Kutwula 14
14
1Na Yahova ya volera Musa, na a vola, 2U volere avana va Israeli, virane kulomba hokusosa havo imbiri wa Pi-hahirothu, hagati ha Migidoli nenyanza, imbiri wa Baal-zefon: mu la lomba hokusosa henyu imbiri wa ha zana himbi nenyanza. 3Na Farao a la vola ku avana va Israeli, Va hambeywi mu kivala, ligendinyama li vigaliye. 4Na inze nda dinyiridza mwoyo gwa Farao, naye a la va londerera; na nda nyola liidzominywa ku Farao, noku lihe lilye; na Avaegepeti va la manya, inze mbeye Yahova. Na va kola ndiyo. 5Na mwami wa Egepeti ya volerwa, avandu viruki: na mwoyo gwa Farao nogwavatumekiri veve gwa girunkanywa ku avandu, ni va vola, Ni kinduki kya kwa kola, ku lileka Israeli va tsie, va vule kukutumekira? 6Naye ya lomba ligari lilye lyelihe, na a hila avandu veve halala naye: 7na a vugula magari ga tovolwa tsimia tsitano na indala, na magari gosi ga Egepeti, na vanyampara kugo gosi. 8Na Yahova ya dinyiridza mwoyo gwa Farao mwami wa Egepeti, naye ya londerera avana va Israeli: kigira avana va Israeli va twula nomukono gwetsingulu. 9Na Avaegepeti va va londerera, tsiparasi tsyosi, na magari gelihe ga Farao, na avanina ku tsiparasi, na lihe lilye, navo va va nyolera mu lisosa lyavo himbi nenyanza, himbi na Pi-hahirothu, imbiri wa Baal-zefon.
10Kunangwa lwa Farao yisunda himbi, avana va Israeli va ginga tsimoni tsyavo, na henza, Avaegepeti va va londerera; navo va tia ligali: na avana va Israeli vanira Yahova. 11Na va volera Musa, U ku twulidzi mu kivala ku kudzire migendinyama, kigira vilindwa si vi veye mu Egepeti? Kigira ki u ku i koleye yaga, kukutwulidza mu Egepeti? 12Yili si li veye likuva lya kwa ku volera mu Egepeti, ni ku vola, U ku leke, ku tumekire Avaegepeti? Kigira nu bulahi kutumekira Avaegepeti, kuvita likudzira mwigendinvama. 13Na Musa ya volera avandu, Mu ta tia mba, mu singire, na mu lole ubuhonyi bwa Yahova, bwa a li kolera mwinye lero: kigira Avaegepeti va mu lolanga lero, si mu la va lola kandi mihiga nemihiga. 14Yahova a la mu lwanira, na mwinye mu la kiring'ana.
15Na Yahova ya volera Musa, Kigira ki waniranga inze? U volere avana va Israeli, va tsie imbiri. 16Na ive u ginge impimbo yoyo, nokunyira mukono gugwo ku inyanza, u gyavukanye: na avana va Israeli va lingira hagati henyanza ku lirova liumu. 17Na inze nda dinyiridza myoyo gya Avaegepeti, navo va lingira inyima wavo, na inze nda nyola lidzominywa ku Farao, noku lihe lyosi, noku magari gelihe gege, noku avetsiparasi veve. 18Na Avaegepeti va la manya Mbeye Yahova, lwa mmali kunyola lidzominywa ku Farao, noku magari gelihe gege, noku avetsiparasi veve. 19Kandi ingelosi wa Nyasaye ya vimirira imbiri welihe lya Israeli, ya twula yo ni yirana inyima wavo; na munara gwelilesi gwa twula imbiri wavo, nokusingira inyima wavo; 20nagwo gwa li hagati helihe lya Egepeti na lihe lya Israeli; na lya li ho lilesi na kisundi, navutswa lya kola ubulavu mu budiku: na lilala si lyesunda himbi na lindi mba ubudiku bwosi.
21Na Musa ya nyira mukono gwigwe ku inyanza; na Yahova ya kola inyanza kwirana inyima nembuudza yetsingulu itwula ivugwe ubudiku bwosi, na ya kola inyanza kuva kivala kiumu, na amadzi gavukanywa. 22Na avana va Israeli vingira mu inyanza ku kivala kiumu: na amadzi ga li madigi kuvo ku mukono mulungi, noku mukono mmosi. 23Na Avaegepeti va va londerera, ni vingira mu inyanza inyima wavo hagati henyanza, tsiparasi tsyosi tsya Farao, amagari gege, na avetsiparasi veve. 24Kunangwa mu lilinda lya mugamba, Yahova, mmunara gwomuliru na lilesi, ya henza na a lolera lihe lya Avaegepeti, na a dambidza lihe lya Avaegepeti. 25Na ya twulidza tsingida tsyamagari gavo, ni ga gendidzwa nobudinyu; kuduka Avaegepeti va vola, Kwiruke kutwula imbiri wa Israeli; kigira Yanova a va lwanira ku Avaegepeti.
26Kandi Yahova ya volera Musa, Nyira mukono gugwo ku inyanza, amadzi girane ku Avaegepeti, ku magari gavo gelihe, noku avetsiparasi vavo. 27Na Musa ya nyira nukono gwigwe ku inyanza, na lwa bwa kya inyanza yirana ku tsingulu tsyayo tsya kazozo; na Avaegepeti va giruka; na Yahova ya vungulula Avaegepeti mu inyanza. 28Na amadzi girana, na ga kunika magari gelihe, na avetsiparasi, kali lihe lyosi lya Farao lya va londerera mu inyanza; si ya tigala kali mulala kuvo. 29Navutswa avana va Israeli va genda ku lirova liumu mu inyanza; na amadzi ga li madigi kuvo, ku mukono mulungi, noku mukono mmosi. 30Na ndiyo Yahova ya honya Israeli ku lidiku yilyo ku mukono gwa Avaegepeti; na Israeli va lola Avaegepeti avakudzu ku luginga lwenyanza. 31Na Israeli va lola miyinzi minene gya Yahova ya kola ku Avaegepeti, na avandu va tia Yahova: na va suuvira Yahova, na mutumekiri wewe Musa.
Currently Selected:
Kutwula 14: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967