Kutwula 26
26
1Kandi u la lomba lihema li ve netsingubo tsyokukinga likumiu tsi lombe ku ingubo yekatani indahi, na yeligondo lya iblue, na kiforosadi, na inzakanyu, halala na vakerubi vemiyinzi gyomusidza ligali. 2Butambi bwetsingubo sa indala bu la va ligera lyamakono makumi gaviri na gatano na gavaka, na bugalamu bwetsingubo sa indala bu la va ligera lyamakono gane: tsingubo tsyosi tsi la va tsyekigero kilala. 3Tsingubo tsitano tsi la hambannywa halala; na tsindi tsingubo tsitano tsi la hambannywa halala. 4Na u la lomba vyulu vya iblue ku luvega lwekiheri kyengubo indala ku lukigiti lwelisitwa lyayo; kandi u la lomba kuli ndiyo ku luvega lwekiheri kyengubo impereridzi ya kaviri. 5U la lomba vyulu makumi gatano ku ingubo indala, na vyulu makumi gatano ku luvega lwekiheri kyengubo yindi ya kaviri ya hambannywa; vyulu zana vi la henzana. 6Kandi u la lomba vibohero makumi gatano vyethahabu, nokuhambannya tsingubo halala nevibohero: na lihema li la va lilala.
7Kandi u la lomba tsingubo tsyo ubwoya bwetsimbuli tsi ve lihema igulu welihema lya ikatani: u la lomba tsingubo likumi na indala: 8ubutambi bwetsingubo sendala bu la va ligera lya makono makumi gavaka nobugalamu bwetsingubo sendala bu la va ligera lya makono gane: na tsingubo likumi na indala tsi la va tsyekigero kilala. 9Na u la hambannya tsingubo tsitano tsyene tsyeng'ine, na tsingubo tsitano na indala tsyene tsyeng'ine, na ingubo yetsitano na indala u la gi hinula imbiri welihema. 10Na u la lomba vyulu makumi gatano ku luvega lwekiheri kyengubo impereridzi, na vyulu makumi gatano ku kiheri kyengubo impereridzi yelihambannya lya kaviri. 11Na u la lomba vibohero amakumi gatano vyomugasa, nokuvika vibohero zana mu vyulu, nokuhambannya lihema li ve lilala. 12Na kidonye ki tigaye kyeleranga kyetsingubo kyelihema, kidonye ki tigaye, ki lerera ku luvega lwenyima welihema. 13Na ligera lyomukono mulala ku luvega lulala, na ligera lyomukono mulala ku lundi tsyobutambi bwetsingubo tsyelihema, tsi lerera mu mbalu mwelihema ku luvega yilu kandi ku luvega yilwo, tsi duke kulikinga. 14Kandi u la lomba kikuniko kyelihema kyetsingubo tsyamagondi makole tsyabuulwa irangi inzakanyu, na igulu walyo kikuniko kyetsingubo tsyelitsivi.
15Kandi u la lomba tsimbao tsyelihema tsyomusala gwe kikuma tsi singiranga. 16Butambi bwolubao bu la va ligera lyamakono likumi, na bugalamu bu la va ligera lyomukono ne kidonye. 17Lubao sa lulala lu la va nobwongiru buviri, bwokuhambannyirwa halala; u la lomba tsimbao tsyosi tsyelihema kuli ndiyo. 18U la lomba tsimbao tsyelihema, makumi gaviri ku luvega lwa kusini kuhenza kusini. 19Na u la lomba viduku makumi gane vyefetha isi wetsimbao makumi gaviri; viduku viviri isi wolubao lulala vyobwongiru bwalwo buviri, kandi viduku viriri isi wolubao lundi vyobwongiru bwalyo buviri: 20noku luvega lwakaviri lwelihema ku luvega lwa kasikasini tsimbao makumi gaviri, 21na viduku vyatsyo vyefetha makumi gane; viduku viviri isi wolubao lulala, na viduku viviri isi wolubao lundi. 22Na ku luvega lwenyima lwelihema lwemadioli u la lomba tsimbao tsitano na lulala. 23Na tsimbao tsiviri u la lombera tsikorna tsyelihema tsyenyima. 24Kandi tsi la bofwa halala isi, na tsi la bofwa halala igulu ku isonga ku imingiri indala: tsyombi tsiviri tsi la va ndiyo; tsi la va tsyetsikorna tsiviri. 25Na tsimbao tsi la va tsitano na tsivaka, na viduku vyatsyo vyefetha, vi ve likumi na vitano na lulala; viduku viviri isi wolubao lulala, na viduku viviri isi wolubao lundi.
26Kandi u la lomba tsimbohero tsyomusala gwe kikuma; tsimbohero tsitano tsyetsimbao ku luvega lulala lwelihema, 27na u la lombera tsimbao tsyoluvega lundi lwelihema tsimbohero tsitano, na tsimbohero tsitano tsyetsimbao tsyoluvega lwenyima lwelihema kuhenza madioli. 28Na lubohero lwa hagati lu veye hagati hetsimbao lu la duka ku kiheri yiki na kiheri yiki. 29Na u la handidza ithahabu ku tsimbao, na tsimingiri tsyokuvika mu tsimbohero u la lomba nethahabu: na u la handidza ku tsimbohero ithahabu. 30Na u la singeridza lihema kuli lifwana lyalyo lya wa mannywa mu kigulu.
31Na u la lomba ingubo yokukinga yeblue, na kiforosadi, na inzakanyu, na ikatani indahi; halala na vakerubi miyinzi gyomusidza ligali u la gi lomba: 32na u la gi sunga ku tsitiru tsine tsya musala gwe kikuma tsya handidzwa ku nethahabu; vibohero vyayo vine vi la va vyethahabu, mu viduku vine vyefetha. 33Na u la sunga ingubo yokukinga zana isi wevibohero, na u la leta lisanduku lyelilolekidza nokulivika mu inyima wengubo yokukinga: na ingubo yokukinga i la va kyokwavukanya hagati hobutakatifu na ha butakatifu hobutakatifu. 34Kandi u la vika intebe yetsimbabasi ku lisanduku yelilolekidza mu hatakatifu hobutakatifu. 35Na u la vika imeza imbiri wengubo yokukinga ku luvega lwekyova, na kinara kyetaya kuhenzana nemeza ku luvega lwelihema kukagata kusini: na u la vika imeza ku luvega lwekasikasini.
36Na u la lomba ingubo yomuliango gwa Lihema, ya iblue, na kiforosadi, na inzakanyu, na ikatani indahi, miyinzi gyomunavi musidza. 37Na u la lombera ingubo yomuliango, tsitiru tsitano tsyomusala gwe kikuma, nokuhandidza kutsyo ithahabu; na visunga vyatsyo vi la va vyethahabu: na u la tsi lombera viduku vyomugasa vitano.
Currently Selected:
Kutwula 26: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967