Miqueas 4
4
Papang king kana kulnin lani aslah karak
(Is 2:2-4)
1Mani witni balna yakat,
asang kau Papang ūni sak kidika ban yakat kaput āna karang.
Kidika asangni laih tanit maluihni karang,
asang ūk balna karak.
Sau muhni balna bitik kidika witing yakat aina karang;
2tawan mahni kidika uiwi kawi yuyulwarang:
“Aiwanangkat Papang asangni yakat mailwarang,
Jacob Papangni uni yakat,
kaput laih witing tani kidika manikingkawang,
dawak kaput laih witing tani munah mawarang.”
Kat Sayan kaupak kalahwarang ki,
Papang maisumalwarang balna kidika,
dawak Jerusalén munah yulni balna kidik kaiwarang ki.
3Dawan yaklauwi nisan balna lanina yamwarang
tawan mahni kalbibilwa kidika barangni awarangki,
pa naikau balna kidika bik.
Witingna isninaparah kidika sau tuknin dini yayamwarang,
dawak langninasa kidika laih di minik daknin dini#Jl 3:10. yamna karang.
Tawan as bik kalbaunin dini laihwi karang ūk niningyakat
war kalbaunin sumalnin bik diskarang.
4Kaput laih muih kidika yamaduwas yalalahwarang,
kaput laih witingna wingninata pupuhwarang#Zac 3:10.
wainnina dawak aninina damni panan dinit sanni yakat.
¡Adika laih Papang parasni nuhni bitik duwa kidika yulni balna!
5Tawan ūk balna laih daninawan yulni dakakawi,
kaunah yangna bik ban yulni dakanaki
Dawan, Mapapangki yakat.
Dawan witing tawanni kidika laihwi yakwarang
6-7Adika Dawan yulwi:
“Kidika mani, yang sīpki balna uduhki,
wah dianayang balna dai kidika:
sakahwa balna, disuhna kidika dawak ruhna balna kidika bik.
Kidika wawatna balna karak,
nisan as parasni yamki.
Yang, Dawan, tawanki yakat kabamint awaki
Sayan asangni kaupak, warmani dawak ban kaput atnin.#Is 40:11; Ez 34:11-16; Sof 3:19; Jn 10:7-16.
8Dawak, Jerusalén man laih Sayan asangni parasniman,
ma laih watta king tawanni nuhni awama,
marid yal nuhni man dai kidika.”
9Waralaih, ¿ais yamta sarahtamahn,
muih yal as muihbin duwarang kat kaldalawak sarahwa kapat?
¿Man yakat king as diskatpah?
¿Kidika awaskat la masumalwa muihni balna dadauna yah?
10Pihrta sarahta, Sayan tawanni nuhni,
yal as muihbin duwarang kat dalawa kapat,
kat muihma balna kidika man kaupak kalalahwarang ki,
dawak ahni palni yakat witingna yalalahwarang,
Babilon kat bik uiwarang ki.
Kauna yakat Dawan witing tawanni kidika laihwi yakwarang;
waihnila balna kaupak laihwi yakwarang.
11Waradika laih muih mahni
kalududuhna manna namangnakauh,
bahang aput yuyulwi:
“¡Dukih mayawakat yamdi taldarang
Jerusalén kidika daukalwakat!”
12Kauna kidika ninisan balna amanglalawas ki
kulnin lani balna dawak Papang warkni balna bik;
witingna amanglalawas ki dukiwi libitwarang kidika
sihm plawar minik bahwi uduhwi sitwa kapat yamak kau.
13¡Sayan tawanni nuhni lawa sakta unitak kidika yakta!
Kat Dawan yulwi:
“Yang lawik turuh almuk parasni kapat maki
tamni balna kidika ayang, tipisnimak kidika laih bras,
kaput laih tawan manas daukalta yawama.
Man lawa ritsnina dutni munah duduna kidika dakyakma,
dawak yang diki yakma,
sau bitik Daniwan kidika yakat.”
Currently Selected:
Miqueas 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998