Litanga 16
16
1Kunangwa Sarai mukali wa Abram, si ya mwivulira avana mba: naye ya li nomkana mutugwa, Muegepeti, lieta lilye lya langwa Hagari. 2Na Sarai ya volera Abram, Henza, Yahova u ngayi ntivula mba; mwadza, u tsie kuva nomukana mutugwa wange: mbula nda nyola avana kuye. Na Abram ya hulira livola lya Sarai. 3Na Sarai, mukali wa Abram, ya leta Hagari, Muegepeti, mutugwa wewe, lwa Abram ya mala kumenya mihiga likumi mu kivala kya Kanani, na a mu haana ku Abram musatsa wewe kuva mukali wewe. 4Naye ya va na Hagari, naye ya vereka: na lwa ya lola u vereki, munene wewe ya legwa mtsimoni tsitsye. 5Na Sarai ya volera Abram, Lihyolo lyange li ve ku ive: nda ku ha mukana mutugwa wange, nokumbika mkiritu kikyo; na lwa ya lola u vereki, ndegwa mu tsimoni tsitsye: Yahova a kalage hagati hange nive. 6Navutswa Abram ya volera Sarai, Henza, mukana mutugwa wowo a veye mmakono gogo; u mu kolere kuli u lola bu veye bulahi. Na Sarai ya mu kupidza kivi, naye yiruka kutwula kuye.
7Na ingelosi wa Yahova ya mu nyola himbi nekisenukiru kya amadzi mwigendanyama, himbi kisenukiru kya madzi ku inzira ya Shur. 8Naye ya vola, Hagari, mutugwa wa Sarai, u twula haliki? Ka u tsitanga haliki Na ya vola, Nzirukanga kutwula ku munene wange, Sarai. 9Na ingelosi wa Yahova ya mu volera, Yirana ku munene wowo, wegehidze mmakono gege. 10Na ingelosi wa Yahova ya mu volera, Nda meda visukululwi vivyo ligali, vi vule kuvalidzwa ku bunyingi bwavyo. 11Kandi ingelosi wa Yahova ya mu volera, Henza ive u veye inda, na u livula mwana muyai; na u la mu gulika Ishmaeli, kigira Yahova u huliye lidambidzwa lilyo. 12Naye a la va kuli isukiri yomulitu hagati ha vandu, mukono gwigwe gu la hing'ana na vandu vosi na mukono gwa vandu vosi gu la hing'ana; naye; kandi a la menya imbiri wa vamwavo veve vosi. 13Na Hagari ya langa lieta lya Yahova wa volerana naye, Ive u veye Nyasaye u lolanga: kigira ya vola, Inze kali hano nda henza uyu u ndolanga? 14Kigira yaga kidaho yiki kya langwa Beerlahairoi; Henza, ki veye hagati ha Kadesh na Beredi.
15Na Hagari yivulira Abram mwana muyai: na Abram ya gulika mwana wewe, wa Hagari yivula Ishmaeli. 16Na Abram ya li wemihiga makumi gatano na gavaka, na gyitano na mulala, lwa Hagari yivulira Abram Ishmaeli.
Currently Selected:
Litanga 16: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967