1 Timoteo 3
3
Ca ral-laʼ ilácagaquiëʼ bönniʼ tapa chiʼë bönachi queëʼ Cristo
1Didzaʼ idútë li lë ni rnna: Channö ruíʼi ládxëʼë nu bönniʼ gáquiëʼ nu gapa chiʼi bönachi queëʼ Cristo, dxin dxiʼa rizë́ ládxëʼë. 2Nu bönniʼ rapa chiʼë bönachi queëʼ Cristo run bayudxi gáquiëʼ:
Tu bönniʼ cuntu nu gaca bi innë́ queëʼ.
Zoa túzinu nigula queëʼ.
Ral-laʼ gáquiëʼ ban ladxiʼ, en idú ladxiʼ, en nöxaj ladxiʼ.
Ral-laʼ guʼë ga ilaʼcuʼë bö́chiʼruʼ taʼdxinëʼ lidxëʼ.
Ral-laʼ gáquiëʼ bönniʼ nazéquiʼdeʼenëʼ usédinëʼ bönachi.
3Bitiʼ gáquiëʼ bönniʼ reʼjëʼ, en calëga bönniʼ síniaʼ.
Bitiʼ gaquiëʼ bönniʼ rizë́ ládxiʼsëʼ siʼë dumí.
Ral-laʼ gáquiëʼ bönniʼ dxiʼi ladxiʼ, en zxön ladxiʼ.
Bitiʼ gáquiëʼ bönniʼ ruhuídiʼnëʼ.
4Ral-laʼ gáquiëʼ bönniʼ rinná béʼenëʼ dxiʼa bönachi nacuáʼ lidxëʼ.
Ral-laʼ ilunbiʼ zxíʼinëʼ ca rnna xtídzëʼë lu yöl-laʼ run bal xúzgacabiʼ.
5¿Naruʼ huácatsö tu bönniʼ gapa chiʼë bönachi queëʼ Dios channö cabí raca inná béʼenëʼ dxiʼa bönachi nacuáʼ lidxëʼ? 6Bitiʼ ral-laʼ gáquiëʼ tu bönniʼ siʼ gusí lahuëʼ tëʼë Cristo, para cabí tödi bëʼ gun ba zxön cuinëʼ, en bitiʼ gaca queëʼ ca naʼ guca que tuʼ xihuiʼ, nu ben ba zxön cuini, ateʼ Dios guchúguiëʼ que tsöjgáʼana lataj chul-la. 7Lëscaʼ ral-laʼ gáquiëʼ bönniʼ taʼnná dxiʼa queëʼ nupa cabí nabábagaca bönachi queëʼ Cristo, para cabí soa nu uzóa lëʼ tsöláʼalö, en para cabí idzunëʼ lu yalaj que tuʼ xihuiʼ.
Ca ral-laʼ iláquiëʼ bönniʼ tácalenëʼ bönachi queëʼ Cristo
8Lëscaʼ caní ral-laʼ iláquiëʼ bönniʼ tácalenëʼ bönachi queëʼ Cristo:
Ral-laʼ iláquiëʼ bönniʼ idú ládxiʼgaquiëʼ.
Bitiʼ iláquiëʼ bönniʼ tuʼrixëʼ didzaʼ.
Bitiʼ iláquiëʼ bönniʼ téʼajëʼ.
Bitiʼ iláquiëʼ bönniʼ taʼzë́ ládxiʼsëʼ dumí.
9Ral-laʼ gaca ilapa chiʼë idútë le réajlëʼëruʼ Cristo.
Ral-laʼ ilaca idú dxiʼa icja ládxiʼdoʼgaquiëʼ.
10Yuguʼ bönniʼ ni ral-laʼ siʼ bë́ʼëliʼ légaquiëʼ zíʼalö, ateʼ níʼirö gataʼ lu náʼagaquiëʼ ilácalenëʼ bönachi queëʼ Cristo, channö cabí zoa nu gaca bi innë́ quégaquiëʼ. 11Lëscaʼ caní, nigula que queë́gaquiëʼ ral-laʼ ilaʼcuáʼanu idú ládxiʼgacanu, en cabí ilácanu unnë́ que luzë́ʼe. Ral-laʼ ilácanu zxön ladxiʼ, en ilácanu li ladxiʼ lu yúguʼtë le tunnu. 12Yuguʼ bönniʼ ilácalenëʼ bönachi queëʼ Cristo ral-laʼ soa túzinu nigula que queë́gaquiëʼ. Lëscaʼ ral-laʼ ilaʼnná béʼenëʼ dxiʼa zxíʼinigaquiëʼ, encaʼ bönachi ulidxi que queë́gaquiëʼ. 13Run bayudxi gaca caní, tuʼ taʼdéliʼnëʼ lataj ga ilún bal bönachi xtídzaʼgaquiëʼ, channö tunëʼ dxiʼa dxin tunëʼ tácalenëʼ bönachi queëʼ Cristo, ateʼ ilácarëʼ rugu ladxiʼ para iluʼë didzaʼ ca naca le réajlëʼëruʼ Jesucristo.
Le bigachiʼ que le reaj ládxiʼruʼ-nëʼ Dios
14Yuguʼ didzaʼ ni ruzúajaʼ quiuʼ lu guichi, sal-laʼ runaʼ löza uduyúteaʼ liʼ. 15Channö huadzédaʼ, ruzúajaʼ quiuʼ didzaʼ ni para inö́zinuʼ naca ral-laʼ gunuʼ lógaca bönachi nacuáʼ lidxëʼ Dios, nupa nácagaca bönachi queëʼ Dios ban, en nácagaca tsutsu, en taʼguíxjöʼ dxiʼa le naca idútë li. Nácagaca ca yuguʼ yaʼzxö́n, en le nunídaʼgaca zöʼö, le nácagaca tsutsu, en taʼzö́n yuʼu. 16Le nácatë, zxö́ntërö naca le bigachiʼ que le reaj ládxiʼruʼ-nëʼ Dios, ca naʼ nazúaj lu guichi le rnna:
Dios buluíʼi lahuëʼ, gúquiëʼ bönachi.
Guca bëʼ náquiëʼ tsahuiʼ tuʼ guzóalenëʼ Dios Böʼ Láʼayi Lëʼ.
Gulácalenëʼ gubáz láʼayi queëʼ Dios Lëʼ.
Guca libán queëʼ lógaca bönachi izáʼa.
Gulaʼyéajlëʼ bönachi yödzölió Lëʼ.
Dios buchisëʼ Lëʼ xitsáʼ ga nayë́pisëtërëʼ.
Currently Selected:
1 Timoteo 3: zar
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.