Miqueas 2
2
Muih taihyang balna parasnina nuhni
1¡Alakaih, kidika balna baisa amana tatalwa kidika
dutni yamnin kidika ridi kalalahwi,
dawak ma payahlawak uman yayamna ki,
kat tingnina yakat parasni kidika duduwa bahang!
2Sau kidika tutumwi, dawak dakyayakwi,
ū balna kidika bik tumwi, dawak mamalwi.
Muih balna yakat tataihwi, wanaihnina balna yakat bik,
dinidawan yakat, dawak dini pahni kidika bik.
3Kaput bahang Papang yulwi:
“Yang bik witingna niningna yakat yamnik dutayang.
Di dutni as sihki,
kidika kaupak sip dakwi kalalahwas karang bahang,
dawak baisa lapapakwas karang witingna manah kapat
kat dutni mani balna karang bahang.
4Kidika mani manna yakat unbabauwarang
kaidinin laniwana kidika. Manayuyulwarang:
‘Bitik palni yanadaukalmukna;
mayang matawanki, Dawan dini dai kidika,
di dawan ūk kalahna, muih as bik laihwatwas dai;
mayakimak balna wayahyakwi duduna
madiki dakyakyang balna kidika.’ ”#2.4 Kidika mani... dakyakyang balna kidika: kaput ulna kidika yamni kapat ki. Hibru kau laih amangladas ki.
5Kidika bahang manna laih di dis awanama
Dawan tawanni yakat.
Prapit dudutni balna
6“¡Prapit yulni karak kainin-awas ki! —witingna yuyulwi—.
¡Di dutni kidika mailaihwas karang!”#Is 30:10.
7¿Jacob tawanni kidika la kaltuhna#2.7 La kaltuhna: kaput kidika yamni ulna kapatki. Hibru kau laih amangladas ki. katpah?
¿Papang kidika kulnin laihwatwas danayah?
¿Papang kidika kaput yamwih?
¿Witing yulni munah yamni kaiwas katpah
barangni muihni yakat?
8Manna tawanki nining yakat lawanamana.
Asninana minit nuhni kidika dakyaktamana,
wār kaupak nawatwi aiwa balna yakat
yaklawanamana kapat kulta.
9Ūmana yamni talamana kidika yakat
yalmana balna ruhmlaktamana,
dawak walaninabis binina kidik bik dakyaktamana
risnipik dianayang dai bik.
10¡Lawanauh! ¡Lapaknin!
adika laih mawingkita puhnin pāni awas ki,
dutni lani witing yakat sakkidika yulni,
kidika bitik palni daukalpamna karang.
11Muih as alas yulwi yulwarang kat:
“Yang isningna paktayang wain dawak wasni daihni”,
adika laih prapit yamni as ki tawan akat.
Papang pramis yamwi witing tawanni laihwi yaknin
12Jacob tawanni kidika bitik uduhki;
dawak Israel tawanni bubin kidika bik uduhki.
Sihm sīp uduhwa kapat uduhki,
sīp balna sihrsihr kaswa bangkapat,
muih mahni diparasni atwa kapat karang.
13Papang yaklauwi ta balna kidika yamwarang,
dawak witingna usnit uhuiwarang
dawak tawan nuhni dūrni munah kalalahwarang.
Witingna kingnina, Dawan,
witingna bitik tanitna yakat lapakwarang.
Currently Selected:
Miqueas 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998