मरकुस 8
8
च़ार हज़ार लोगु लै रोटी खिलाउणी
(मत्ती 15:32-39)
1सेज़ै बौगतै दी, तौंइऐ एक बौड़ी भीड़ कौठै हुई। तिऊं लोगु कै खाणा लै कुछ़ भी नाईं थौ। यीशुऐ आपणै च़ेलेऊ औटाइयौ बोलौ, 2“मुकै इऊं लोगु माथै तरस आशदै लागौ औन्दौ, कैलैकि इऐ चिया दिना ओउलै ई मुं आइलै। इउंकै खाणा लै नाईं कुछ़ भी आसतौ। 3इऊं हाऊं घौरै भुखै भेज़ु लै ता इउंकै डेउंदै-डेउंदै बाटा दी रिंगणौ लागा आ। कुछ़ लोग ता भौरी दुरा कु ई आशै औन्दै।” 4च़ेलेउऐ पुछ़ौ, “इऐं शुनशान ज़ागाह दी इऊं सारेऊ लै रोटी रौ इन्तज़ाम किणै कौरीऐ हुआ सा?” 5यीशुऐ पुछ़ौ, “तुमुकै केती रोटी ई?” तिंउऐ बोलौ, “सात।”
6तैबै यीशुऐ तिऊं लोगु लै धौनी बोशणा लै बोलौ। तैबै तिणीऐ सै सात रोटी आपणै हाथा दी पाकड़ी और परमेश्वरा रौ धन्यबाद दैऔ। तेत बासिऐ तिणीऐ रोटी चोड़ियौ आपणै च़ेलेऊ कै थाकौ दैंदै लागी। च़ेलै थाकै लोगु कै दैंदै लागी। 7तिउंकै कुछ़ माच़्छ़ी भी थी। माच़्छ़ी लै भी यीशुऐ परमेश्वरा रौ धन्यबाद देइयौ आपणै च़ेलेऊ लै बोलौ, “इऊं माच़्छ़ी लोगु लै बांटौ।” 8सारै लोगुऐ पेटा भौरीयौ खाऔ। तेती माथै भी तिउंकै सात बौड़ै छ़ाबड़ै रोटी रै बौच़ै। 9तिऐ रोटी खान्दै लगभग च़ार हज़ार लोग थै बोशौ औन्दै। तेत बासिऐ यीशुऐ सै आपणै-आपणै घौरै भेज़ै। 10यीशु तिदरा कु आपणै च़ेलेऊ आइलै खरकच़ार किश्ती दी बोशियौ दलमनूता रै इलाकै दी डैऔ।
फरीसीउ रै ज़ौरिऐ सौरगा रै निशाणा री मांग
(मत्ती 16:1-4)
11तिऐ कुछ़ फरीसी लोग यीशु काऐ आशीयौ बैहंस कौरदै लागै। सै तेस परखणा लै कुछ़ हैरान वाल़ै काम लागै मांगदै ज़ो एक सौरगा री निशाणी बौणा कि यीशु परमेश्वरा री तौरफा कु आ आशौ औन्दौ। 12यीशुऐ शौईं छ़ाड़ियौ तिउंलै बोलौ कि, “एज़ै पोस्तै रै लोग निशाणी कैलै मांगा ई? लोगु कै हाऊं केज़ी भी निशाणी ना देखाउंदौ।” 13तेत बासिऐ यीशु फरीसीउ छ़ाड़ियौ आपणै च़ेलेऊ आइलै किश्ती दी च़ौड़ियौ झ़िला रै दुजै धुरै दी डैऔ।
फरीसीउ और हेरोदेसा रौ संज़ेड़ौ
(मत्ती 16:5-12)
14च़ेलै रोटी निणै बिसरुई गौऐ थै। किश्ती दी तिउंकै सिरफ एका रोटी थी। 15यीशुऐ तिउंकै च़ितल़ाऔ, “शुणौ, फरीसी और राज़ै हेरोदेसा रै संज़ेड़ै कु बौच़ियौ रौएऊ।” 16पर च़ेलेउऐ यीशु रै बोलणै रौ मतलब ना सौमझ़ौ, और सै आपु मांझ़िऐ चौपड़िंदै लागै कि, “आमुकै रोटी नाईं, तैबै बोलौ औलौ यीशुऐ इणौ।” 17तिंउरै विच़ारा ज़ाणियौ यीशुऐ तिउंलै बोलौ, “तुमै आपु मांझ़िऐ कैलै ई लागै औन्दै चौपड़िंदै कि आमुकै रोटी नाईं? का तुमै नाईं सौमुझ़दै? तुमु दी दिमाग ना आसतौ? 18तुमु दी आखी ई, का तुमै देखी ना बौल़दै? तुमुकै कौन्थु ई, का तुमुकै शुणिदौ नाईं? का तुमुकै याद नाईं आसतौ? 19ज़ेबी मुंइऐ पांज़ रोटी कौरीयौ पांज़ हज़ार लोगु लै रोटी खिलाई, तेबी रोटी रै भौरै औन्दै केती छ़ाबड़ै बौच़ै ई?” च़ेलेउऐ ज़वाब दैऔ, “बारह छ़ाबड़ै।” 20यीशुऐ तौंइऐ बोलौ, “ज़ेबी मुंइऐ सात रोटी कौरीऐ च़ार हज़ार लोगु लै रोटी खिलाई, तेबी केती छ़ाबड़ै बौच़ै ई भौरै औन्दै?” तिंउऐ बोलौ, “सात।” 21तैबै यीशुऐ तिउंलै बोलौ, “का तुमै इबी झ़ांऊ भी ना सौमुझ़दै? हाऊं रोटी रै बारै दी नाईं बोला थौ पर हाऊं बोला थौ तुमुलै इणौ कि तुमै फरीसी लोगु और हेरोदेसा रै बुरै विच़ार और शिक्षा कु बौच़ियौ रौऔ।”
बैतसैदा दी एक शेड़ौ ठीक कौरणौ
22यीशु किश्ती कु उतरियौ आपणै च़ेलेऊ आइलै बैतसैदा गांवा दी आशौ। तिऐ लोगुऐ एक शेड़ौ यीशु काऐ आणौ। तिंउऐ तेसकु औरज़ कौरी कि, “छ़ौंअटी, तू एस शेड़ौ आपणै हाथै छ़ूं एरी।” 23यीशुऐ सौ शेड़ौ हाथा कु पाकड़ियौ गांवा कु बाइरै नियौं, तेसरी आखिऊ दी थूक लाइयौ और तेस माथै हाथा छ़ाड़ियौ बोलौ, “का ताउंकै दिशदै लागौ औन्दौ?” 24तिणीऐ उपरै देखीयौ बोलौ कि, “मुकै आदमी दिशदै ई लागै औन्दै। पर इऐ आदमी इणै दिशा ई ज़िणै च़ालदै-फिरदै पेड़ ई।” 25यीशुऐ दुबारौ तेसरी आखिऊ माथै हाथ छ़ाड़ौ। तिणी शेड़ौ बौड़ै ध्याना कौरीऐ देखौ और ठीक हुऔ। तेसरी आखी आच़्छ़ै कौरीऐ देखदै लागी। 26यीशुऐ सौ आदमी इणै बोलीयौ घौरै छ़ाड़ौ कि, “तू गांवा दी ना डेवै।”
पतरसा रौ प्रभु यीशु, मसीह मानणौ
(मत्ती 16:13-20; लुका 9:18-21)
27तैबै यीशु और तेसरै च़ेलै बैतसैदा छ़ाड़ियौ कैसरिया फिलिप्पी रै नीज़ुका रै गांवा भिलै डेउंदै लागै। बाटा दी यीशुऐ आपणै च़ेलेऊ कु पुछ़ौ, “लोग मुलै का बोलाई कि ‘हाऊं कुण ऊ?’ ” 28च़ेलेउऐ यीशु लै ज़वाब देइयौ बोलौ, “लोग तुमुलै यहुन्ना बपतिस्मौ दैणै वाल़ौ, या एलियाह, या कोई पुराणै बौगता रौ भविष्यवक्ता सौमझ़ा ई, ज़ुण मारीयौ ज़िउंदै हुऐ ई।” 29यीशुऐ बोलौ, “तुमै का बोलाई कि हाऊं कुण ऊ?” पतरसै ज़वाब दैऔ, “तुमै मसीहा ई। ज़ुण परमेश्वरै ई च़ुनौ औन्दै।” 30यीशुऐ तिउंकै च़ितल़ाऔ, “तुमुऐ ठीक बोलौ आ पर तुमै एज़ी बूश लोगु काऐ ना बोलेऊ।”
आपणै मौरणै रै बारै दी यीशु रै बोलणौ
(मत्ती 16:21-23; लुका 9:22)
31तैबै यीशु तिउंलै शिखाउंदै लागौ, “मुं आदमी रै छ़ोहरु लै इणौ ज़रूरी आ कि लोग मुं भौरी सतावा। और इणौ भी ज़ुरुरी आ कि यहुदी स्याणै लोग, बौड़ै याजक और यहुदी शास्त्री मेरी इज़्ज़त ना कौरा। और सै मुं ज़ुरुर झ़ांगा। तेत बासिऐ हाऊं चिजै दिनै ज़िउंदौ हुआ ऊ।” 32एज़ी बूश यीशुऐ आपणै च़ेलेऊ कै साफ-साफ बोली। तैबै पतरसै यीशु एकी भिलै नियौं और तेसलै डांटियौ बोलौ, “तांऐ इणौ नाईं जा थौ बोलणौ।” 33तैबै यीशुऐ पिछ़ाऊं मुड़ियौ आपणै च़ेलेऊ भिलै देखदी बारै पतरसा लै डांटियौ बोलौ, “मुकाऐ कु दूर डेऊ कैलैकि शैतान ताऊं कु इणी बुशै आ बोलाउंदै लागौ औन्दौ। तेरी सोच़-विच़ार परमेश्वरा ज़िणी नाईं आ, पर लोगु ज़िणी आ।”
यीशु पिछ़ु आण्डणै रौ मतलब
(मत्ती 16:24-28; लुका 9:23-27)
34यीशुऐ आपणै च़ेलै और दुजै लोग आपु काऐ औटाइयौ बोलौ, “ज़ुण भी मैरौ च़ेलौ बौणनौ च़ाहा लौ, सेऊ आपणी इच़्छ़ा छ़ाड़ा लौ, आपणौ क्रूस च़ुंगा लौ, और मुं पिछ़ु आशा लौ। (मतलब कि निन्दा और दु:ख सहन कौरालौ, और आपणै प्राणा दैणा लै भी त्यार रौआ) तैबै पा बौणा सौ मैरौ च़ेलौ। 35कैलैकि ज़ो आपणौ प्राण बौच़ाउणौ च़ाहा लौ तेसलै परमेश्वरा आइलै सौदा री ज़िन्दगी नाईं मिलदी। पर ज़ो मुकालै और मैरौ खुशी री खौबर शुणाउणै री बज़ाह कु आपणै प्राण दैणा लै तैयार औलौ, तेसलै परमेश्वरा आइलै सौदा री ज़िन्दगी मिला आ। 36लोग पुरी धौतरी री खुशी पाई बौल़ा ई, पर एथरौ का फाइदौ आ आपणौ प्राण खोआलौ पोरु? 37परमेश्वरा आइलै सौदा री ज़िन्दगी पाइणा लै आमै परमेश्वरा लै कुछ़ भी नाईं देई बौल़दै। 38ज़ुण इऊं गान्दै काम कौरणै वाल़ेऊ, और पापी लोगु काऐ मुं आदमी रौ छ़ोहरु और मेरी शिक्षा नाईं अपणावा लौ, ता ज़ेबी हाऊं भी आपणै पवित्र प्रभु रै दूता आइलै आपणै बाबा री शाना देखाइयौ आशु लै, तैबै हाऊं भी तिऊं नाईं अपणाउंदौ।”
Currently Selected:
मरकुस 8: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.