Mat 9
9
Yesu naakiza omusaija anyakuzingamire
(Mar 2:1-12; Luk 5:17-26)
1Yesu akataaha omu bwato, yayambuka enyanja, yahika omu rubuga rw'owaabu. 2Baamuleetera omusaija anyakuzingamire, abyamire ha katabu. Yesu obu yarozire okwikiriza kwabu, yagambira anyakuzingamire ati: “Mwana wange, guma! Ebibi byawe bikuganyirwe.” 3Nubwo abamu ha beegesa b'ebiragiro baagambirangana bati: “Omuntu onu ka naajuma Ruhanga!” 4Baitu Yesu habw'okumanya ebiteekerezo byabu, yabagambira ati: “Nimuteekerereza ki kubi omu mitima yanyu? 5Ekirukukira kurahuka kiraha, kugamba nti: ‘Ebibi byawe bikuganyirwe’, rundi kugamba nti: ‘Imuka ogende’? 6Kinu nikyo muraamanyiraho Omwana w'omuntu nkooku aina obusobozi omunsi obw'okuganyira ebibi” nubwo yagambira omusaija anyakuzingamire ati: “Imuka, ohimbe akatabu kaawe, otaahe.” 7Yaimuka, yataaha omuka. 8Ekitebe ky'abantu obu baarozire eki, baatiina, baakugiza Ruhanga ayahaire abantu obusobozi oburukwingana aho.
Okwetwa kwa Matayo
(Mar 2:13-17; Luk 5:27-32)
9Yesu obu akaba naarugayo, yarora omuntu, ibara lye Matayo, aikaliire omu isoroolerezo ly'omusoro, yamugambira ati: “Mpondera.” Matayo yaimuka, yamuhondera.
10 #
Luk 15:1,2. Yesu obu akaba aikaliire mba Matayo naalya, abasorooza b'omusoro n'abasiisi baija, baikaara nawe ha meeza hamu n'abeegesebwa be. 11Abafalisaayo obu baakirozire, baakaguza abeegesebwa be bati: “Habwaki omwegesa wanyu alya n'abasorooza b'omusoro n'abasiisi?” 12Yesu obu yahuliire eki, yagarukamu ati: “Aboomeezi tibeetaaga mufumu, baitu ayetaagwa abarwaire. 13#Mat 12:7; Hos 6:6.Mugende mwetegereza amakuru g'ekigambo kinu: ‘Ningonza mukole ebikorwa by'embabazi kukira kuntambira ebyonzira.’ Habwokuba ntaizirre kweta abahikiriire, baitu abasiisi.”
Ekikaguzo ha kusiiba
(Mar 2:18-22; Luk 5:33-39)
14Nubwo abeegesebwa ba Yohaana baija hali Yesu baamukaguza bati: “Habwaki itwe n'Abafalisaayo tusiiba emirundi nyingi, kunu abeegesebwa baawe batarukusiiba?” 15Yesu yabagarukamu ati: “Abagenyi basobora bata kuganya, omuswezi obu aba ainabo? Akasumi kalihika kigabura obu alibaihwaho, nubwo balitandika kusiiba. 16Tiharoho muntu abazirra ekikoba kihyaka ha kijwaro kikuru; habwokuba ekikoba eki kitaagukira kimu ha kijwaro kikuru n'ekihuru kigaliha. 17Kandi tiharoho muntu anyakuta eviini ey'ehiira omu ndyanga enkuru. Kakuba akorakwo, endyanga ebbaruka, eviini eseeseka, kandi endyanga esiisikarra kimu; baitu eviini ey'ehiira bagita omu ndyanga empyaka, kandi byombi biikaraho.”
Yesu naakiza ow'akeejwiso kandi naahumbuura omuhara w'omunyoro
(Mar 5:21-43; Luk 8:40-56)
18Yesu obu akaba naakyabaza nabo, haija omunyoro, yateeza amaju omumaiso ge, naagamba ati: “Muhara wange afiire. Ija omukwateho, ayomeere.” 19Yesu yaimuka yamuhondera aina n'abeegesebwa be.
20Nubwo omukazi ow'akaba arwaire akeejwiso kumara emyaka ikumi n'ebiri yaleesirwe enyuma ya Yesu, yakwata ha mukugiro gw'ekijwaro kye; 21habwokuba akaba naagumya omu mutima gwe ati: “Noobu ndakwataho kwonka ekijwaro kye, ndaakira.” 22Yesu yahinduka, obu yamurozire yagamba ati: “Mwisiki wange, guma; okwikiriza kwawe nukwo kukukirize.” Ahonaaho omukazi yakira.
23Yesu obu yataahire omunju y'omunyoro, yarora abateezi b'endere n'abantu baingi abakaba nibateera empamo, 24yagamba ati; “Murugeho; omwisiki tafiire, baitu agwijagiire.” Baamusekeereza. 25Obu baamazire kutu rukya abantu, Yesu yahingura omu kisiika, yakwata omwisiki ha mukono, yaimuka. 26Amakuru ago gaararanga hoona omu nsi egi.
Yesu naakiza abafu b'amaiso babiri
27Yesu obu akaba naarugayo, abafu b'amaiso babiri baamuhondera nibatoka bati: “Mwijukuru wa Daudi, otuganyire.” 28Obu yataahire omunju, abafu b'amaiso baija nambere ali, yabakaguza ati: “Nimwikiriza nkooku nsobora kukora kinu?” Baamugarukamu bati: “Ego, Waitu!” 29Yabakora ha maiso naagamba ati: “Kibakolerwe nkooku mwikirize.” 30Amaiso gaabo gaiguka. Yesu yabateererra muno ati: “Mwerinde, mutakigambiraho muntu weena!” 31Baitu bbo obu baagenzire, baaranganiza amakuru ago omu bicweka byona eby'ensi egi.
Yesu naakiza omufu w'omunwa
32Abasaija abo obu bakaba nibakyarugaho, abandi baaleetera Yesu omufu w'omunwa anyakuroho omwoyo mubi. 33Yesu obu yamazire kubinga omwoyo mubi, omufu w'omunwa yabaza. Abantu boona baahunirra nibagamba bati: “Ekintu nka kinu tikikarorwahoga omu Isirairi.” 34#Mat 10:25; 12:24; Mar 3:22; Luk 11:15.Baitu Abafalisaayo baagamba bati: “Abinga emyoyo emibi habw'obusobozi bwa mukuru wayo.”
Yesu n'abeegesebwa be
35 #
Mat 4:23; Mar 1:39; Luk 4:44. Yesu yagendagenda naabungira embuga zoona n'ebyaro, naayegesa omu masorrokaniro gaabo, naarangirra abantu Amakuru Amarungi ag'obukama bwa Ruhanga, kandi naakiza abantu endwara eza buli mulingo n'obusaasi bwona. 36#Kubar 27:17; 1 Bakam 22:17; 2 Byok 18:16; Ezek 34:5; Mar 6:34.Obu yarozire ebitebe by'abantu, yabagirra embabazi, habwokuba bakaba baharaize emitima, bataina kikoonyera, nk'entaama ezitaina muliisa. 37#Luk 10:2.Nubwo Yesu yagambiire abeegesebwa be ati: “Eby'okugesa bingi, baitu abakozi nubo bake. 38Habweki musabe MUKAMA w'eby'okugesa atume abakozi baingi omu musiri gwe.”
Currently Selected:
Mat 9: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.