MALEAKHI 1
1
1Uti-utieelo tahuli lo Eeya odelei Maleakhi ode umati lo Isirai̒lu.
Ponu lo Eeya ode Isirai̒lu
2 Eeya lotahuda ode umati-Lio, “Wau̒ momonu olimongoli.” Bo timongoli lolametao̒, “Woloolo mola Eeya momonu mai olami?”
Eeya lolametai “Diila matei Esau tamohuhula lei Yako? Bo tei Yako pilonu-U̒ 3hiambola tei Esau yilonuu̒u-U̒. Madala ohuludu Esau mai̒lantulu-U̒, wau hutalio yiludu-U̒ ode bibii-natangiyalo mongantau tohuta u datahu wau luasi udelita.”
4Humayaalio walimai lei Esau, tau-tauwalo Edom boito moloi̒ya, “Kokoo-tawaalo lami mai̒lantulu, bo ami mamuli momongu mao̒,” yi Eeya mamo lametai, “Timongolio mowali muli momongu mao̒, bo Wau̒ mamopo loohubeo̒. Timongolio mau̒nteelo ‘Lipu momaahu palenta’ wau ‘Bangusa tao̒tuhata muluka lo Eeya u ohiheo-hiheolo mao̒.’ ”
5Bangusa lo Isirai̒lu mamoo̒onto mao̒ lohihialo, wau moloi̒ya, “Otutu udaa̒alo Eeya; okokawasaa-Lio demola to bulemengo huta lo Isirai̒lu!”
Eeya helodini wolo moo̒ohuu̒ tomongo iimamu
6 Eeya Taa Laba-labaalo kawasa lotahuda ode mongo iimamu, “Walao̒ ngota mohulumati oliyamolio wau wato ngota mohulumati oli tuanilio. Wau̒ botie ti Paapamu; yilongola timongoli diila mohulumati ola-U̒? Wau̒ botie tituanimu; yilongola timongoli diila moohe ola-U̒? Timongoli mohina ola-U̒, bo timongoli mohintu, ‘Wolo dudelo woloolo mola mongowatotia mohina to Eeya?’ 7Wolo mopobake ua̒alo udiila paatuti pilopobake toitaato mesba-U̒. Lapatao̒ timongoli mohintu, ‘Wolo dudelo woloolo mola mongowatotia diila mamandungi to Eeya?’ Wolo mopokotolo mesba-U̒. 8Wonu timongoli mopodewo ode Olau̒ binatangi debo u pitoo̒, u mongongoto meaalo udidu mowali monao̒, wolo uito huhutu u talatala? Ntali pongohi mao̒ binatangi odelo uito odeli gubolonulu! Wolo tio masanangi wau mopohutu mao̒ olimongoli wolo mopiohe?”
9Botia, wuu mongo iimamu, yimontalilo momolohone ode Allahu Taa̒ala alihu Tio momonu mai olanto. Tio diila tamo lameta dua̒amu, wau uito totalaamu lohihilao. 10Eeya Taa Laba-labaalo kawasa lotahuda, “Lebe mopiohe huhebu lo Belee-U̒ heu̒taalo, sababu diila ohuna timongoli mopolei̒taa tulu toitaato mesba-U̒. Wau̒ diila mohuto olimongoli, wau diila mohuto mololimo dewomu. 11Wau̒ hilulumati lo babaa-ngusawalo to ngoilanggubu dunia. To utoonulalo mao̒ totabu pilobulio u mohulumati tanggulu-U̒ wau pilodewolio babaa-keyaalo u paatuti, sababu ngoa̒amila bangusa mohulumati ola-U̒! 12Bo timongoli mohina ola-U̒ sababu monganggapu mesba-U̒ diila ohalaga, wau helo podewo teto ua̒alo udiila tilolimo limongoli. 13Loi̒yamu, ‘Ito madiilalo mohuto wolo ngoa̒amila boito’, wau timongoli mopodupapa ola-U̒. Timongoli lodelo binatangi tilao̒, binatangi udidu mowali monao̒ meaalo u mongongoto u pilodewo ola-U̒. To pikiilangi limongoli Wau̒ mohuto mololimo dewomu boito? 14Malaa̒-laa̒natilo tamoo-himbuloa tamopodewo ola-U̒ binatangi udiila ohalaga, wonu towolota lo bibiahio woluo binatangi mopiohu u mapilo dantilio ola-U̒! Sababu Wau̒ulo Olongia Daa̒, wau hilulumati lo ngoa̒amila bangusa.”
Currently Selected:
MALEAKHI 1: LAIGOR
Highlight
Share
Copy
Want to have your highlights saved across all your devices? Sign up or sign in