na Puva, na Yobu na Shimiron. 14Na avana va Zebuloni: Seredu, na Elon, na Jahaleli. 15Yava na vana va Leah, ava yivulira Yakobo mu Padanaram, halala na mukana wewe Dina: avana veve vosi, avayai navakana va li makumi gavaka na vavaka. 16Na avana va Gadi: Zifion, na Hagi, Shuni, na Ezibon, Eri, na Arodi, na Areli. 17Na avana va Asheri: a Jamini, na Ishua, na Ishui, na Beria, na mbotso wavo Sera; na avana va Beria: Heberi, na Malikieli. 18Yava navana va Zilipa wa Labani ya ha Leah mukana wewe; na yava nivo ava yivulira Yakobo, vosi likumi na vatano na mulala. 19Na avana va Raheli mukali wa Yakobo: Yosefa na Benjamini. 20Na vivulirwa Yosefa mu kivala kya Egepeti Manase na Efiraim, ava Asenathu, mukana wa Potifera musalisi wa On, ya mwivulira. 21Na avana va Benjamini: Bela, na Bekeru, na Ashibel, Gera, na Naaman, Ehi, na Rosh, Mupim, na Hupim, na Aridi. 22Yava nivo avana va Raheli, avivulirwa Yakobo: vosi va li likumi na vane. 23Na avana va Dan: Hushim. 24Na avana va Nafitali: Jahazeli, na Guni, na Jezeru, na Shilem. 25Yava navana va Bilha, wa Labani ya ha Raheli mukana wewe, va yivulira Yakobo: vosi va li vatano na vaviri. 26Vosi va sulunguta halala na Yakobo kuduka Egepeti, avivulwa kuye, bugira avakali va vana veve, vosi va li avandu amakumi gatano na lilala na vatano na mulala. 27Na avana va Yosefa, avivulwa kuye mu Egepeti, va li vaviri: na vosi ava li venyumba ya Yakobo, ava duka mu Egepeti, va li makumi gatano na gaviri.
28Naye ya tuma Yuda imbiri wewe kutsia ku Yosefa kumumannya inzira i tsitsanga Goshen: navo va duka mu kivala kya Goshen. 29Na Yosefa ya lomba ligari lilye, ni yanegira kwaganira Israeli dada wewe, ha Goshen; na yesingeridza mwene imbiri wewe, na a gwa ku ligoti lilye, na a lirira ku inyinga i duki. 30Na Israeli ya volera Yosefa, Kalunu leke nkudze, kigira ndoli mumoni mwumwo, nu u kiri mwoyo. 31Na Yosefa ya volera avamwavo veve, na yava vosi avenvumba ya dada wewe, Inze ndanegira kumannya Farao, nokumuvolera, Avamitu vange, na avenyumba ya dada wange ava li mu kivala kya Kanani, va duki ku inze; 32Na avandu yavo va veye avayi vemitugu, kigira va veye avatugi vemitugu; navo va leti vyayo vya magondi, ne tsing'ombe, na vyosi vya va veye navyo. 33Kunangwa, lwa Farao a mu langa, nokumuteva, Miyinzi gyenyu gyi veye ki? 34Mwinye mu la vola, Avatumekiri vovo va veye avatugi vemitugu kutwula bwana bwoke bwetu kuduka lero, kwinye, na avadada vetu: mu duke kumenya mu kivala kya Goshen; kigira avayi vosi va veye livihiriridza ku Avaegepeti.
Currently Selected:
Litanga 46: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967