Mat 2
2
Abanyamagezi abaarugire Buruga-izooba
1Yesu obu yazairwe omu Betelehemu orwa Buyudaaya, omu businge bwa Herode Omukama, abasaija abanyamagezi bakaija Yerusaalemu nibaruga Burugaizooba, baakaguza bati: 2“Omukama w'Abayudaaya anyakuzairwe araha? Habwokuba tukarora enyunyuuzi ye Burugaizooba, hati twizire kumuramya.” 3Omukama Herode obu yahuliire eki, yatuntura hamu n'aba Yerusaalemu boona. 4Nubwo yasoroize banyakatagara abakuru n'abeegesa b'ebiragiro yabakaguliriza nambere Kristo ali w'okuzaarwa. 5Baamugarukamu bati: “Omu Betelehemu orwa Buyudaaya; habwokuba nukwo kyahandiikirwe omurangi kiti:
6 #
Mik 5:2. ‘Iwe Betelehemu orw'omu nsi ya Yuda,
toli muke omu balemi baayo;
habwokuba omuli iwe nuho haliruga omulemi
ow'alirema abantu bange Abaisirairi’.”
7Nubwo Herode yayesire abanyamagezi kumurora omunsita, yabakaguza muno bamumanyise akasumi konyini aka baaroliiremu enyunyuuzi. 8Yabatuma Betelehemu ati: “Mugende muserre muno omwana, obu muraamuzoora, mwije mummanyise, nukwo na nyowe ngende mmuramye.” 9Obu baamazire kuhurra omukama ebi yabaragiire, baagenda; kandi enyunyuuzi eri ei baaroliire Burugaizooba yabeebembera kuhika obu yayemeriire omwana nambere akaba ali. 10Obu baarozire enyunyuuzi, baakyanganuka muno. 11Kandi obu baataahire omunju, baarora omwana na Mariya nyina, baajumara, baamuramya, baasumurra ensaho zaabo, baamurabuka ebisembo: ezaabbu, obubbani, n'emigaju. 12Kandi obu baahabwirwe Ruhanga omu kirooto okutagaruka hali Herode, bakatwarwa omuhanda gundi kugarukayo owabu bo.
Okusingirwa Misiri
13Abanyamagezi obu baamazire kugenda, malaika wa MUKAMA yabonekera Yosefu omu kirooto, naagamba ati: “Imuka, otwale omwana na nyina, osingirwe Misiri, oikaleyo okuhika obu ndikugambira; habwokuba Herode ayeteekaniize kuseera omwana n'okumwita.” 14Nubwo Yosefu yaimukire ekiro, yatwara omwana na nyina, baagenda Misiri; 15#Hos 11:1.baikarayo kuhikya Herode obu yafiire. Nukwo MUKAMA eki yagambisize omurangi kihikirre ngu: “Nkeeta omwana wange aruge Misiri.”
Okwitwa kw'abaana abataina musango
16Herode obu yayetegeriize abanyamagezi nkooku baamugobiize, yakwatwa ekiniga kingi muno. Yaragira kwita abaana aboojo boona abakaba bali omu Betelehemu n'omu byaro ebiherraineho, abakaba bahikize emyaka ebiri n'abatakagihikize, naihirra ha kasumi abanyamagezi aka baamugambiire. 17Aho omurangi Yeremiya eki yarangire kyahikirra ngu:
18 #
Yer 31:15. “Iraka likahulirwa omu Rama,
ery'okutaabaana n'okuteera empamo;
Rakeeli naalirirra abaana be, atarukwenda kuhuu
muzibwa,
habwokuba boona bahoireho.”
Okugaruka Nazareeti
(Mat 2:19-23)
19Herode obu yamazire kufa, malaika wa MUKAMA yabonekera Yosefu omu kirooto ali Misiri, 20naagamba ati: “Imuka, otwale omwana na nyina, mugaruke omunsi ya Isirairi; habwokuba abaaserraga kwita omwana bafiire.” 21Nubwo yaimukire, yatwara omwana na nyina, baagarukayo omunsi ya Isirairi.
22Baitu Yosefu obu yahuliire Akiraho nkooku nuwe atiire engoma ya Herode ise, yatiina kugyayo. Obu yahabwirwe Ruhanga omu kirooto, yarugayo yagenda omu isaza lya Galiraaya. 23#Mar 1:24; Luk 2:39; Yoh 1:45.Yagenda yaikara omu rubuga orurukwetwa Nazareeti, nukwo ekyagambirwe abarangi kihikirre kiti: “Alyetwa Munyanazareeti.”
Currently Selected:
Mat 2: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.