MATIUS 3
3
Yohanes ima pelaginafi lagaikhe mene a'nogo nen hilingiti lagaikhe wene
(Mrk. 1:1-8; Luk. 3:1-18; Yoh. 1:19-28)
1A'nogo hilingitukwasik oba nen he, at Yohanes ima pelaginafi lagaikhe mene a'nogo, o Yudea tonggwe leimo afuni le'ma andoma wagaikhesik wene yagaisikhi logolik, yi'nogo ikhi lagaikhe: 2”Kain pogoroba mene awe a'ma hinobagagin oba a'nogo yogondak arat horok asi waga. Halok he, weak hilingiti lagep mene herakfisaluk hinobabut hebela'ni o,” iluk yagaisikhi lagaikhe.#Mat. 4:17; Mrk. 1:15
3Andi ikhi lagaikhe andi re, at Yesaya Allah ane yagaisikhi lagaikhe mene a'nogo nen yagaisikhi logolik he,
”Ap ekhe o leimo afuni le'ma andoma
ane ngai eti logolik he,
Eiga! Ninoe Enupogot wesigin kwe,
kwe fanorogo tegelhik, kwanirek mene
higithogo yatik, ikhi logoni o,
iluk wolisili'logo,”
iluk Yesaya nen ikhi lagaikhe a'nogo, at Yohanes ebeat wagaikhe andi.#Yes. 40:3
4Wagaikhesik, leimo afuni le'ma andoma logolik, wam unta esi mene igisogo re, asu laberigik, agap mene nonggologo fanorogo hilingisogo re, alinggin ikhigik, ikhi logolik sumburu na hak he, pulue mene ninggik, kin amusu enggama mene ninggik, ikhi lagaikhe.#2Raj. 1:8 5A'nogo were'ma re, it afuni o kota Yerusalem mene inebe hokhorogo inom, o Yudea tonggwe ekhe mondogaren inom, i Yordan esanggokwe welagaukwa mene inebe felelenghogo, at oba andogosi waga lagaukwa. 6We'luk he, yi weak ti weak hilingiti lagaukwa mene fakhogo herakfisugunem, i Yordan ima pelaginafi lagaikhe.
7A'nogo hilingitu were'ma, it ap Farisi mene fenakwe inom, ap Saduki mene fenakwe inom, inebe hokhorogoat ima pelaginabuageluk he, at oba wagunem yi'nogo yagaisikhi lagaikhe: ”Hit kisu nen tagongge mene yoma sani! Hit he, Allah a'mage hokhorogo lagagin a'nogo hinoba fugunem heise elok logoin iluk sa nen yagahisikhemo. Elo'lego.#Mat. 12:34, 23:33 8Halok he, hinendawimo ebetfuluk, weak hilingiti lagep mene andi herakfisaluk, hinobabut hebela'luk hilingisu meneat higithogo hilingiti logoino o. 9An nen he, at Allah nen Abraham amlogomi higit hilinglasuageluk helep yi mene higit hilingisu hagaro, iluk yagahisigi andi nen, hit hinendawimo nen he, Abraham andi nit nineisena, iluk anggagubo.#Yoh. 8:33 10E ero lombok enggen fano mene iti'lek halok, mugusogo endumo lakfisageluk posie e omanggen oba lego werego,” iluk yagaisasikhe.#Mat. 7:19 11A'nogo yagaisasikhesik ekhe mel yagaisasikhe: ”Hit weak hilingiti lagep mene herakfisaluk hinobabut eberogoat hebelaga iluk, an nebe yenggerek nomame lek mene nen we ima pelakhinafi lagi. Mene re, at kain omame hokho mene hobuk wesigin o. At ebe kain omame hokho andi nen he, an nebe yenggerek mene nen eisok sepatu kwelabek mene waluk la re elo'legat. Aren ima pelakhinabu hak, Allah Areagun inom, endu inom, hinoba pelakfei wesigin o. 12Gandum enggen folugun mene faget garpu hangge meneba fologo lakfagain mene at eisewerek mene enggimo werek andi. Tegeligin oba higit asi waga halok, fano mene halok, tegelogo fikherek oba fanoma figik, afulfulengge mene halok endu nagulagarek le'ma a'nogoba lakfisigik, igin o,” iluk yagaisasikhe.
Yohanes nen Yesus ima pelakfesikhe wene
(Mrk. 1:9-11; Luk. 3:21-22)
13Yohanes nen wene a'nogo yagaisugu were'ma, at Yesus ima pelaknabuageluk o Galilea nen i Yordan esanggoma were'ma oba lagaikhemo re, 14aren he, ”An nen ima pelakhabigin elo'lego. Haren an ima pelaknabu meneat he, an noba wagen yoma ri!” iluk yagatikhe. 15Yagatikhemo re, at Yesus nen he, ”An pelaknabigin aro. At Allah nenat yi mene ti mene faget a'nogo hilingisuageluk anggikherek higithogoat hilingnabigin o,” iluk isikhemo re, ”I o,” iluk 16ima pelakfesikhemo re, yegelogo lagai wesigin ha'ma re, pogot healogo Allah Areagun sue pel hangge oba labok i pi wagunem eilenggen hasikhe. 17Labok i pi wagaikhemo re, Allah ane pogoroba nen, ”Yi An Namlogo, nendawinggen hundik mene. Noba liok ikhe o,” iluk ane pelakfei wagaikhe.#Kej. 22:2; Mzm. 2:7; Yes. 42:1; Mat. 12:18, 17:5; Mrk. 1:11; Luk. 9:35
Currently Selected:
MATIUS 3: inohap
Highlight
Share
Copy
Want to have your highlights saved across all your devices? Sign up or sign in