Mat 21
21
Kristo naataaha omu Yerusaalemu n'ekitiinisa
(Mar 11:1-11; Luk 19:28-40; Yoh 12:12-19)
1Obu bairiire haihi na Yerusaalemu, baahika Betifage, ha rusozi rw'emiti Oliva. Nubwo Yesu yatumire babiri ha beegesebwa be, 2naabagambira ati: “Mugende omu kyaro eki muroleriire, nimwija kusangayo endogoyi esibikirwe, ina omwana gwayo; muzisibule, muzindeetere. 3Obu haraabaho omuntu arukubakaguza, mumugarukemu muti: ‘Mukama waitu naazeetaaga’; naija kuzigarra bwango.” 4Kinu kikabaho kuhikiriza ekyagambirwe omurangi ati:
5 #
Zek 9:9. “Mugambire abantu ba Siyoni muti:
Dora, omukama waawe naija nambere oli,
ayebundaize, atembere endogoyi,
endogoyi ento, omwana gw'endogoyi.”
6Abeegesebwa baagenda, baakora nkooku Yesu yabaragiriire; 7baaleeta endogoyi n'omwana gwayo, baazitaho ebijwaro byabo, Yesu yaikarraho. 8Abantu baingi baayarra ebijwaro byabo omu muhanda, abandi baacwa amataagi g'emiti, baagarra omu muhanda. 9#Zab 118:25,26.Ebitebe by'abantu ebikaba bimwebembiire n'ebyamukuraatiire baakatoka nibagamba bati: “Hangiriza Omwana wa Daudi! Ahaisanizibwe arukwija omu ibara lya Atahwaho! Hangiriza anyakusinga haiguru muno!” 10Obu yataahire Yerusaalemu, orubuga rwona rwayooka, abantu baakaguzangana bati: “Ogu nooha?” 11Ebitebe by'abantu baagarukamu nibagamba bati: “Onu nuwe Yesu, omurangi anyakurugire Nazareeti orwa Galiraaya.”
Yesu naabinga abaatundiraga omu Nju ya Ruhanga
(Mar 11:15-19; Luk 19:45-48; Yoh 2:13-22)
12Yesu akataaha omu Nju ya Ruhanga, yatandika kubinga boona abakaba nibatundiramu n'abakaba nibagurramu, yajuumika emeeza ez'abakaba nibahingisa sente, n'entebe z'abo abakaba nibatunda amaiba. 13#Is 56:7; Yer 7:11.Yabagambira ati: “Kikahandiikwa kiti: ‘Enju yange eraayetwaga nju y'okusabiramu’; baitu inywe mugifoire bwingira bw'abanyagi.”
14Abafu b'amaiso n'abalema baija nambere ali omu Nju ya Ruhanga, yabakiza. 15Baanyakatagara abakuru n'abeegesa b'ebiragiro obu baarozire ebyamahano ebi yakozire, kandi n'abaana nibatokera omu Nju ya Ruhanga bati: “Hangiriza Omwana wa Daudi!” Baabiihirwa muno; 16#Zab 8:2.baamukaguza bati: “Noohurra abo ebi barukugamba?” Yesu yabagarukamu ati: “Ego, mbihuliire; inywe timukasomaga muti:
‘Omu kanwa k'abaana abato n'enkerembe
numwo watungire okukugizibwa okuhikire?’ ”
17Nubwo yabarugireho, yaturuka orubuga, yagenda Betaniya kugonyayo.
Yesu naakyena omuti ogutarukwana
(Mar 11:12-14,20-24)
18Nyenkya, Yesu obu akaba naagaruka omu rubuga, yarumwa enjara. 19Obu yarozire omuti omutini ha muhanda rubaju, yaguhikaho, baitu tiyasangaho kantu okwihaho ebikoora byonka. Yagugambira ati: “Otaligarukira kwana ebijuma ebiro byona!” Ahonaaho omutini ogu gwahotoka. 20Abeegesebwa be obu baakirozire baahunirra muno, nibagamba bati: “Omutini gunu gwahotoka guta bwango?” 21#Mat 17:20; 1Kor 13:2.Yesu yabagarukamu ati: “Mazimakwo nimbagambira nti: Obu muraaba mwina okwikiriza mutarukugurukyagurukya, timulikora nk'ekyakorwa ha muti gunu kyonka, baitu noobu muligambira orusozi oru muti: ‘Sinduka ogwe omu nyanja’, nukwo kiriba. 22Obu muraaba mwina okwikiriza, kyona eki muraasabaga nimwesengereza, muraakiheebwaga.”
Ekikaguzo ha busobozi bwa Yesu
(Mar 11:27-33; Luk 20:1-8)
23Yesu obu yataahire omunju ya Ruhanga, banyakatagara abakuru n'abakuru b'abantu baija nambere ali nakyayegesa, baamukaguza bati: “Busobozi ki oburukukukoza binu, kandi okabuheebwa oha?” 24Yesu yabagarukamu ati: “Na nyowe ka mbakaguze ekikaguzo kinu; obu murangarukamu, nubwo ndabagambira obusobozi oburukunkoza binu. 25Okubatiza kwa Yohaana kukaruga nkaha? Kukaruga hali Ruhanga rundi omu bantu?” Bbo baatandika kuhakanizangana bati: “Obu turaagamba ngu: ‘Kukaruga hali Ruhanga’, naija kutukaguza ati: ‘Habwaki mutaramwikiriize?’ 26Baitu obu turaagamba ngu: ‘Kukaruga omu bantu’, nitutiina ekitebe ky'abantu, habwokuba boona bananukire Yohaana nkooku akaba ali murangi.” 27Nukwo baagarukamu Yesu bati: “Titumanyire.” Uwe yabagambira ati: “Na nyowe tindukwija kubagambira obusobozi oburukunkoza binu.”
Oruganikyo rw'abaana babiri
28“Nimuteekereza muta? Omusaija akaba aina abatabani be babiri; akagenda yagambira omukuru ati: ‘Mwana wange, hati genda okole omu rugonjo rw'emizaabbibbu.’ 29Omwana yamugarukamu ati: ‘Tindukugyayo’, baitu hanyuma yayegarukamu, yagenda. 30Isebo yagenda hali omuto yamugambira nk'ebi yagambiire omukuru. Nandiki uwe ati: ‘Ego taata,’ ka ngende; baitu tiyagyayo. 31Hali abo ababiri, nooha ayakozire ise eki akaba naagonza?” Baamugarukamu bati: “Omukuru.” Nandiki Yesu ati: “Mazimakwo nimbagambira nti: Abasorooza b'omusoro n'abamalaaya nibaija kubabanza kutaaha omu bukama bwa Ruhanga. 32#Luk 3:12; 7:29,30.Habwokuba Yohaana Omubatiza akaija hali inywe naabooleka omuhanda ogu musemeriire kurabamu, mutamwikirize; baitu abasorooza b'omusoro n'abamalaaya bbo bakamwikiriza. Inywe noobu mwarozire eki, nabwo muteegarukemu mukamwikiriza.”
Oruganikyo rw'abakozi ababi omu rugonjo rw'emizaabbibbu
(Mar 12:1-12; Luk 20:9-19)
33 #
Is 5:1,2. Yesu yabagambira ati: “Muhurre oruganikyo orundi. Hakaba haroho nyineeka ayabyaire orugonjo rw'emizaabbibbu, yaruzitirra, yalimamu endeeba, yayombekamu endindiro, yarusigira abapangisa, yagenda omu ihanga erindi. 34Obusumi bw'okunoga emizaabbibbu obu bwahikire, yatuma abaheereza be hali abapangisa abo, bamutwekere ha bijuma by'emizaabbibbu ye; 35abapangisa baakwata abaheereza be, omu baamuteera, owa kabiri baamwita, owa kasatu baamuteera amabaale. 36Yagaruka yatumayo abaheereza abandi baingi okukiraho ab'okubanza; nabo nukwo baabakozire. 37Hanyuma yabatumira mutabani we naateekereza ati: ‘Omwana wange baraamugayuka.’ 38Baitu abapangisa abo obu baarozire omutabani, baagambirangana bati: ‘Onu nuwe mugwetwa, leka tumwite, obugwetwa bube bwaitu.’ 39Baamukwata, baamuturukya aheeru y'orugonjo, baamwita. 40Boojo, mukama w'orugonjo obu aliija, abapangisa abo alibakoraki?” 41Baamugarukamu bati: “Abapangisa abo ababi alibahwerekereza, bafe kubi, kandi orugonjo rwe arukwase abakozi abandi abaraamuha ebijuma omu kasumi kaabyo.”
42 #
Zab 118:22,23. Yesu yabagambira ati: “Timukasomaga Ekyahandiikirwe ekirukugamba kiti:
‘Ibaale lyonyini aboombeki eri baayangire
niryo lyafookere bugumizo bw'enju;
kinu nikyo Ruhanga yakozire,
kandi nituhunirra kukirora’?
43Nahabweki nimbagambira nti: Obukama bwa Ruhanga bulibaihwaho buheebwe ihanga erirukukora ebikorwa ebirungi. [ 44Omuntu weena anyakugwa ha ibaale eri, alicwacwanuka; baitu ibaale ou lirigwera, lirimusasangura.]”
45Baanyakatagara abakuru n'Abafalisaayo obu baahuliire enganikyo ze, baamanya nkooku bali nubo arukugambaho. 46Baitu obu baagondeze kumukwata, baatiina enkuyanja y'abantu, habwokuba baamwetaga murangi.
Currently Selected:
Mat 21: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.