Litanga 14
14
1Kunangwa mu madiku ga Amuraieli mwami wa Shinaru Arioku mwami wa Elasaru, Kedorilaomeri mwami wa Elam, na Tidali mwami wa Goiim; 2va kola lihe na Bera mwami wa Sodoma, na Birsha mwami wa Gomora, Shinabu mwami wa Adima, na Shemeberi mwami wa Zeboim, na mwami wa Bela (livola li veye Zoaru). 3Yava vosi va hambana halala mu livona lya Shidimi (li veye Inyanza Yomunyu). 4Vatumekira Kedorilaomeri mihiga likumi na gyiviri, na muhiga gwelikumi na gyivaka va mu tinguha. 5Muhiga gwelikumi na gyine Kedorilaomeri ya duka, na avami va li halala naye, na va guuta Varefaim mu Ashiterothukarinaim, na Vazuzim mu Ham, na Vaemi mu Shavekiriathaim, 6na Vahori mu kigulu kyavo Seiru, kuduka El-paran, li veye ku luvega lwekyangalangwi. 7Kandi virana ni va duka En-mishpat (li veye Kadesh), navo va guuta kivala kyosi kya Amaleki, nekya Vaamori, ava menya mu Hazazon-tamaru. 8Kandi mwami wa Sodoma na mwami wa Gomora, na mwami wa Zeboim, na mwami wa Adima, na mwami wa Bela (nalyo li veye Zoaru); na va kola ubulwani mu livona lya Sidimi; 9va lwane na Kedorilaomeri mwami wa Elam, na Tidali mwami wa Goim, na Amurafeli mwami wa Shinaru, na Arioku mwami wa Alasaru; avami vane va lwana na avami vatano. 10Kunangwa livona lya Sidimi lya li na malina manyingi gobudohi; na avami va Sodoma na Gomora viruka, navo va gwa yo, na ava tigala viruka kutsia mu kigulu. 11Navo va lanya vindu vyosi vya Sodoma na Gomora, nevyokulia vyavo vyosi, na va tsia. 12Na va hila Loti, mwana wamwavo wa Abram, wa li na a menya mu Sodoma, ne vindu vivye, ni va tsia.
13Kandi yadza mulala wa hononoka, na a volera Abram Muhebraina: ha ya menya himbi nemisala gya Mamre, Muamori, amwavo wa Esikoli, na amwavo wa Aneri; na vandu yava va li ni va koli lilagana na Abram. 14Na Abram lwa ya hulira amwavo wewe u gumeywi, ya hila avandu veve avegidzwa, avivulwa mu inyumba yeye, avandu tsimia tsivaka ne likumi na vatano na vabaka, na a va londerera kuduka Dan. 15Na rnbudiku ya gavula avandu veve kuvo, mwene na vatumekiri veve, na a va guuta, na a va kunga kuduka Hoba, li veye ku luvega lwo mukono mmosi ku Damasko. 16Kandi yirannya vindu vyosi, kandi yirannya amwavo wewe Loti, na vindu vivye, na vakali kandi, na avandu vosi.
17Na mwami wa Sodoma ya tsia kumwaganira, lwa yirana kutwula kwiita Kedorilaomeri na vami va li haiala naye, mu livona lya Shave (li veye Livona lyo Mwami). 18Na Melikizedeki mwami wa Salemi ya leta ubukima na iwaini: naye ya li musalisi wa Nyasaye U Veye Igulu ku Vyosi. 19Naye ya mu gasidza, na a vola, A gasidzwe Abram wa Nyasaye U Veye Igulu ku Vyosi, Mwene weligulu nelirova; 20na a gasidzwe Nyasaye U Veye Igulu ku Vyosi, u viki avasigu vovo mu makono gogo. Naye ya mu ha izaka ku vyosi. 21Na mwami wa Sodoma ya volera Abram, U mbe avandu, na ive mwene u vugule vindu vyosi. 22Na Abram ya volera mwami wa Sodoma, Inze rgingiye Yahova mukono gwange, Nyasaye u Veye Igulu ku Vyosi, Mwene weligulu ne lirova, 23kuvola, si nda vugula kali luvusi kinga rnugoye gwevilatu kinga ku vyosi vi veye vivyo, gase u la vola, Inze nkoli Abram kuva mutugi: 24ni ki ta li kya vasoleli va liye, na kidieli kya vandu ava li kutsia halala ninze, navo ni Aneri, na Esikoli, na Mamre; u leke va vugule kidieki kyavo.
Currently Selected:
Litanga 14: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967