मरकुस 6
6
नासरता दी यीशु री बेइज़्ज़ती
(मत्ती 13:53-58; लुका 4:16-30)
1कफरनहूम गांवा कु निकल़ियौ यीशु आपणै गांव नासरता दी आशौ। तेसरै च़ेलै भी साथा दी डेवै। 2ज़ेबी आरामा वाल़ौ दीन आशौ यीशुऐ आराधनालय दी शिक्षा देई। तेसरी शिक्षा शुणियौ भौरी लोग हैरान हुऐ। तैबै सै बोलदै लागै कि, “इणी शिक्षा केशकु शिखी औली इणीऐ? और इणी शक्ति वाल़ै कामा कौरणै रौ हक्क कुणिऐ दैऔ आ एसकै? 3एस यीशु ता आमै भौरी पैहलै ओउलै ज़ाणी। एऊ ता मिस्त्री आ। एऊ मरियमा रौ छ़ोहरु, और याकूब, योसेस, यहुदा और शमौना रौ बौड़ौ भाई आ। एसरी बौइणी भी रौआ ई आमु मांझ़िऐ। इयौ सेज़ौ यीशु आ” एज़ै कारणै तिऊं लोगु कै तेस माथै शक हुऔ तिंउऐ तेस माथै विश्वास ना कियौ। 4यीशुऐ तिउंलै बोलौ, “भविष्यवक्ता री इज़्ज़त हुआ सारी ज़ागाह दी। सिरफ आपणै गांवा दी, आपणै रिश्तैदारा दी और आपणै घौरा दी नाईं औन्दी।” 5यीशुऐ तिऐ कुछ़ बिमार लोग छ़ुंइयौ च़ांगै कियै। बाकी तिंउरै अविश्वासा री वज़ाह कु सेऊ शक्ति रै भौरी काम नाईं कौरी बौल़ौ। 6यीशु कै तिंउरै अविश्वासा देखीयौ भौरी दु:ख और हैरानी हुई। और तैबै सेऊ शिक्षा दैंदी बारै गांव-गांवा दी घुमदै थौ लागौ औन्दौ।
बारह च़ेलेऊ भेज़णै
(मत्ती 10:5-15; लुका 9:1-6)
7यीशुऐ आपणै च़ुनै औन्दै बारह च़ेलै आपु काऐ औटाऐ, और तिऊं दुई-दुई कौरीऐ अलग-अलग ज़ागाह दी लागौ भेज़दै। तिणीऐ तिउंलै लोगु कु बुरी आत्माऐं गाड़नै रौ हक्क दैऔ। 8यीशुऐ बोलौ, “बाटा लै हाथा दी डिंगौ, लातु दी चैपलै रै अलावा कुछ़ भी ना निऐं ऊ, ना रोटी, ना बैग और ना ज़ेबा दी पैसै। 9दुजौ कुरतौ भी ना नियौं, ज़ो जुड़कै तुमुऐ भिड़ौ औन्दै ई, सै मोकते ई।” 10तौंइऐ यीशुऐ तिउंलै इणौ भी बोलौ, “ज़ेज़ै घौरा दी तुमु माना लै सेज़ै घौरा दी रौइणौ, ज़ेबी झ़ांऊ तुमै सेज़ै गांवा दी ई। 11केज़ै गांवा रै लोग तुमारी बुशै नाईं शुणा लै, तुमारी इज़्ज़त नाईं कौरालै, तैबै तिराकु निकल़ियौ आपणी चैपली री धूड़ भी पोरु झाड़ै ऊ। इणै देखीयौ सै सौमझ़ा ई कि परमेश्वर तिउंलै ज़ुरुर सौज़ा दिया आ। कैलैकि तिंउऐ परमेश्वरा री शिक्षा नाईं शुणी।” 12तेत बासिऐ सै बारह च़ेलै दुई-दुई कौरीऐ अलग-अलग गांवा दी डेइयौ शिक्षा दैंदै लागै कि, “मन बौदल़ौ, पापा री बाटा छ़ाड़ियौ परमेश्वरा री बाटा दी आशौ।” 13तिंउऐ भौरी लोगु कु बुरी आत्माऐं गाड़ी और बिमार लोगु रै मुंडा माथै तेला लाइयौ प्राथना कौरीयौ सै ठीक कियै।
यहुन्ना बपतिस्मौ देणै वाल़ै री मौत
(मत्ती 14:1-12; लुका 9:7-9)
14हेरोदेस राज़ै यीशु रै बारै दी शुणौ कैलैकि यीशु रौ नाऊं इबी च़ारौ तरफाई फैअली गौ थौ। यीशु रै बारै दी सारै लोगु री अलग-अलग राय थी। केज़ै बोला थै इणौ कि, यीशु यहुन्ना बपतिस्मौ दैणै वाल़ौ आ, ज़ो मुर्दे मांझ़िआ कु ज़िउंदौ हुई गौ आ। एज़ै कारण यीशु कै शक्ति वाल़ै काम ई लागै औन्दै हुंदै। 15कुछ़ लोग बोला थै इणौ कि, “एऊ एलियाह सा।” और कुछ़ लोग बोला थै इणौ कि, इयौ “पुराणै ज़मानै ज़िणौ भविष्यवक्ता आ।” 16राज़ै हेरोदेस अंतिपासै भी इऐ च़र्च़ा शुणी। सेऊ लागौ बोलदै कि, “यहुन्ना बपतिस्मौ दैणै वाल़ौ ज़ासरौ मुंइऐ मूंड कौटाऔ थौ, सौ ज़िउंदौ हुई गौ आ।” 17-18हेरोदेसै इणौ एथीलै सुंच़ौ थौ, कैलैकि तिणीऐ आपणै भाई फिलिप्पुसा री छ़ेउड़ी हेरोदियासा आइलै शादी की थी और यहुन्नै तेसलै बोलौ थौ कि ताऐं गलत कियौ आ, आपणै भाई री छ़ेउड़ी आपुलै छ़ाड़णी ताउंलै ठीक नाईं आ। एथीरी वज़ाह कु तिणीऐ यहुन्ना पकड़ाइयौ ज़ेला दी पौआऔ थौ। 19और हेरोदियास यहुन्ना कु नफरत कौरा थी और तेस झ़ौगाउणौ च़ाहा थी, पर इणौ नाईं हुई बौल़ौ, 20कैलैकि सेऊ राज़ौ ज़ाणा थौ कि यहुन्ना एक धौर्मी और पवित्र आदमी आ एथीलै तेसकु भौरी डौरा थौ, और तेस बौच़ावा थौ, और यहुन्ना री बुशै बौड़ै मौज़ै कौरीऐ शुणा थौ, शुणियौ घबरा भी थौ। 21एकी दिनै तेस राज़ै रौ जनम दीन आशौ। तिणी राज़ै आपणै जनम दिना लै परधान, फौज़ीऊ रै आफसर और गलीला रै बौड़ै-बौड़ै लोग थै, सारै औटाऐ। और तिउंलै खाणै पिणै रौ इन्तज़ाम भी थौ कियौ औन्दौ। 22सै लोग खाई-पियौ निपटै। तेत बासिऐ तिऐं हेरोदियासा री माइंऐ नाच़णौ-गाणौ शुरु कियौ। तिऐं मांई रै नाच़-गाणै इऐ ज़ेती भी मैहमान थै आशै औन्दै सित राज़ै भौरी खुश कियै। तिणी राज़ै तिऐं मांई लै बोलौ, “मांई, तैरै नाच़-गाणै देखीयौ मैरौ मन भौरी खुश हुई गौ आ, तू इणौ बोल तैरै का च़ांई, हाऊं तेस दिआऊ।” 23राज़ै कसम खाइयौ बोलौ, “इदरा झ़ांऊ कि तू मुकु मैरै राज़ा रौ आधौ हिस्सौ भी मांगा ली हाऊं तेस दैणा लै भी त्यार ऊ।” 24सै मांई आपणी आमा काऐ डेइयौ बोलदै कि राज़ौ इणौ बोला, “तैरै का च़ांई?” तैबै हेरोदियासै बोलौ, “इणौ बोल, यहुन्ना बपतिस्मौ दैणै वाल़ै रौ मूंड दैऔ काटियौ।” 25खरकच़ार सै मांई राज़ै काऐ डेई और राज़ै लै बोलौ कि, “मुकै यहुन्ना बपतिस्मा दैणै वाल़ै रौ मूंड दैऔ काटियौ थाल़ी दी।” 26राज़ौ भौरी परेशान हुऔ, और बोलौ “ओहो मांई, तांऐ का मांगौ इणौ पा?” पर आपणै वायदै री वज़ाह कु राज़ौ नाईं मुकरी बौल़ौ। कैलैकि राज़ौ आपणै मैहमानु रै सामनै बेइज़्ज़त नाईं च़ाहा थौ हुणौ। 27राज़ै आपणै एक सिपाई लै बोलौ, “ज़ेला दी डेऊ यहुन्ना रौ मूंड आण काटियौ।” 28सिपाई ज़ेला दी डैऔ, तिणीऐ यहुन्ना रौ मूंड एकी थाल़ी दी काटियौ आणौ, तैबै दैऔ तिऐं मांई कै। माइंऐ दैऔ आपणी आमा कै। 29तैबै इणै शुणियौ यहुन्ना रै च़ेलै आशै और ज़ेला दी डेइयौ यहुन्ना रौ मौड़ौ आणौ और यहुदी रीती-रिवाज़ा रै मुताबिक किरया-करम कियौ।
च़ेलेऊ री वापसी
(मत्ती 14:13,14; लुका 9:10)
30तैबै यीशु रै बारह च़ेलै गांव-गांवा कु वापिस आशै, ज़ो तिणीऐ दुई-दुई कौरीऐ भेज़ै थै। तिंउऐ ज़ो कियौ और शिखाऔ थौ, तेथरै बारै दी तेसकै बोलौ। 31तिऐ भौरी लोग थै आशदै-डेउंदै लागै औन्दै। तिउंकै तिऐं ज़ागाह दी रोटी खाणै रौ मौकौ भी ना मिलौ थौ। तिणीऐ तिऊं च़ेलेऊ लै बोलौ, “तुमै मुं आइलै एखुली ज़ागाह दी च़ालौ, तेशी दख ज़ेई आराम कौरौ।” 32तैबै यीशु और च़ेलै किश्ती दी बोशियौ एखुली ज़ागाह दी डेवै।
पांज़ हज़ार मौरदु लै रोटी खिलाउणी
(मत्ती 14:15-21; लुका 9:11-17; यहुन्ना 6:1-14)
33पर भौरी लोगुऐ यीशु डेउंदी बैरै देखै कि इऐ केशी डियाई। साथा दी रवायी भी ऐरै कि इऐ कुण ई। एज़ै कारण सै लोग तिऊंकु पैहलै तिऐं ज़ागाह दी पौउंच़ै। 34ज़ैबै यीशु किश्ती कु उतरौ ता तिऐं ज़ागाह दी भौरी बौड़ी भीड़ देखी आशी औन्दी, यीशु कै तिऊं लोगु देखीयौ दया आशी, कैलैकि सै लोग इणै थै ज़िणी बिण भेराल़डु री भेरै हुआई। तैबै सेऊ तिउंलै शिक्षा दैंदै लागौ। 35ज़ैबै ब्याल़ हुई गोई तैबै तेसरै च़ेलेउऐ तेस काऐ आशीयौ बोलौ, “इऐ ज़ागाह भौरी शुनशान आ। आबै राच हुई लागी आ। 36तुमै इऊं लोग नीज़ुका री बस्ती और गांवा दी छ़ाड़ौ ताकी इऐ लोग पैसेऊ देइयौ रोटी खाई बौल़ा।” 37इणै शुणियौ यीशुऐ तिऊं च़ेलेऊ लै बोलौ, “तुमै दैऔ इउंलै खाणा लै।” तिंउऐ बोलौ, “अगर आमुकै एती पैसै हुआ थै ज़ेती एक आदमी छ़ौ: मिहनै दी कौमावा, तैबै भी इउंलै खाणौ नाईं खिलाई बौल़ा थै।” 38यीशुऐ च़ेलेऊ कु पुछ़ौ, “तुमुकै केती रोटी ई? डैऔ और पौतौ कौरौ” च़ेलेउऐ लोगु कु पौतौ कौरीयौ बोलौ, “पांज़ रोटी और दुई माच़्छ़ी ई।” 39तैबै यीशुऐ सारै लोग अलग कौरीयौ लाइणी दी धौनी बोशाल़ै। 40और सै शौ-पचासा री पांगती दी बोशै। 41यीशुऐ सै पांज़ रोटी और दुई माच़्छ़ी आपणै हाथा दी पाकड़ी और सौरगा भिलै देखीयौ परमेश्वरा रौ धन्यबाद देइयौ आशीष मांगी। तेत बासिऐ यीशुऐ सै रोटी चोड़ियौ आपणै च़ेलेऊ कै थाकौ दैंदै लागी। च़ेलै थाकै लोगु कै दैंदै लागी। यीशुऐ सै दुई माच़्छ़ी भी लोगु मांझ़िऐ बांटी। 42सारै लोगुऐ पेटा भौरीयौ रोटी खाई। 43तेती माथै भी रोटी और माच़्छ़ी रै बौच़ै औन्दै बारह छ़ाबड़ै भौरै। 44और तिऊं रोटी खाणै वाल़ेऊ मांझ़िऐ सिरफ पांज़ हज़ार ता मौरद ई थै।
यीशु रौ पाणी माथी आण्डणौ
(मत्ती 14:22-23; यहुन्ना 6:15-21)
45तेत बासिऐ यीशुऐ खरकच़ार आपणै च़ेलेउलै बोलौ कि, “तुमै किश्ती दी च़ौड़ौ।” सै च़ेलै यीशुऐ बैतसैदा रै इलाकै दी आपु कु पैहलै भेज़ै ताकी सेऊ लोगु सौंभावा। 46यीशु भीड़ा रै लोगु छ़ाड़ियौ प्राथना कौरदै एक पहाड़ी माथै। 47ज़ैबै राच हुई तेबी च़ेलेऊ री किश्ती झ़िला रै मांझ़ा-मांज़ थी। यीशु थौ तेबी एखुली एकी ज़ागाह दी। 48यीशुऐ देखौ कि बागुर इउंरी किश्ती च़लाउणै ना दैंदौ। च़ेलेऊ कै किश्ती च़लाउणै री बौड़ी मुश्कल़ हुई गोई। सै च़ेलै गोऐ घबराई। दोतकै पौरै यीशु झ़िला दी पाणी माथै आण्डियौ च़ेलेऊ काऐ डैऔ। यीशु ताका थौ तिऊंकु झ़िला दी औगाड़िऐ डेउणौ। 49ज़िणी च़ेलेउऐ सौ पाणी माथै आण्डदै देखौ, सै च़ेलै घबराइयौ लागै राड़ै मारदै। तिंउऐ सुंच़ौ कि भूत आशी गौ आ। 50यीशुऐ तिउंलै तेबी बोलौ, “डौरौ नाईं। हिम्मत छ़ाड़ौ। हाऊं इदै।” 51तैबै यीशु च़ेलेऊ आइलै किश्ती दी च़ौड़ौ, सौ बागुर तेबी गौटौ। च़ेलै इणै देखीयौ भौरी हैरान हुऐ। 52रोटी रौ हैरानी वाल़ौ काम भी तिंउऐ देखौ थौ। पर सै सौमझ़ी ना बौल़ै कि यीशु दी केती शक्ति आ। तिंउरै मन भौरी ढीठ बौणी गोऐ थै।
गन्नेसरता गांवा दी रोगी ठीक कौरणै
(मत्ती 14:34-36)
53तेत बासिऐ सै गन्नेसरत गांवा दी पौउंच़ै, किश्ती बानी तिंउऐ डिका काऐ। 54ज़िणी सै किश्ती कु उतरै, तिदलै लोगुऐ यीशु खरकच़ार रवाऔ। 55तिदलै लोगुऐ दुड़ियौ सारै बिमार लोग बिस्तरै दी गिनियौ आणै। 56ज़िऐ-ज़िऐ यीशु गांवा दी या शहरा दी डिया थौ, तिऐ लोग बिमार लोगु बज़ारा दी बोशाल़ा थै। सै लोग यीशु काऐ औरज़ कौरा थै कि, “इऊं तुमारै जुड़कै रौ एक धुरौ दैऔ एरी छ़ुंइणै।” ज़ेती लोगुऐ भी यीशु छ़ुंऔ सै ठीक हुऐ।
Currently Selected:
मरकुस 6: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.