2 Pita 3
3
Dawan watwi kaiwarang kidika
1Wanaihki dalani balna, adika ki, wauhtaya wat bu manaultayang kidika. Wat bu yakat yang dukih yana dai, yulki balna karak, manayamtingkat barangni kulna atnamna. 2Manna ismangnakattanauh ma ūk balna dai yakat Prapit holi balna yuyulna dai kidika; dawak Dawan laihwi yakyang lāni balna, apostel balna yaklau manna yakat manasumamalna dai kidika.
3Di balna bitik yakat adika laih kulta awanauh: ma witni balna yakat muih aiwarang ki witingna dukih#2 Tim 3:1-5; Jud 18. diawa lani dudutni balna kidika kaput yalalahwarang ki, dawak sarahni lani karak 4aput yulwi dakakana karang: “¿Krais watwi kainin pranimis dai kidika ais kalahnayah? Papangkina balna laih uman dadauna, dawak sau yamna mani kaupak ban kapat tanityakat kiwi.”#Ez 12:22. 5Kidika muihni balna laih witingna amanglana atninna dukih diawas ki muhnilau mani kaupak uman kisang dawak sau duwa dai kidika, Papang yaklau witing yulni karak yulwakat was paskaupak kalahna dai kidika dawak was papus yakat laihwatwi duwa kidika.#Gn 1:6-9; Sal 24:2. 6Was munah bik was nuhni āwa kat kidika sauni daukalna dai.#Gn 7:11. 7Kaunah waradika kisang balna dawak sau duwa kidika laih, kuh yaklau busna atnin dana Papang yaklau yamnin yulna kaput. Kidika kuhni laih la yamnin mani yakat dawak dutni yamyang balna disninna mani yakat busna karang ki.
8Baisa kidika minityakat, wanaihki dalani balna, damatnakahnin awaski Dawan niningyakat laih ma as kidika sihm kurih 1000 kapat ki, dawak kurih 1000 kidika laih sihm ma as kapat ki.#Sal 90:4. 9Dawan witing pranimis yamnin kidika laih tahawas karang ki, muih balna buas yuyulwa kaput; kaunah witing laih manna yakat kulnin laihwatnin lani duwi, bahang witing dukih kalawas ki muih as bik dauna atnin, kaunah muih bitik Papang yakat wiryaklana atnin kidika dukih kalawi.#Ez 18:23; 33:11.
10Kaunah Dawan kainin mani kidika laih sihm di malyang kapat kaiwarang ki.#Mt 24:43; Lc 12:39; 1 Ts 5:2; Rib 16:15. Bahang kisang balna kidika laih parasni yamadangni atwarang ki, dunin dini balna kidika laih kuhpau yaklau daukalmukna karang ki, dawak sau yakat di balna bangkidika laih, Papang lani kidika dinityakat watna karang ki.#3.10 Papang lani kidika dinityakat watna karang ki: Y.y. walwi yakna karang. Tingkau ulna balna buas kidika laih aput yuyulwi: busna karang.
11Bahang kaput laih di balna bitik kidika daukalna karang ki, ¡manna laih ampus holi dawak dalani lani karak yalahtanamayah! 12Papang kaiwarang mani kidika tahatanauh, dawak traitala sirihni yamtanauh. Kidika mani kisang balna kidika laih kuhpau yaklau daukalmukna karang ki, dawak dunin dini balna kidika laih kuh dahlwa pasyakat arwi dislalana karang ki; 13kaunah mayang laih kisang dawak sau wisam kidika tahadi Papang yaklau pramis yamna kidika, kidika yakat laih di balna bitik kidika la kat dawak bik yamni karang ki.#Is 65:17; 66:22; Rib 21:1.
14Kidika bahang, wanaihki dalani balna, manna adika dini balna tahata kauna, traitala di balna kidika yamni yamtanauh Papang yaklau kulnin aslah lani, maisihni dis dawak dutni as bik dis karak manatalna atnin yulni. 15Manna damatnakahwinih mayang Madakiwan yaklau kulnin laihwatnin karuk maiyamwa kidika laih laihwi yaknin lani kidika mayang duna atnin yulni yamwi. Adika yulni mawanaihki dalani Pal bik manna yakat manaulna ki, Papang yaklau sins lani kalana kaput. 16Witing wauhtaya ulna balna bitik yakat adika yulni manayulna ki, kidika balna pasyakat di amangladas dini balna bik bangki di amanglalawas dawak rahm kulnin lani yakat parasnina dis balna kidika bik niningna iwitwi, Ulna balna ūk yakat niningna iwitwa kapat,#3.16 Ulna balna ūk yakat niningna iwitwa kapat: wirlana ūk yakat laih aput yulwi: ulna ūk balna yakat niningna iwitwa kapat. witingna silp disninna yulni.
17Kidika bahang, wanaihki balna dalani, manna uman baisa kau adika dini balna amanglatamana bahang, mainkaltalnauh, dutni yamyang balna alasnina karak manalakwi manamurnin awas yulni dawak pamana yakat barangni mana kidika kaupak bik buknamna awas yulni. 18Kaunah Madakiwan Jisas Krais kidika yamni amangnilatanauh dawak witing dalani lani duwa yakat baraktanauh. ¡Witing alasnina yaksihni kidika laih waradika dawak ban kaput karang! Kaput karang.
Currently Selected:
2 Pita 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998