MATIUS 4
4
Iblis nen Yesus endawimo kagaligeluk oba waga lagaikhe wene
(Mrk. 1:12-13; Luk. 4:1-13)
1Ima pelakfesikhemo re, Yesus Iblis nen obabut paluageluk he, Allah Areagun en waluk o leimo afuni le'ma andoma lagaikhe.#Ibr. 2:18, 4:15 2Andoma fei lagaikhemo logolik he, o hubagik, o wei igik, ugu kwelek enggi 40 hari sumburu ninggi'lek weat welagaikhe andi nen he, sumburu nele agaikhe. 3A'nogo nele were'ma re, at Iblis inendawimo kagalik nikherek mene a'nogo oba wagaikhesik he, ”Hat eberogoat Allah amlogo halok he, helep yoma sumburu roti mene hilinglasuagen yagasin o,” iluk, yagatikhemo, 4at Yesus nen he, ”Allah nen ikhi logolik he: Afuni sumburu nek ninggi logolik ineluk mondok welagaikharek lego. An nane igirek mene andi mondogat wanhu halok, ineluk mondok logogun o, iluk isikhemo lisu palogo fesukwama werego,” iluk yagatikhe.#Ul. 8:3
5Yagatikhemo re, hobuk at Iblis nen Yesus waluk, o Allah onggwarek awi sili hokhoma lagaikhesik he, o Allah awi o tum uan-awan wuri'mo waluk lagasikhesik, 6mel yagatikhe:
”At Allah nen:
Hat heisok helep oba temukhogo
waranogo iluk,
an nagoromi malaikat pogoroba
yonggo pelakfisa wagirek mene
omanogo nen inenggi talek oba
wokhabuagen yagaisagain o, iluk isikhemo lisu palek werek andi, hat eberogoat Allah amlogo halok, pok harogo maroma pin,” iluk yagatikhe.#Mzm. 91:11-12
7Yagatikhemo, at Yesus nen he,
”Allah nen ikhi logolik,
Hiren he, an hineisena Allah
Nenupogot nanini werega?
Lega, iluk nobabut palugun
mondok lego, iluk isikhemo lisu palogo fesukwama weregaro,” iluk yagatikhe.#Ul. 6:16
8A'nogo yagatikhemo re, hobuk at Iblis nen Yesus waluk tom hokho uan mene oba lagasikhesik he, o kweangma yi awi ti awi ap kaindek inenupogoren ferinarek welagaikharekwe lombok mondogat, yi mene ti mene hokhorogo were'ma eilenggen yethoageluk yagati logolik he, 9”Yesus. Hat heindep awi yagaisogo nawe a'ma kwi wesimbik fogetnabigin halok, heilenggen yethegen mene aroma mondogat felelenghogo hat wokhesigin o,” iluk yagatikhemo re, 10at Yesus nen he, ”Hat Iblis yi lan o. Allah nen ikhi logolik he: Hiren he, hineisena Allah Nenupogot Anat hineindep awi yagaisogo nawe a'ma kwi wesimbik fogetnafi logolik he, an faget enek hilingiti logoino o, isikhemo lisu palogo fesukwama werego,” iluk yagatikhe.#Ul. 6:13 11A'nogo yagatikhemo re, Iblis a'nogo Yesus herakfisaluk lagaikhemo re, malaikat pogoroba nen Yesus oba pi wagaukwasik he, kwalogo welagaukwa.
At Yesus o Galilea lagai wagaikhesik hilingiti lagaikhe wene
(Mrk. 1:14-15; Luk. 4:14-15)
12”At Yohanes a'nogo enggi hele wathama,” iluk isukwama, at Yesus esanggo holhikhesik he, o Galilea lagai wagaikhe.#Mat. 14:3; Mrk. 6:17; Luk. 3:19-20 13Lagai wagaikhesik, o sili Nasaret a'nogo herakfisaluk he, o kota Kapernaum i Galilea yenggelek esanggoma, it ap inunggulenu Zebulon mene inom, Naftali mene inom, inaiba andoma logoigeluk lagai wagaikhe.#Yoh. 2:12 14Lagai wagaikhe andi re, at Yesaya Allah ane yagaisikhi lagaikhe mene a'nogo nen lisu palhi logolik he,
15”Hit ap hinunggulenu Zebulon
mene inom, Naftali mene inom,
hinaiba i Yordan aik elikwe
wurik mene inom,
i mogwe hokho yenggele'ma
pagarekwe wurik mene inom,
hinaiba o Galilea tonggwe yoma re,
it ap endakwe mene nen sebelek
werek yoma sani.#Yes. 9:1-2
16O mum oba welagep mene andi,
o seleget hinabigin mene hokho mene
ekhe hegebo.
Hit o andoma wa'lasuogeluk hinoba
mum asumo, seleget hinabigin mene
ekhe waga andi o,” isikhe a'nogo higithogoat hilinglasuageluk Yesus andoma lagai wagaikhe andi.
17Lagai wagaikhesik logolik, huli andi huli nen, afuni andoma yagaisikhi logolik he, ”O Allah awe a'ma hinobagagin mene a'nogo yogondak arat horogasi waga o. Halok he, weak hilingiti lagep mene herakfisaluk hinobabut hebela'ni o,” iluk yagaisilik nikhi lagaikhe.#Mat. 3:2
Yesus nen agoromi inebe enggaminogo ikan wanhunem inayonggo fesikhe wene
(Mrk. 1:16-20; Luk. 5:1-11)
18At Yesus i Galilea yenggele'ma esanggokwe laga logolik he, ap inebe pire, Simon enu ekhe Petrus ikhi lago a'nogo agot Andreas emberek hundik-handik ikan at wanhi lagaukwa andi nen he, andi sambul ikan wanuogeluk, su ikan su ima pelafunem eilenggen yerisasikhe. 19Yerisasikhesik he, ”Ikan wanhi lagep andi hak, afuni a'nogoat woginabik nikhi logobagaigen he, yagahisagen nombo'ne we'ni o,” iluk yagaisasikhemo re, 20aremnogoat inasu ikan su andoma herakfisaluk at ombo'ne lagaukwa. 21Lagaukwama, at Yesus eilenggen yethasikhe hak he, ap inebe pire Zebedeus againafuri Yakobus agot Yohanes emberek ineisena inom, e so elema logolik, su ikan wanharek mene seleben etunem yerisasikhesik he, wolisasikhe. 22Wolisasikhemo re, e so a'nogo inom, ineisena Zebedeus a'nogo inom, aremnogoat fisaluk, it Yesus ombo'neat lagaukwa.
At Yesus nen wene yagaisigik, ou weak mene higirinafik, ikhi lagaikhe wene
(Luk. 6:17-19)
23Lagaukwama re, at Yesus o Galilea tonggwe olokwe lombok andoma nikhi logolik, afuni Yahudi mene samban agarek oba kwisikhesik he, wene fano wene hobuk nineisena Enupogot awe a'ma ninobagagin wene a'nogo yagaisigik, yi ou ti ou fano higirinafik, ikhi lagaikhe.#Mat. 9:35; Mrk. 1:39 24A'nogo higirinabik nugunem, abok o Siria andoma mondok sak isikhemo re, yi ou ti ou, yi hat ti hat inoba werek mene inom, munggwarengge obabut weak mene inendawimo kwisukwasik inebe lugulugwi palharek mene inom, wa'lagik ineluk agik agarek mene inom, inenggi ineisok wut warek mene inom, oba woginarek wagunem fano higirinafi lagaikhe. 25A'nogo higirinafu kwelek he, afuni mondogat o Galilea nen, o sili hokho mene 10 nen andoma nen, Yerusalem en, Yudea nen, i Yordan aik elikwe andoma nen, inebe mondok hokhorogo wagaukwasik he, Yesus ombo'ne nikhi lagaukwa.
Currently Selected:
MATIUS 4: inohap
Highlight
Share
Copy
Want to have your highlights saved across all your devices? Sign up or sign in