Kutwula 2
2
1Kunangwa mundu wenyumba ya Levi ya tsia na a vugula mukali ku avakana va Levi. 2Na mukali uyu ya vereka, na yivula mwana muyai: na lwa ya mu lola na a veye mwana mulahi, ya mu visa miyeli gyivaka. 3Na lwa ya vula kunyala kumuvisa kandi, ya mu vugulira akatu kelihunzu, na a ka vaka ubudohi ne irangi, na a vika mu mwana; na a ka veka mu lihunzu li veye ku luginga lwomugera. 4Na mbotso wewe ya singira ihale, a duke kumanya aga kolwa kuye. 5Na mukana wa Farao ya sulunguta ku mugera kwisinga; na avakana avatugwa veve va genda ku luginga lwomugera; naye ya lola akatu mu lihunzu, na a tuma mukana kukaleta. 6Na ya ka kunula, na a lola mwana: na, henza, mwana ya lira. Naye ya mu vererera, na a vola, Uyu nu mulala ku avana va Vahebraina. 7Kunangwa mbotso wewe ya volera mukana wa Farao, U yanza ntsie kulanga muleri mu avakali va Avahebraina, a duke kukunyunyira mwana? 8Na mukana wa Farao ya mu volera, Tsia. Na mukana ya tsia na a langa mama womwana zana. 9Na mukana wa Farao ya mu volera, U hile mwana uyu u tsie kunyunyira, na nda ku ha madanyi gogo. Na mukali ya vugula mwana, na a mu nyunya 10Na mwana ya viruka, naye ya mu leta ku mukana wa Farao, na ya gwa mwana wewe. Naye ya mu gulika Musa, na a vola, Kigira nda mu twulidza mu madzi.
11Kunangwa mu madiku yago, Musa lwa ya duka kuva mukulundu, ya twula na a tsia ku avamwavo veve, na a henza misigo gyavo: naye ya lola Muegepeti a kuyanga Muhebraina, mulala ku avamwavo veve. 12Naye ya henza yiyi na yiyi, na lwa ya lola si ha li nomundu, yiita Muegepeti na a mu visa mu muyeke. 13Na ya twula kandi lidiku lya kaviri, na henza, avandu vaviri ku Avahebraina va kupananga: naye ya volera uyu wa tindiranga wakye, Kigira ki u duyanga wakyo? 14Naye ya tivula, Ni bwaha wa ku vika kuva mwami na mukalagi ku kwinye? U ganagana kunziita, kuli wa li kwiita Muegepeti? Na Musa ya tia, na a vola, Nkani inkuva yiyi i manyekani ligali. 15Na lwa Farao ya hulira inkuva yiyi, yenya kwiita Musa. Navutswa Musa yiruka kutwula imbiri wa Farao, na a menya mu kivala kya Midiani: naye yikala hasi himbi nekidaho.
16Na musalisi wa Midiani ya li na avakana vatano na vaviri: navo vadza kudaha amadzi, nokwizulitsa milinga kunwehidza kyayo kya dada wavo. 17Na avayi vadza ni va va kunga; navutswa Musa ya singira na a va konya, na a nwehidza kyayo kyavo. 18Na lwa va duka ku Reueli dada wavo, ya vola, Mwa li ndi ni mu duka bwangu lero? 19Navo va vola, Muegepeti ya ku twulidza mu makono ga avayi, kandi ya ku dahira amadzi, nokunwehidza kyayo. 20Naye ya teva avakana veve, na a vola, A veye haliha? Kigira ki mu leki mundu uyu? Mu mlange a lie vyokulia. 21Na Musa ya manya, na a menya halala na mundu uyu: na ya ha Musa Zipora mukana wewe. 22Naye yivula mwana muyai, na ya mu gulika Gerishom; kigira ya vola, Mbeye mumenya mu kivala kyobumenya.
23Kunangwa inyima wa madiku yago manyingi, mwami wa Egepeti ya kudza: na avana va Israeli va kenva kigira ubutugwa, na va lira na lilira lyavo lya duka imbiri wa Nyasaye kigira ubutugwa. 24Na Nyasaye ya hulira likenya lyavo, na Nyasaye yidzulitsa lilagana lilye lya ya kola na Abrahamu, na Isaka, na Yakobo. 25Na Nyasaye ya lola avana va Israeli, na Nyasaye ya va manya.
Currently Selected:
Kutwula 2: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967