1 Pita 4
4
Papang prisantni balna mayanakaput dini yamna atnin
1Kidika bahang, Krais muihni nuhni yakat dalani wauhna kaput, manna bik sihm agha atnamna ki dalani wauhna atnamna. Bahang angdika muihni kat muihni nuhni yakat dalani wauhna kidika laih dutni kidika niningyakat daukalna, 2witing sangnika baisa watwa kidika laih Papang kulnin lani yakat yalahna atnin yulni dawak muihni nuhni dukih kalawa kaput laih awas. 3Manna laih ma mahni yamnamana Papang yakat kulwas muihni balna yayamwa kaput, bahang kidika mani balna yakat laih di suhlsuhl, di dutni dukih, wasak dinin dawak kasnin alasnina, minitbayak dinin lani dawak wayani dauh maisihni balna yakat ayangni tanit nuhni yamtamana dai. 4Waralaih, witingna sangninaka dutni kidika yakat usnit uitasmana kidika yulni, witingna laih taldas dini kapat tatalwi dawak manna yakat dutni manayuyulwi. 5Kaunah witingna laih yulnina yuyulna karang ki muih sangka dawak dadauna balna lanina yamna atnin ridi kalahna sakkidika muhni yakat. 6Bahang muih dadauna balna kat bik yul yamni kidika diyuyulna dai, spirit yakat sangka atninna yulni, Papang yulna kaput, adika sauni akat muihnina nuhni yakauna lanina yamna dai kat bik, muih balna yuyulwa kaput.
7Di balna bitik manina witni kidika kaiwi uliswi. Kidika bahang, manna laih la yamni dutanauh dawak kulnin lani rahm karuk mamatna yultanauh. 8Manna pasmangna yakat dalani lani kidika nuhni sakkarang, kat dalani lani kidika laih dutni lani balna mahni yakat dawak diswi.#4.8 Dalani lani kidika laih dutni lani balna mahni yakat dawak diswi: wirla ūk yakat laih aput yulwi: dalani lani kidika laih dutni kidika dawak diswi di dutni balna mahni yakat.,#Pro 10:12; 1 Kor 13:7. 9Manna biri biri ūmana yakat kaldutanauh, muih as yakat bik yulni yultas.#Rom 12:13. 10Papang prisantni balna sat sat maintalyang yayamni balna mana kapat, manna muihmana kat kat muih ūk balna yakat dinina yamtanauh ais prisantni lani dunamana kat kaput. 11Manna kaupak muih as yulbauwarang mani kat, yulmana kidika laih sihm Papang yulni balna kapat kawang. Manna kaupak muih as wark as yamwarang mani kat, wark kidika yamtah Papang yaklau parasma mawa kidika bitik karak. Di balna bitik yamtanama kidika, yamtanauh Papang ayangni nuhni yamna atnin yulni Jisas Krais munah, witing laih alasna yaksihni dawak parasni bik ban kaput atnin duwa kidika. Kaput karang.
Kristian balna kapatdalani wauhnin kidika
12Yang wanaihki dalani balna, kuhpau buswi talnin kidika yakat āwanamna kidika di as talasmana dini kapat laih kukulwinih, sihm di as taldas dini kapat. 13Nawatkauh, alasna alahwanauh Krais dalani wauhwarang kidika yakat dimana dutanama kidika yulni, dawak witing alasnina yaksihni kidika lāih kalahwarang kidika yakat bik alasna duna atnamna yulni.#Rom 8:17; 1 Pi 4:1. 14Manna laih yamni palni awanama, muih as yaklau Krais yulni dutni manayulwarang mani kat, kat Papang spiritni alasna yaksihni kidika laih manna mamatna yakat ban kaput kidika yulni.#4.14 Tingkau ulna balna buas kidika laih aput minitlalakwi: Rahm palni witingna laih dutni yuyulwi (witing niningyakat), kaunah manna laih alasnina yaksihni yamtamana. 15Manna kaupak muih as dalani wauhwa kat, muih īna, di malna kidik awaskat dutni yamyang, dawak muih ūk yulnina pasyakat kana yulni laih atnin awaski. 16Kaunah kristian kidika yulni dalani wauhwa laih, yakasaldinin awaski, kaunah Papang ayangni nuhni yamnin ki kidika ayangni duna atnin yulni.
17La yamnin mani kidika laih uman kaiwi kana Papang sulani balna kidika kaupak. Dawak la kidika laih mayang mayulki yamwakat, ¿Papang yulni wisam yamni kidika yakat dakakawas muihni balna manina witni kidika laih ampat karangyah? 18Dawak la kat muihni kidika dadasni munah laihwi yaknin lani duwa kat, ¿ampat karangyah dutni muihni dawak dutni yamyang kidika laih?#Pro 11:31. 19Dalani wawauhwa balna kidika Papang kulnin lani kat kaput wawauhwa laih, witingna laih yamni kidika yamwi tanitna yakat uininna ki dawak solnina kidika bik Papang witingna diyamna kidika tingni yakat āninna ki, bahang witing laih barangni ki.
Currently Selected:
1 Pita 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998