MALEAKHI 3
3
1A'nogo ikhi lagepma re At Tuhan Omame Mondok Hokho welagarek mene a'nogo nen wene onggo ikhe, ”An nanggwe fanorogo yati logouwageluk, An namingmingengge ekhe lakfei wesumo re, we ferekhogoat hiren An hera'nafi lagep mene Tuhan a'nogo An nawi wuri'mo andoma wesigin o. Ap an nen lakfei wesigin mene faget hiren hinendawimo eberek mondok welagep mene a'nogo wesimbik he, An nen wene wathisasigi mene andi fakhogo yagaisikhi logogin o,” iluk yagaisasikhe.#Mat. 11:10; Mrk. 1:2; Luk. 1:76, 7:27
2Oba nen he ap sa hagen linggene Tuhan weinam asi wesigin oba andi hambuget haluk logou hak nogo? At ebere ap posiemanggen endu oba weragaisogo wurik asuageluk fano pugunhogo obabut palharek andi hakhogo inom, nen it sabun wurikhogo hilingitarek andi hakhogo inom hilingik logogin.#Yl. 2:11; Why. 6:17 3Aren it a'nogo ayo wurogo hilinginabi waga logolik he, aben perak endu oba elokhe pugunhogo hilingitarek hak hilingisigin. Nen, afuni nen logam meneba emas inom perak inom endu oba elokhe pugunhogo hilingitarek hak Tuhan nen yonggo lakfei wesigin mene andi re, it imam omanogo nen Tuhan obaget wam yi mene ti mene warogo noletu mene omanogo At endawimo anggikherek higithogo fikhi logouwageluk pugunet fisagain. 4A'nogo hilingitunem o attak hilingiti lagaukwa hakhogo re, Tuhan nen it afuni Yehuda mene inom, Yerusalem mene inomen wam yi mene ti mene nolhi logogun mene andoma re endawimo fano aga logogin.
5At Tuhan Omame Mondok Hokho mene a'nogo nen ikhi logolik, ”An hobuk wesigin andi re hit wene hinoba figik kotik igiluk wesigin o. An he afuni hareise higirinafarek mene inom, pailak hilingitarek mene inom, ineranhogo wene fagetharek mene inom, ap yabu hilingitu mene faget onggo wogisikhi logolik henarogo hilingitarek mene inom, nen, hemi sogwe hea, yenggerugwi suarek mene hea, afuni pok mene hea inenggi omameba sebelinarek welagaikharek mene inom, it afuni An agaugwet nobagagi'lek hilingitarek mene inom mondogat ineilhanem it hilingiri'lagwi mene andoma An neilenggen kwelaginarek logogin nen. weak-weak wesigin o,” iluk yagaisasikhe.
Inenggi wenakhaluk 10 ba asi lagu halok, 9 hit aga logolik misik andi An nobaget fugunogo isikhe wene
6At Tuhan nen ikhi logolik, ”An nebe agam itirek lek mene o, Tuhan a'nogo nebe re An aro. Andiba re, hit Yakub en tagomangge mene andoma weaget hinobagakhi lagi lek andi. 7Hit inombawi nen attak hilingiti lagaukwa hak, hit mondogaren ogore, An nawene melalek a'nogoba nen taganet fuluk tiphogo hilingiti'legengge hilingiti lagep andi.
Hit he sugulogo an nambit we'ni o, wesugun halok An ogo, hit hinambit sugulogo wesigin. Oba nen he, hiren heinok wo'niikhi logolik, ’Nit sugulogo At ambit louwogeluk he, niren ninggi'nogo hilingisugun nogo?’ ikhi lagepma re, 8yogondak he, An nen hit heinok wokhisak: Afuni nen he Allah lalu hak nogo? Eberogo nen he lalu lek hago. Oba nen he, hiren An lalnafi lagep andi. Hiren heinok wo'niikhi logolik, ’Ninggi'nogo lalhafi lago nogo?’ ikhi lagepma re, An nen onggo ikhi logolik he, ’Hiren nomolo mene An nobaget fei waga lagep mene andiba inom, An faget enogo fuluk wo'nesi waga lagep mene andiba inom, lalnafi lagebo.’ 9Afuni inunggulenu lombogen he An lalnafi lagep, andiba re hit hinebe mondogat he homan ugu aga lagep andi.
10Nunggu mene sik-pikhogo logouwageluk he, hiren nomolo mene andi mondogat waluk An Naiba fei waga logoni o. An nobabut palniikhi logoni, An nen pogoroba kwe hut fuluk yi mene ti mene mondok fano mene hit hinobaget pulel-pulel pugu kwelek hilingisogo hinobagagunem hiren neogoin aro.#Im. 27:30; Bil. 18:21-24; Ul. 12:6, 14:22-29; Neh. 13:12 11An nen, hit hinangge kweangma nen enggen iti logogin mene re eluk-elugengge nen paluageluk herakfisikhi logogin lego. Hit hinagayo anggur enggen he mondok hokho-pokhorogo ugu logogin. 12Hit hinaiba andoma fano mondok logogun andiba re, afuni inunggulenu lombogen he mel yagahisikhi logogun. it afuni Israel mene re Allah nen fanorinabi'lago higi, iluk ikhi logogun o,” iluk yagaisasikhe.
Allah nen endawirinabigin iluk abok yagaisasikhe wene
13 Tuhan nen ikhi logolik, ”Hit hinane ikhi lagep mene andomaba re, eberogo nenat An sebelogo nobagakhi lagebo. Oba nen he, hiren heinok wo'niikhi logolik, ’Hat hobaget niren ninggi'nogo ekhe ogo nogo?’ iluk ikhi lagep, 14oba nen, hiren ikhi logolik, ’At Tuhan Mondok Lego Welagarek mene a'nogo obaget hundik-handik hilingiti lago oma re ninggi'nogoluk hilingiti lago nogo, athe niren weak hilingito iluk ninendawimo waraluk At oba fakhogo fikhi lago nogo, At Allah obaget andogoti logogun andi re we alomaro o,’ iluk ikhi lagep andi. 15Nen hiren ekhe inom ikhi logolik, Afuni winik-wonok agarek mene andoma re inagaiyekhogo werek. Nen, ap weak hilingiri'lagwi mene ogore it inebeba inenggi werekhogo nek ari'lagwi lek oba nen, iren, nit Allah At alokhogo werek mene a'nogo obabut paluogo, iluk agarek meneba nen ogore, it inebe inagap telagunem enek nit nineilenggen isikhi lago oma re agwi,” iluk ikhi lagebat.
16Andi nen it afuni Tuhan oba inailorogo logolik it ekhe nen ekhe inoba yagaisugu welagaikharek. At Tuhan nen he iren ugu mene andoma inane esanggo holherek. Afuni At oba inailorogo logolik agaugweratarek mene re buku At enggi nen palherek mene At elokhoma werek mene a'nogoba inenu palek werek.
17At Tuhan Omame Mondok Hokho mene a'nogo nen ikhi logolik, ”Inenggi ekhe An nen hilingisigin sambul andi re it andi An nagainafuri agik, An nonggwarek nangge nendawimo namolo mene hak agik, hilinginabigin. Afuni nen inagainafuri inobaget hilingituba hinendawi hundik logolik welagaikharek hakhogo An nen ogo it andi inoba nendawi hundik hilinginabigin aro. 18It An nagainafuri mene nen he it afuni inobabut fano hilingitarek mene inom, weak hilingitarek mene inom, nen An nobaget kabogetarek mene inom, kabogetarek lek mene inom, inoba agamsek logogin mene andi re hobuk neilenggen hogoin aro,” iluk yagaisasikhe.
Currently Selected:
MALEAKHI 3: inohap
Highlight
Share
Copy
Want to have your highlights saved across all your devices? Sign up or sign in