Mat 19
19
Yesu naayegesa ha kutabinga mukazi
(Mar 10:1-12)
1Yesu obu yamazire kugamba ebi, yaruga Galiraaya yagenda omu kicweka kya Buyudaaya nseeri y'ekisaaru Yorudaani; 2ebitebe by'abantu baingi byamuhonderayo, yabakiza endwara.
3Abafalisaayo baija nambere ali, baamulenga nibamukaguza bati: “Ebiragiro bya Musa nibiikiriza omusaija kubinga mukazi we naamujunaana ensonga yoona?” 4#Kub 1:27; 5:2.Yesu yabagarukamu ati: “Timukasomaga ngu, Ogu ayabahangire kuruga omu kubanza, akahanga omusaija n'omukazi? 5#Kub 2:24.Yayongera ati: ‘Nikyo omusaija araalekeraga ise na nyina agumire hali mukazi we, kandi ababiri abo bafooke mubiri gumu.’ 6Nahabweki baba batakyali babiri, baitu omu Ruhanga eki yateeraniize, hatalibaho muntu akyahukaniza.” 7#Bir 24:1-4; Mat 5:31.Abafalisaayo baagaruka baamukaguza bati: “Kandi habwaki Musa yaikiriize omuntu kuha mukazi we ebbaruha y'okwahukana, nukwo amubinge?” 8Yabagarukamu ati: “Habw'okugumangana kw'emitima yanyu nikyo Musa yabaikiriize okubinga bakazi banyu, baitu okuruga kara koona kikaba kitalikwo. 9#Mat 5:32; 1Kor 7:10,11.Kandi nimbagambira nti: Omuntu weena anyakubinga mukazi we atamutuzire obusiihani, akaswera ondi, buli asiihaine; kandi weena aliswera omukazi anyakubingirwe, buli nawe asiihaine.”
10Abeegesebwa be baamugambira bati: “Eby'omusaija n'omukazi obu biraaba biri biti, haakire omuntu okutaswera.” 11Baitu uwe yabagarukamu ati: “Tibali boona abasobora kuhondera eki ngambire, kwihaho abo bonka Ruhanga aba akihaire. 12Habwokuba haroho abakonwa abaazairwe kwo, kandi haroho abaakonerwe abantu, kandi haroho abaayekonere bonka habw'obukama bw'omwiguru. Arukusobora kukwata kinu, akikwate.”
Yesu naatangirra abaana abato
(Mar 10:13-16; Luk 18:15-17)
13Nubwo baamuleetiire abaana abato abakwateho, abasabire. Abeegesebwa be baacoomera ababalesire; 14baitu Yesu yabagambira ati: “Muleke abaana bato baije nambere ndi, mutabatanga; habwokuba abali nk'abo, obukama bw'omwiguru bwabo.” 15Nubwo yabataho emikono, yarugayo.
Eby'omusigazi omuguuda
(Mar 10:17-31; Luk 18:18-30)
16Omuntu akaija hali Yesu, yamukaguza ati: “Mwegesa, kikorwa ki ekirungi eki nsemeriire kukora, nukwo ntunge obwomeezi obutahwaho?” 17Yamugarukamu ati: “Nonkaguliza ki ha kintu ekirungi? Haroho omurungi omu wenka. Obu oraaba noogonza kutaaha omu bwomeezi, okwatege Ebiragiro.” 18#Kurug 20:13; Bir 5:17; Kurug 20:14; Bir 5:18; Kurug 20:15; Bir 5:19; Kurug 20:16; Bir 5:20.Uwe yamukaguza ati: “Biragiro ki?” Yesu yamugarukamu ati: “Otaliita. Otalisiihana. Otaliiba. Otalihangirra. 19#Kurug 20:12; Bir 5:16; Lev 19:18.Otiinege sso na nyoko. Ogonzeege mutaahi wawe nkooku oyegonza wenka.” 20Omusigazi ogu yamugarukamu ati: “Ebi byona nkabikwata, ninkuyaburwaho kiha?” 21Nandiki Yesu ati: “Obu oraaba noogonza kuhikirra, genda otunde ebyawe byona, sente eziraarugamu ozigabire abaseege, nubwo olitunga itungo omwiguru; nukwo oije onkuraatire.” 22Omusigazi obu yahuliire eki, yagenda agwerirwe, habwokuba akaba aina itungo lingi.
23Yesu yagambira abeegesebwa be ati: “Mazimakwo nimbagambira nti: Ka nikiremeera omuguuda kutaaha omu bukama bw'omwiguru. 24Ninyongera kubagambira nti: Nikirahuka engamiya kuraba omu nyindo y'enkinzo, kukira omuguuda kutaaha omu bukama bwa Ruhanga.” 25Abeegesebwa be obu baahuliire kinu, baahunirra muno, baagamba bati: “Mara nooha alisobora kujunwa?” 26Baitu Yesu yabarolerra naabagambira ati: “Kinu abantu tibarukukisobora, baitu Ruhanga naasobora byona.” 27Nubwo Petero yamukaguza ati: “Dora itwe tukasiga byona twakuhondera; obu, tulitunga ki?” 28#Mat 25:31; Luk 22:30.Nandiki Yesu ati: “Mazimakwo nimbagambira nti: Omu bwomeezi oburukwija, Omwana w'omuntu obu aliikarra ha kitebe kye eky'ekitiinisa, na inywe abampondiire mulikarra ha bitebe ikumi na bibiri, mucwere emisango enganda ikumi na ibiri eza Isirairi. 29Omuntu weena ayasigire amaju ge, rundi bagenzi be, rundi banyaanya, rundi ise, rundi nyina, rundi abaana be, rundi ebibanja bye habwange, aliheebwa emirundi kikumi, kandi atunge n'obwomeezi obutahwaho. 30#Mat 20:16; Luk 13:30.Baitu baingi ab'okubanza baliba b'enyuma, kandi ab'enyuma baliba b'okubanza.”
Currently Selected:
Mat 19: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.