Mat 14
14
Okwitwa kwa Yohaana Omubatiza
(Mar 6:14-29; Luk 9:7-9)
1Omu kasumi ako, ow'isaza Herode akahurra okurangaanwa kwa Yesu; 2yagambira abagaragara be ati: “Ogu nuwe Yohaana Omubatiza ahumbuukire omu bafu; nikyo arukukorra eby'amaani ebi.” 3#Luk 3:19,20.Herode akaba akwasire Yohaana, yamuboha, yamuta omu nkomo habwa Herodiya, muka Filipo mugenzi we. 4#Lev 18:16; 20:21.Habwokuba Yohaana akahana Herode ati: “Ebiragiro bya Musa tibirukukwikiriza kuswera muramu waawe!” 5Herode noobu araaba yagondeze kumwita, baitu akatiina abantu, habwokuba Yohaana baamwetaga murangi. 6Ekiro ky'okuzaarwa kwa Herode obu kyahikire, muhara wa Herodiya akacekeca omumaiso g'abagenyi boona, Herode nawe yasemererwa, 7yaraganiza naarahira kumuha eki arakasaba kyona. 8Omwisiki habw'okuhanulirwa nyina, yagamba ati: “Mpeera ha sahaani hanu omutwe gwa Yohaana Omubatiza.” 9Ow'isaza yasaalirwa; baitu habw'okusangwa arahiire omu maiso g'abagenyi be, yaragira bagumuhe. 10Yatuma bagende omu nkomo batemeho Yohaana omutwe. 11Baaguleetera ha sahaani, baaguha omwisiki, nawe yagutwarra nyina. 12Abeegesebwa ba Yohaana bakaija baatwara omutumbi, baaguziika; nubwo baagenzire kugambira Yesu.
Yesu naaliisa abantu enkumi itaano
(Mar 6:30-44; Luk 9:10-17; Yoh 6:1-14)
13Yesu obu yahuliire amakuru ago, yarugayo ali omu bwato, yagenda omu irungu. Abantu obu baamanyire eki, baaruga omu mbuga, baamuhondera nibarubata. 14Obu yarugire omu bwato, yarora ekitebe kikooto ky'abantu, yabakwatirwa embabazi, yakiza abarwaire baabo. 15Izooba obu lyagoroobere, abeegesebwa bakaija baamugambira bati: “Hanu tuli omwirungu, kandi n'obwire bwaira; raga abantu bagende omu byaro beegurre ebyokulya.” 16Yesu yagamba ati: “Tibasemeriire kugenda; inywe mubahe ebyokulya.” 17Baamugambira bati: “Hanu twinaho emigaati etaano yonka n'encu ibiri.” 18Uwe yagamba ati: “Mubindeetere hanu.” 19Yaragira abantu kwikarra ha bunyansi; yakwata emigaati etaano n'encu ibiri, yararamira haiguru, yasiima, yabicwamu, emigaati yagiha abeegesebwa be, bagigabire abantu. 20Boona baalya, baiguta. Abeegesebwa obu baasoroize oburagalika obwasaagireho, bwaijuza ebigega ikumi na bibiri. 21Abasaija abaaliire baahikaga nk'enkumi itaano, otabaliiremu abakazi n'abaana.
Yesu naarubatira ha maizi
(Mar 6:45-52; Yoh 6:15-21)
22Yesu yaragira abeegesebwa be kugwerra omu bwato, bamubanze kwambuka nseeri y'enyanja, uwe abe naakyaraga abantu. 23Obu yamazire kubaraga, yatemba orusozi ali wenka kubaza na Ruhanga. Obwire bwaira akyaliyo wenka, 24baitu omu kasumi ako obwato bukaba buhikire omu nyanja hagati, nibuzongazonga habw'ebigonzi, habwokuba omuyaga gukaba gubaturukire omu maiso. 25Ha nkoko y'okubanza, Yesu yaija nambere bali naarubatira ha maizi. 26Abeegesebwa obu baamurozire naarubatira ha maizi baayekanga muno nibagamba bati: “Muzimu!” Baatoka habw'obutiini. 27Ahonaaho Yesu yabahuumuza ati: “Muhuumule, ninyowe; mutatiina.”
28Nukwo Petero kumugarukamu ati: “MUKAMA wange obu araaba ali iwe, ndagira nyije nambere oli nindubatira ha maizi.” 29Yesu yamugarukamu ati: “Rugayo.” Nubwo Petero yarugire omu bwato, yarubatira ha maizi ahike hali Yesu; 30baitu obu yarozire omuyaga gwaba mwingi, yatiina, yatandika kudikira omu maizi yayamirra ati: “MUKAMA wange, njuna!” 31Ahonaaho Yesu yagorra omukono gwe, yamukwata naagamba ati: “Iwe ow'okwikiriza kuke, habwaki noogurukyagurukya?” 32Obu baataahire omu bwato, omuyaga gwaculeera. 33Abakaba bali omu bwato baamuramya nibagamba bati: “Mazimakwo oli Mwana wa Ruhanga.”
Yesu naakiza abarwaire omu Genesareeti
(Mar 6:53-56)
34Obu baamazire kwambuka enyanja, baahika omu nsi ya Genesareeti. 35Abantu ab'omu kiikaro eki obu baamumanyiriire, baatuma hoona hoona omu kicweka eki, baamuleetera boona abarwaire. 36Baamwesengereza ngu, haakire abarwaire bakwate ha mukugiro gw'ekijwaro kye; kandi boona abaakwasireho bakakira.
Currently Selected:
Mat 14: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.