Matewu 7
7
Kutolovela kulamula vamwani
(Luka 6:37-38,41-42)
1“Mi nga lamuleni kasiku mi si lamulwi nanu.#7:1 Kasiku mi si lamulwi nanu: Ti womba ku: Kasiku Txizimu txi si mi lamuli nanu. 2#Wona ni ka: Mar. 4:24. Nguko mi na lamulwa nga ti mi lamulisako tona vamwani; ni mpimo wu mi pimako ngu wona vamwani, mi na pimwa ngu wona nanu. 3Ngu kutxani u txi wona txizokoro txi txi ku disoni ka mkwanu, u si woni mtanda wu wu ku disoni kwako kani? 4Mwendo u nga wombawombisa kutxani ka mkwanu u txi khawe: ‘Thutha ni thavisa txizokoro disoni kwako’ kasi mtanda wu ho disoni kwako nawe, kani? 5Mxengeteli, thanga ngu kuthavisa mtanda wu, wu ku disoni kwako, ngu kona u no wonisisa ta tinene kuthavisa txizokoro txi txi ku disoni ka mkwanu.”
6“Mi nga thukeni mi ninga timbwa silo si si nga sawulwa, hambi kutshotsha tidhayimana tanu ka tikhumba, kasiku ti si ti kandeteli ngu mikondo, ti mi wukela, ti txi mi vhandamulela ngu makwasa.”
Wunene wa Txizimu
(Luka 11:9-13)
7“Kombelani, mi na ningwa; lavani, mi na si mana; gogotani, mi na tulelwa. 8Nguko mmwani ni mmwani a kombelako, wa ningwa; awu a lavako, wa si mana; ni wule a gogotako, a na tulelwa. 9Ngu wuhi m'thu hagari kwanu, a ningako mwanana wakwe dirigwi, ngako a txi mkombela dipawu kani? 10Mwendo ngako a txi kombela txihaka, a nga mninga mnyoka, kani? 11Ngu konaho, hambi anu mi ku vathu va tshofu mi zivako kuninga sa sinene ka vanana vanu, ngutu-ngutu Tate wanu wa nzumani kha na mbi pindisa kuvaninga sa sinene ava va mu kombelako kani? 12Ngu toneto, koko, totshe ti mi ti lavako kuve mi mahela vathu, va maheleni nanu. Awuwa ngu wona Mlayo ni gondo ya vaprofeti.”
Tinzila timbidi
(Luka 13:24)
13“Wulelani ngu txike txo songa, nguko txike txa kuanama ni nzila ya kuanama si yisa kulovani; se mbavangi va wulelako ngu sona. 14Nguko txike txi songile, ni nzila ya kona yi khwete, ayi yi yisako wutomini, kambe mbadotho va yi manako.”
Vaprofeti va makuhu
(Luka 6:43-44)
15“Ti woneleni ka vaprofeti va makuhu, va tako kwanu va di ambate madhowo a tinvuta, kasi timbiluni kwawe maxolwa ma vhandamulako. 16Mi na va ziva ngu mihando yawe. Ina mi nga hapha mauvha amu ka tikwakwati, mwendo maxanvu amu ka sihaha kani? 17Ngu toneto, wotshe mndonga wa wunene wu veleka mihando ya yinene, ani mndonga wo biha wu veleka mihando yo biha. 18Mndonga wa wunene kha wu sikoti kuveleka mihando yo biha, ni mndonga wo biha kha wu sikoti kuveleka mihando ya yinene. 19#Wona ni ka: Mat. 3:10; Luk. 3:9. Mndonga wuhi ni wuhi wu si velekiko mihando ya yinene, wu na gangwa wu vinzwa ha mndiloni. 20Ngu konaho, mi na va ziva ngu mihando yawe.”
Awu a wulelako ka Mfumo wa Nzumani
(Luka 13:25-27)
21“Hi nga votshe vale va wombako kwangu va txi Mkoma, Mkoma ava va no wulela Mfumoni ka nzumani, aniko ngu wule a mahako kuranda ka Tate wangu a ku nzumani.”
22“Ka edo ditshiku vavangi va nata womba kwangu va txi kha vona: Mkoma, Mkoma, ina athu kha ha profeta ngu ditina dako kani? Ina kha ha tovela madhimoni ngu ditina dako kani?’ 23#Wona ni ka: Mas. 6:8. Konaho, ani ni nata va gela ha kubasani ni txi khani: ‘Txima kha na mi ziva; hambukani kule ni nani, anu vamahi va sionho.’ ”
Makhato a tinyumba timbidi
(Luka 6:47-49)
24“Ngu toneto, awu a engisako mapswi angu e ma veketa, a fana ni m'thu wo txhariha, a nga aka nyumba yakwe txitimwi ka dirigwi. 25Se nzuma yi nite, minambo yi nje kutala kuva ni ndambi, txingulu txi peka ngu mtamo txitimwi ka nyumba yile, aniko kha ya wa, nguko yi aketwe txitimwi ka dirigwi.”
26“Kasi awule a engisako mapswi angu, a txi lamba ku ma maha, a fana ni m'thu wa dibhemba a nga aka nyumba yakwe ha divhunyeni. 27Se nzuma yi nite, minambo yi tala kuva ni ndambi, txingulu txi peka ngu mtamo txitimwi ka nyumba yile, se yona yi khundumuka yi txi wa. Kuwa ka yona yi wisa manyala.”
Wuthangeli wa Jesu
28 # Wona ni ka: Mar. 1:2; Luk. 4:32. Mbimo yi Jesu a nga gwita kuwombawomba timhaka tiya, mabutho ma to xamala ngutu ngu kugondisa kwakwe. 29Nguko a ti ti va gondisa kufana ni m'thu wu a ku ni wukoma, asi fani ni vabhali.
Currently Selected:
Matewu 7: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.