Mat 12
12
Yesu nuwe MUKAMA wa Sabbato
(Mar 2:23-28; Luk 6:1-5)
1 #
Bir 23:25. Omu kasumi ako Yesu akaba naaraba omu misiri y'engano ha kiro kya Sabbato; abeegesebwa be bakaba nibarumwa enjara, baatandika kucwa entwe z'engano nibazijungirra omu ngaro, nibalya. 2Baitu Abafalisaayo obu baarozire eki, baamugambira bati: “Dora abeegesebwa baawe nibakora ekitarukwikirizibwa ha Sabbato.” 3#1 Sam 21:1-6.Nawe yabagarukamu ati: Timukasomaga Daudi eki yakozire obu yarumirwe enjara, hamu n'abo aba akaba ainabo; 4#Lev 24:9.nkooku yataahire omunju ya Ruhanga yalya emigaati enyakuhongerwe etaraikirizibwaga kuliibwa muntu weena kwihaho abanyakatagara bonka? 5#Kubar 28:9,10.Rundi timukasomaga omu Biragiro bya Musa nkooku banyakatagara baasiisaga Sabbato nibakora omu Nju ya Ruhanga, kandi nkooku batarajunaanwaga musango? 6Nimbagambira nti: Hanu haroho arukukira Enju ya Ruhanga. 7#Mat 9:13; Hos 6:6.Kakuba mubaire mumanyire amakuru g'ekigambo kinu ngu: “Ningonza mukole ebikorwa by'embabazi kukira kuntambira ebyonzira, timwakuhenderiire abataina musango. 8Habwokuba Omwana w'omuntu nuwe MUKAMA wa Sabbato.”
Yesu naakiza ow'omukono ogukabire
(Mar 3:1-6; Luk 6:6-11)
9Yesu yarugayo, yataaha omu isorrokaniro lyabo. 10Hakaba harumu omuntu akabire omukono. Baakaguza Yesu bati: “Nikiikirizibwa okukiza ha Sabbato?” Nukwo babone ekyokumunyegerra. 11#Luk 14:5.Yabagarukamu ati: “Nooha omuli inywe kakuba aba aina entaama ye, ekagwa omu kiina ha Sabbato, atagiihamu? 12Baitu omuntu tali w'omuhendo kukira entaama? Nahabweki nikiikirizibwa kukora ebirungi ha Sabbato.” 13Aho yagambira omusaija ati: “Gorra omukono gwawe.” Yagugorra, gwakira, gwaba nk'ogundi. 14Nubwo Abafalisaayo baaturuka aheeru kuhanuura nkooku baraamwita.
Yesu omuheereza w'Atahwaho
15Yesu obu yamanyire eki, yarugayo, abantu baingi baamuhondera, kandi boona yabakiza. 16Yabateererra kutamuranganiza. 17Kinu kikabaho okuhikiriza ekyagambirwe omurangi Isaaya ati:
18 #
Is 42:1-4. “Onu nuwe muheereza wange ou nkomere,
omugonzibwa wange omwoyo gwange ou gusiimira
kimu.
Ndimutaho Mwoyo wange, amanyise Abanyamahanga
emicwere y'obulyo.
19Taliteera mpaka, talitoka, kandi tihalibaho alihurra
iraka lye omu makuute;
20orubingo oruhendekere talirucwa, n'ekibugo
ekirukucucuuka talikiraaza,
okuhikya eby'obulyo obu birisingura;
21kandi Abanyamahanga nuwe balyesiga.”
Yesu na Beelizebuli, mukuru w'emyoyo emibi
(Mar 3:20-30; Luk 11:14-23)
22Nubwo baaleesire omuntu akwasirwe omwoyo omubi, afiire amaiso n'omunwa. Yesu yamukiza, kateta yabaza, n'amaiso ge gaiguka. 23Abantu boona baahunirra, baakaguza bati: “Onu taakuba Mwana wa Daudi?” 24#Mat 9:34; 10:25.Baitu Abafalisaayo obu baahuliire eki, baagamba bati: “Ogu abinga emyoyo emibi habwa Beelizebuli, mukuru wayo.” 25Yesu obu yakengere ebiteekerezo byabo, yabagambira ati: “Obukama bwona obu bwecwamu kurwanisangana, buhwerekerra; kandi busaho rubuga rundi eka, obu byebaganizaamu, ebisobora kwikaraho. 26Sitaani nawe obu araaba naabinga Sitaani mutaahi we, ayebaganiizeemu kwerwanisa wenka; obukama bwe buliikaraho buta? 27Nyowe obu ndaaba nimbinga emyoyo emibi habwa mukuru wayo, abeegesebwa banyu bagibinga habw'oha? Nahabweki nubo balibacwera omusango. 28Baitu Omwoyo wa Ruhanga obu araaba ali nuwe ambingisa emyoyo emibi, buli obukama bwa Ruhanga bubahikireho.
29 #
Tob 8:3. “Rundi omuntu asobora ata kutaahirra omusaija ow'amaani akanyaga ebintu bye, atabandize kumukwata akamuboha? Obu nubwo asobora kunyaga eby'omu nju ye.
30 #
Mar 9:40. “Atali habwange, buli nampakaniza; kandi atasorooza na nyowe, ararangya. 31Nahabweki nimbagambira nti: Abantu baliganyirwa ebibi byona n'ebijumo byona; baitu anyakujuma Mwoyo Ahikiriire taliganyirwa. 32#Luk 12:10.Kandi weena aligamba kubi Omwana w'omuntu aliganyirwa; baitu alijuma Mwoyo Ahikiriire taliganyirwa omu businge bunu, noobu bwakuba omu businge obuliija.”
Omuti gumanyirwa ha bijuma byagwo
(Luk 6:43-45)
33 #
Sir 27:6; Mat 7:20; Luk 6:44. “Semeza omuti, n'ebijuma biraasemera; rundi guleke gusiisikale, n'ebijuma byagwo biraabiiha; habwokuba omuti gumanyirwa ha bijuma byagwo. 34#Mat 3:7; 23:33; Luk 3:7; Mat 15:18; Luk 6:45.Baana b'encwera inywe! Musobora muta kubaza ebigambo ebirungi, kunu muli babi? Habwokuba ebiijura omutima, nibyo akanwa kagamba. 35Omuntu omurungi aiha ebirungi omu lyahurro lye erirungi; n'omuntu omubi aiha ebibi omu lyahurro lye eribi. 36Nimbagambira nti: Ha kiro ky'okucwerwa omusango abantu balyesoborra ha buli kigambo ekibi eki baabalize; 37habwokuba ebigambo byawe nibyo birikwihisaaho omusango, kandi nibyo birigukusingisa.”
Abafalisaayo nibasaba akarorwaho
(Mar 8:11-12; Luk 11:29-32)
38 #
Mat 16:1; Mar 8:11; Luk 11:16. Abeegesa abamu ab'ebiragiro n'Abafalisaayo baasaba Yesu bati: “Mwegesa, nitugonza otuhe akarorwaho.” 39#Mat 16:4; Mar 8:12.Yabagarukamu ati: “Abantu ab'obusinge bunu obubi kandi obutarukwesigwa nibasaba akarorwaho; baitu tibaliheebwa karorwaho koona kwihaho aka Yona omurangi. 40#Yon 1:17.Yona nkooku yamazire omu nda y'encu emisana esatu n'ebiro bisatu, n'Omwana w'omuntu nukwo alimara ati okuzimu ebiro bisatu n'emisana esatu. 41#Yon 3:5.Ha kiro ky'okucwerwa omusango, abantu aba Nineve balyemerra n'abantu ab'obusinge bunu, babasingise omusango; habwokuba Yona obu yabarangiriire, bakeegarukamu; kandi hanu haroho arukukira Yona. 42#1 Bakam 10:1-10; 2 Byok 9:1-12.Ha kiro ky'okucwerwa omusango, Omukamakati owa Bukiizi obw'obulyo alyemerra, asingise omusango abantu ab'ebiro binu; habwokuba akaruga ha mpero y'ensi, yaija okuhurra amagezi ga Solomooni; kandi hanu haroho arukukira Solomooni.”
Omwoyo omubi naagaruka omu muntu
(Luk 11:24-26)
43“Omwoyo omubi obu guruga omu muntu, gugenda niguraba omu biikaro ebitarumu maizi niguserra h'okuhumurra, baitu tiguzooraho. 44Nubwo gugamba guti: ‘Kangaruke owange nambere narugire.’ Obu gugaruka, gusanga enju eri kwonka, esingoliirwe, eteekaniziibwe. 45Gugenda guleeta emyoyo emibi endi musanju erukugukira obubi, ija ikara omu; obwomeezi bw'omuntu ogu obwa hanyuma buba bubi kukira obw'okubanza. Ab'ebiro binu nabo nukwo baliba bati.”
Nyina Yesu n'abagenzi be
(Mar 3:31-35; Luk 8:19-21)
46Yesu obu akaba naakyabaza n'abantu, aho nyina n'abagenzi be baija, baayemerra aheeru, nibagonza kubaza nawe. 47Omuntu omu nukwo kumugambira ati: “Nyoko n'abagenzi baawe beemeriire aheeru nibagonza kubaza na iwe.” 48Baitu Yesu yamugarukamu ati: “Mau nooha? Kandi bagenzi bange nubo baha?” 49Nubwo yamuragirra abeegesebwa be naagamba ati: “Mau n'abagenzi bange nubo banu! 50Weena anyakukora Isenyowe ow'omwiguru ebi agonza, nuwe mugenzi wange, nuwe munyaanya nyowe, kandi nuwe mau.”
Currently Selected:
Mat 12: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.