ZAKARIA 9
9
Paruhuman tu negara hombar balok ni Israel
1On ma tona ni Tuhan dompak tano Hadrak, jana maradian di Damaskus. Harana Tuhan do nampuna angka kota Aram dohot sude angka marga ni Israel. 2Hamat na marbalok dohot Hadrakh laing nampunaNia do i, songon i muse kota Tirus dohot Sidon haru pe na mansai pistar do halahi. 3Dibangun Tirus do angka benteng di dirina sandiri jana ditimbunsa sere dohot perak bahat sajo lopus gabe songon bustak di alaman. 4Baenon ni Tuhan ma marpogos kota i. Lalu ambungkonoNia ma sude sinadongan ni kota i tu bagasan laut jana kota i sandiri abis panganon ni api.
5Idaon ni halak Askelon ma i dohot Gasa jana gabe mabiar ma halahi. Laing idaon ni Ekron ma i jana mago ma sude arop ni rohana. Agoan raja ma Gasa, jana Askelon gabe maronco nada adong na mangingani. 6“Inganan ni angka anak gampang ma Asdod jana abiskononKu ma hagodangan ni halak Pilistin. 7PaagoonKu ma mudar sian pamanganna dohot hahodaran sian angka iponna, jana na tinggal rap dohot halahi pe giot manjadi nampuna ni Debatanta. Gabe songon sada horong ma halahi di Juda, jana halak Ekron songon halak Jebusi.#9:7 HALAK JEBUSI: I ma halak na mangingani Jerusalem humani. Gabe hatoban ni si Daud do halahi dung ditaluhon ia kota i. 8JagohononKu ma tanongKi jana ambatonKu angka parangan ni bangso na asing na giot mamolus sian i. Nada Hupatola be angka panyosak manjaja bangsongKi. Angke madung Huida pardangolan ni halahi.”
Raja na giot ro
9Ale boru Sion, marjop ni roha ma ho!
Marolop-olop ma hamu ale pangisi ni Jerusalem!
Ligi ma! Ro rajamu mardongan hamonangan!
Raja na tigor do Ia na maroban haluaan.
Na serep roha do Ia, jana mangalombut halode,
sada halode jara-jara.
10Didok Tuhan ma,
“Angka kareta na sian Efraim, ambungkononKu noma i,
sandok kudo na di Jerusalem, abiskononKu noma i
jana sude sior ponggolanKu noma i.
Baenon ni rajami ma pardamean ni angka bangso.
Sian laut na sada tu laut na asing ia noma markuaso.
Sian Batang aek Efrat lopus tu ujung ni tano.”
Hasusuang ni bangso ni Debata
11Didok Tuhan ma tu bangsoNia,
“Ho pe markite-hite mudar ni parjanjianKu
dohot do paluaonKu angka na tarbuang sian ho,
malua sian sumur na so marisi aek.
12Mulak ma hamu ale angka halak buangan,
saonnari madung adong di hamu harapan.
Mulak ma hamu tu inganan parondinganmunu.
Di ari sadari on Au mandok:
Silompit dua do paulahonKu pasupasungKu tu ho.
13BaenonKu ma Juda songon sior na sintak,
jana Huhobasi Efraim tu parporangan,
jana Hupake angka anakmi ale Sion, adop angka anakmu,
jana tano Junani baenonKu gabe podang ni sada pahlawan.”
14Pataridahonon ni Tuhan ma diriNa tu bangsoNa,
songon hipas ni hilap ditembakkon angka anak ni siorNa.
Ombuson ni Tuhan Debata ma sarune
lalu mardalan maju di bagasan angin na gogo na sian Selatan.
15Ondihonon ni Tuhan Na Markuaso i ma halahi,
jana pangabison huhut dege-degeon ni halahi ma angka alona.
Giot inumon ni halahi ma mudar songon na minum anggur.
Lopus gok songon bokor panyiram
songon parsuhi ni langgatan.
16Muda dung dapot ari i, paluaon ni Tuhan ma bangsoNa,
songon parmahan na paluahon biri-biriNa sian mara.
Marsinondang be ma halahi di tano ni Tuhan,
songon parnyala-nyala ni tuku na marbatu intan.
17Dengganna i antong jana jeges!
Gandum do mambaen magodang angka doli-doli
jana anggur mambaen magodang angka bujing-bujing.
Currently Selected:
ZAKARIA 9: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society