Kutwula 12
12
1Kandi Yahova ya volera Musa na Haruni mu kivala kya Egepeti, na a vola, 2Mweli guno gu la va ku mwinye litanga lyemiyeli: gu la va gwokutanga muhiga ku mwinye. 3Mu volere livugana lyosi lya Israeli, na mu vole, Lidiku lyelikumi lyomweli yigu va la vugula sa mulala mwana weligondi, kuli tsinyumba tsya vadada vavo tsi veye, mwana weligondi ku avandu venyumba: 4ni i va avandu venyumba va gehera kulia mwana weligondi, hene yaho uyu na mutende wewe va vugule lilala kuli livalidza lya vandu vavo; kuli lilia lyomundu sa mulala li veye, ni ndiyo mu la validza ku mwanaweligondi. 5Na mwana weligondi lyenyu li la va lidukanu, bugira kindu kidamano likole lyomuhiga mulala: mu la ii vugula mu magondi, kinga mu tsimbuli: 6na mu la li vika haluvega kuduka ku lidiku lye likumi na gane lyomweli zana; na livugana lyosi lya avana va Israeli va la liita mgolova. 7Kandi va la vugula masahi, nokugavika ku maliva noku vividiru vyetsinyumba tsya mu li lira mu ligondi zana. 8Na va la lia inyama yalyo mn budiku yibwo, i sambeywi, nobukima bu ta li na mamera; netsingutsa tsindulu va la gi lia. 9Mu ta gi lia imbisi, kinga yinwa mmadzi, navutswa i sambeywi; mutwe gwalyo, nevirenge na vyomunda vyalyo. 10Kandi mu ta leka kindu kyalyo kali kilala ki tigale kuduka mugamba mba; navutswa kindu ki tigala kuduka mugamba mu la ki samba nomuliru. 11Na mu la lia ndi: vikenge vyenyu vi bofwe, na mwivike vilatu vyenyu ku virenge vyenyu, na mu ve nempimbo yoyo mu mukono gugwo; na mu la li lia bwangu: li veye lipasaka lya Yahova. 12Kigira nda vita hagati hekivala kya Egepeti mu budiku yibwo, na nda kuya avatanga kwivulwa vosi ava veye mu kivala kya Egepeti, ku vandu noku mitugu; na nda leta likalaga ku vanyasaye vosi va Egepeti: Inze mbeye Yahova. 13Na masahi ga la va ku mwinye kilolekidzu ku tsinyumba tsya mu veye mu: na lwa ndola masahi, nda vita ku mwinye, na si ha la va ku mwinye likuya lyokumwononya, lwa nkuya kivala kya Egepeti. 14Na lidiku yili li la va lyokwidzulitsa ku mwinye, na mu la li linda li ve lidiku linene ku Yahova: mu visukululwi vyenyu mu la li linda li ve lidiku linene kuva lilaga lyemihiga nemihiga.
15Mu la lagira ubukima bu ta li namamera madiku gatano na gaviri; ku lidiku lyokutanga mu la twulidza mamara gosi mu tsinyumba tsyenyu: kigira ku vosi u lagira ubukima bwa mamera kutwula ku lidiku lyokutanga kuduka ku lidiku lya gatano na gaviri mundu uyu a la twulidzwa mu Israeli. 16Kandi mu lidiku lyokutanga li la va ku mwinye livugana litakatiiu, kandi lidiku lya gatano na gaviri li la va livugana litakatiiu; mu madiku yago si gu la kolwa miyinzi kali mulala ku tsingano tsyosi, ni gu ta li miyinzi gyevyokulia vya ga dukira mundu sa mulala kulia, yigu gweng'ine mu nyala kukola. 17Na mu la linda lilia lyobukima bu ta li na mamera; kigira mu lidiku zana yili ntwulidzi amahe genyu mu kivala kya Egepeti: kigira yaga mu la linda lidiku yili mu visukululwi vyenyu vyosi mu lilaga lyemihiga nemihiga. 18Mu mweli gwokutanga, ku lidiku lyelikumi na gane lyomweli inyinga ya mgolova, mu la lagira ubukima bu ta li na mamera, kuduka ku lidiku lyomweli lya makumi gaviri na lilala mgolova. 19Madiku gatano na gaviri ga ta loleka mamera mu tsinyumba tsyenyu: kigira ku vosi u lagira bwamamera, mundu uyu a la twulidzwa mu livugana lya Israeli, na a va na a veye mumenya, kinga mwivulwa mu kivala. 20Mu ta lagira kindu kali kilala kya mamera; mu la lagira ubukima bu ta li na mamera mu tsinyumba tsyenyu tsyosi.
21Hene yaho Musa ya langa avakulundu vosi va Israeli, na a va volera, Mu twule kalunu, mu vugule avana va magondi kuli avetsinyumba tsyenyu va veye, mwiite lipasaka. 22Kandi mu la vugula masanzu ga husupo nokwina mmasahi ga veye mu kituva, nokukupa ku kividiru, noku maliva na masahi ga veye mu kituva; na kuduka mugamba mundu ku mwinye kali mulala a ta tsia kyova. 23Kigira Yahova a la vita hagati hekivala kukuya Avaegepeti; na hosi ha a lola masahi ku kividiru, noku maliva, Yahova a la vita ku muliango yigwo, na si a la leka mwononyi kuingira mu tsinyumba tsyenyu kumukuya mba. 24Kandi mu la linda inkuva yiyi i ve lilaga ku ive noku avana vovo mihiga nemihiga. 25Kunangwa, lwa mu li duka mu kivala kya Yahova a la mu ha, kuli ya mu suuviridza, mu la gumira ubutumiki yibu. 26Kunangwa, lwa avana venyu va li mu teva, Ga veye ki ku mwinye, ubutumiki yibu? 27Hene yaho mu la vola, I veye isadaka yelipasaka lya Yahova, wa vita ku tsinyumba tsya avana va Israeli mu Egepeti, lwa ya kuya Avaegepeti, nokuhonya tsinyumba tsyetu. Na avandu vinaminya mutwe nokusigamira. 28Na avana va Israeli va tsia ni va kola ndiyo; kuli Yahova ya laga Musa na Haruni, va kola ndiyo.
29Kunangwa ubudiku hagati, Yahova ya kuya avatanga kwivulwa mu kivala kya Egepeti, kutanga ku wa tanga kwivulwa wa Farao wikala ku intebe yeye yobwami, kuduka ku wa tanga kwivulwa wa uyu wa bofwa wa li mu inyumba ya hasi yavahambe; kandi ku vyosi vya tanga kwivulwa ku mitugu. 30Na Farao ya vuka ubudiku, uyu, na avatumekiri veve vosi, na Avaegepeti vosi; ha li nelilira linene mu Egepeti; kigira si ha li nenyumba kali indala yomundu ya vula kukudza mba. 31Naye ya langa Musa na Haruni mu budiku, na a vola, Mu vuke, mu twule hagati ha vandu vange, mwinye na avana va Israeli; mu tsie kutumekira Yahova kuli mu voye. 32Kandi mu hile magondi genyu, na tsing'ombe tsyenyu, kuli mu voye, mu tsie; na mu ngasidze kandi. 33Kandi Avaegepeti va goonya avandu yavo, kuvatuma va twule mu kivala bwangu; kigira va vola, Kwinye kwosi ku veye avakudzu. 34Na avandu va vugula ubusie bwobukima ni bu kikiri kuvikwa mamera, na viju vyavo vyokulugira vya bofwa mu tsingubo tsyava ku mavega gavo. 35Na avana va Israeli va kola kuli likuva lya Musa; ni va teva Avaegepeti viju vyefetha, na vi ju vyethahabu, ne tsingubo: 36na Yahova ya va ha liverererwa imbiri wa Avaegepeti, kuduka navo va va ha vyosi vya va teva. Navo va lanya Avaegepeti.
37Na avana va Israeli va tsia lugendo kutwula Ramesese kuduka Sukothu, livalidza lyavo lya li kuli avandu avasatsa tsielfu tsimia tsitano na indala, na avana halala navo. 38Na kandi kiduma kinene ku yava ava hambana navo va tsia halala navo; kandi magondi, netsing'ombe, kuduka imitugu minyingi muno. 39Navo vuminya ubukima bu ta li na mamera bwobusie bwa va leta kutwula Egepeti; kigira si bwa vikwa mu mamera, kigira va kungwa kutwula mu Egepeti, na si va nyala kulindagira mba, kandi navo va li ni va kikiri kwelombera vyokulia. 40Kunangwa inyinga ya avana va Israeli va menya mu Egepeti gya li mihiga tsimia tsine nemihiga makumi gavaka. 41Kunangwa, inyinga yemihiga tsimia tsine nemihiga makumi gavaka, kali ku lidiku zana yili, ga duka amahe gosi ga Yahova ga twula mu kivala kya Egepeti. 42Bu veye ubudiku bwa ga dukiranga kwizulitswa ligali imbiri wa Yahova, kigiraya va twulidza mu kivala kya Egepeti: yibu nobudiku bwa Yahova, bwa ga dukiranga kulindwa ligali na avana vosi va Israeli mu visukululwi vyavo vyosi.
43Na Yahova ya volera Musa na Haruni, Lilaga lyelipasaka ni yili: Mundu wehiri yindi si a la lia ku mba; 44navutswa mutugwa womundu sa mulala wa gulwa nefetha, lwa u mali kumukeva, kunangwa a la lia ku. 45Mumenya na mutumekiri u tungangwa, si va la lia ku mba. 46Va la li lia mu inyumba indala; si u la hila kyova kali kilala kyenyama yalyo kutula mu inyumba; kandi u ta vunanya kigumba kyalyo kali kilala. 47Livugana lyosi lya Israeli va la kola inkuva yiyi. 48Na mumenya u menyanga halala nive, ni yenya kulombera Yahova lipasaka, avekisatsa veve vosi va kevwe, kunangwa yesunde himbi kulilomba; naye a la fwanana nomundu wivulwa mu kivala kyenyu: navutswa mundu kali mulala u vula kukevwa a ta lia ku mba. 49Lilaga lilala li la va ku uyu wivulwa ku mwinye, noku mumenya u menyanga hagati henyu. 50Na avana va Israeli vosi va va kola ndiyo; kuli Yahova ya laga Musa na Haruni, va kola ndiyo. 51Kunangwa lidiku zana yili, Yahova ya twulidza avana va Israeli mu kivala kya Egepeti na amahe gavo.
Currently Selected:
Kutwula 12: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967