Litanga 21
21
1Na Yahova ya henza Sara kuli ya vola, na Yahova ya kolera Sara kuli ya mu volera. 2Na Sara ya vereka na yivulira Abrahamu mwana muyai mu busakulu bwibwe, ku inyinga zana ya Yahova ya mu volera. 3Na Abrahamu ya gulika lieta lyomwana yivulwa kuye, wa Sara ya mwivulira, Isaka. 4Na Abrahamu ya keva mwana wewe Isaka lwa ya duka madiku gatano na gavaka, kuli Nyasaye ya mu laga. 5Na Abrahamu ya li nemihiga mia lwa mwana wewe Isaka yivulwa. 6Na Sara ya vola, Nyasaye u mbeye liseka; na ku vosi u hulira a la seka halala ninze. 7Kandi ya vola Ibwaha nkano ya volera Abrahamu Sara a la nyunnya avana? Kigira mmwivuye mwana muyai mbusakulu bwibwe.
8Na mwana ya viruka, na a luguhira: na Abrahamu ya lomba lilia linene ku lidiku lya Isaka ya luguhira. 9Na Sara ya lola mwana wa Hagari Muegepeti, wa yivulira Abrahamu, na a kola kihenyahenya. 10Kunangwa ya volera Abrahamu, U kunge mkana mutugwa uyu na mwana wewe: kigira mwana womutugwa uyu si a la va wemiyandu halala nomwana wange, kali halala na Isaka. 11Na inkuva yiyi ya li indinyu ku Abrahamu kigira mwana wewe. 12Na Nyasaye ya volera Abrahamu, I ta va indinyu ku ive kigira mwana, kandi kigira mkana mutugwa wowo; ku vyosi vya Sara a ku volera, u hulire mwoyo gwigwe, kigira kisukululwi kikyo ki la langwa mu Isaka. 13Na kandi nda kola mwana wa mutugwa wowo kuva ihiri, kigira yivuliwa ku ive. 14Na Abrahamu ya vuka mabwebwe, na a vugula ubukima na kimuga kya amadzi, na a ha Hagari ya vi vika ku livega lilye, kandi mwana, na a mu twulidza: naye ya tsia, na a gendagenda mu kyangalangwi kya Beer-sheba. 15Na amadzi mu kimuga ga fwa, naye ya vika mwana isi womusala mukekeke. 16Naye ya tsia na yikala ha luvega ihale ha duka lilasa lyombano: kigira ya vola, Mbule kulola likudza lyomwana. Kandi yikala ha luvega, na a ginga mwoyo gwigwe, na a lira. 17Na Nyasaye ya hulira mwoyo gwomwana; na ingelosi wa Nyasaye ya langa Hagari kutwula migulu na a mu teva U veye naki Hagarii u ta tia; kigira Nyasaye u huliye mwoyo gwomwana ha a veye. 18Vuka, u vugule mwana, u mu gumire mmakono gogo; kigira nda mu kola kuva ihiri inene 19kandi Nyasaye ya kunula tsimoni tsitsye, naye ya lola kidaho kyamadzi; na a tsia kwizulitsa kimuga amadzi; na a ha mwana kunwa. 20Kandi Nyasaye ya li halala nomwana, na a viruka; na a menya mwigendinyama, lwa ya li na a virukanga ya gwa mulasi wembano. 21Naye ya menya mwigendinyama lya Parani: na mama wewe ya mu kwehidza mukali mu kivala kya Egepeti. 22Kunangwa inyinga yeyo, Abimeleku na Fikolu nlunene welihe lilye va volerana na Abrahamu, ni va vola Nyasaye a veye halala na ive mu vyosi vya u kolanga: 23kalunu u nzisuhire ku Nyasaye u la vula kungada, kinga mwana wange, kinga mwisukulu wange: navutswa kuli ubulahi bwa nda ku kolera, na ive u la nkolera ndiyo, noku kivala kya u menyanga mu. 24Na Abrahamu ya vola, Ndisuha. 25Na Abrahamu ya gaya Abimeleku kigira kidaho kya amadzi, kya avatumekiri va Abimeleku va mu nyaga. 26Na Abimeleku ya vola, Si mmanya uyu wa kola inkuva yiyi; kandi si wa mbolera, kandi si nda hulira, navutswa lero. 27Kunangwa Abrahamu ya vugula magondi netsing'ombe, na a ha Abimeleku; navo vombi va lomba lilagana. 28Kandi Abrahamu ya vika ha luvega avana va magondi vatano na vaviri vasuveni vekyayo. 29Na Abimeleku ya teva Abrahamu, Avana vamagondi vatano na vaviri vasuveni yava, va u viki ha luvega va veye kigira ki? 30Naye ya vola, Avana va magondi vatano na vaviri vasuveni yava, ive u la vugula mmukono gwange, kuva lilolekidza lyange, ninze wa yava kidaho yiki. 31Kigira yaga ya gulika ha zana Beersheba; kigira visuhira ho vombi. 32Kunangwa va lomba lilagana ha Beer-sheba: na Abimeleku ya singira, na Fikolu munene welihe lilye, na virana kutsia mu kivala kya Vafilisti. 33Na Abrahamu ya simika muvinde mu Beer-sheba, na yanira lieta lya Yahova, Nyasaye Wemihiga nemihiga. 34Na Abrahamu ya menya mu kivala kya Vafilisti madiku manyingi.
Currently Selected:
Litanga 21: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967