मरकुस 5
5
बुरी आत्मा वाल़ौ आदमी च़ांगौ कौरणौ
(मत्ती 8:28-34; लुका 8:26-39)
1यीशु और तेसरै च़ेलै झ़िला पारभिलै डेइयौ गिरासेनिऊ रै इलाकै दी पौउंच़ै। 2ज़िणी यीशु किश्ती कु उतरौ, तिणी खरकच़ार एक आदमी, ज़ासदी बुरी आत्मा थी, सौ तेसकु मिलौ। 3सेऊ आदमी तिऐ रौआ थौ ज़िऐ मौरै औन्दै लोगु दबावा ई। कैलैकि सेऊ भौरी खुंखार थौ तेस कोइयौ शांगल़ी दी भी ना बानी बौल़ा थौ। 4कैलैकि सौ बार-बार रौशै और शांगल़ी दी हुआ थौ बानौ औन्दौ, पर तिणीऐ सै शांगल़ी भी पोरु चोड़ी रशेउ रै भी कौरा थौ टुकड़ै-टुकड़ै। तेस केज़ौ भी आदमी आपणै वशा दी ना कौरी बौल़ा थौ। 5सौ लगातार राची-दिनै तिऐं ज़ागाह दी और ढोकै माथै डेइयौ राड़ै मारा थौ, और पात्थरु कौरीऐ आपणै ज़िसमा री च़ौरच़ै कौरा थौ। 6सौ आदमी यीशु देखीयौ दुरा कु तेस काऐ दुड़ौ। सौ धौनी झ़ुकियौ यीशु कै ढाल कौरदै लागौ। 7-8यीशुऐ तेस भितै ज़ो बुरी आत्मा थी, तियांलै बोलौ, “ओ बुरी आत्मा एस आदमी छ़ाड़ियौ बाइरै निकुल़।” बुरी आत्मै यीशु लै राड़ै मारीयौ बोलौ, “ओ परमेश्वरा रै छ़ोहरु यीशु। मुकु का च़ाहा ई? हाऊं तांउकु परमेश्वरा रै नावां कौरीऐ औरज़ कौराऊ कि तू मुलै दु:ख ना दै।” 9यीशुऐ तिऐं बुरी आत्मा कु पुछ़ौ, “तैरौ का नाऊं आ?” बुरी आत्मै बोलौ, “मैरौ नाऊं आ सेना, कैलैकि आमै भौरी सी।” 10तेस आदमी रै जरिऐ तिऐं बुरी आत्मै यीशु कै भौरी औरज़ कौरी कि, “आमु एस इलाकै कु बाइरै ना गाड़ै।” 11तिऐ पहाड़ा माथै सुंगरु रौ गोल़ थौ च़ौरदै लागौ औन्दौ। 12तिऐ बुरी आत्मै यीशु कु औरज़ कौरीयौ बोलौ, “आमु इऊं सुंगरु दी भेज़, आमै इऊं भितै डेई।” 13यीशुऐ तिउंलै हुकम दैऔ। सै बुरी आत्माऐं तेस आदमी कु निकल़ियौ तिऊं सुंगरु भितै डेई। सुंगरु रौ गोल़, ज़ो दुई हज़ारा रै लगभग थौ, मातौल़ै दुड़ियौ, पौड़ै झ़िला दी। तैबै मौरै तिऐ डुबियौ।
14तिऊं सुंगरु च़ारणै वाल़ै भागै पोरु, तिंउऐ शहरा, गांवा दी डेइयौ लोगु कै इऐ खौबर शुणाई। और ज़ो कुछ़ हुऔ थौ तेस देखणा लै लोग आशै। 15सै यीशु काऐ डेवै। तिंउऐ सेऊ आदमी ज़ासदी बुरी आत्मा री पुरी सेना थी, जुड़कै भिड़ीयौ और दिमाग ठीक हुइयौ बोशौ औन्दौ देखौ। तैबै सै लोग डौरी गोऐ। 16इऊं देखणै वाल़ै लोगुऐ सुंगरु और ज़ासदी सै बुरी आत्माऐं थी, तेसरौ पुरौ हाल तिऊं दुजै लोगु कै शुणाऔ। 17तैबै तिऊं लोगुऐ यीशु कै औरज़ कौरी और बोलौ, “छ़ौंअटी। आमारै इलाकै कु पोरु डेऊ।” 18ज़ैबै यीशु किश्ती दी लागौ च़ड़दै, तैबै सौ, ज़ासदी पैहलै सै बुरी आत्मा थी, यीशु कु औरज़ कौरदै लागौ, “मुं आपु आइलै दैऔ रौइणै।” 19पर यीशुऐ सौ आपु आइलै ना दैऔ आशणै, और तिणीऐ तेसलै बोलौ, “आपणै घौरै डेऊ और आपणै लोगु कै बोलै कि ताऊं माथै दया कौरीयौ प्रभुऐ ताउंलै किणै बौड़ै काम किएई।” 20यीशु रै बोलणै माथै सौ डैऔ और दिकापुलिस परदेशा दी एज़ी बुशा रौ परचार लागौ कौरदै कि, “यीशुऐ मुलै किणै बौड़ै काम किऐ ई।” इणै शुणियौ सारै लोग हैरान हुऐ।
याईरा री मौरी औन्दी छ़ोटी और एक रोगली छ़ेउड़ी
(मत्ती 9:18-26; लुका 8:40-56)
21ज़ैबै यीशु तौंइऐ किश्ती दी झ़िला पारभिलै डेवै, तिऐ डिका दी यीशु काऐ एक बौड़ी भीड़ कौठै हुई। 22तैबै आराधनालय रौ एक मुखियौ यीशु काऐ आशौ। तेसरौ नाऊं थौ याईर। सौ तेस देखीयौ तेसरी लातेऊ माथै पौड़ौ। 23तिणीऐ यीशु कै औरज़ कौरी, और इणौ बोलौ, “मेरी छ़ोटी मांई मौरणै वाल़ी आ, तुमै मैरै घौरा कै आण्डियौ मेरी मांई माथै हाथ छ़ाड़ौ, तैबै सै मांई च़ांगी हुआ आ, और सै मौरणै कु बौच़ा आ।” 24तैबै यीशु तेस आइलै डैऔ। एक भौरी भीड़ तेस पिछ़ु च़ाल पौड़ी, इदरा झ़ांऊ कि लोग यीशु माथै पौड़दै थै लागै औन्दै। 25तिऐ एक छ़ेउड़ी थी, तिंया दी बारह साला ओउलै लोऊ बौइणै री बिमारी थी। 26तियांऐ भौरी डाक्टरु कु इलाज़ कौराइयौ भी दु:ख उठाऔ। आपणी सारी धन-ज़यदाद खौर्च़ कौरीयौ भी तियांलै कुछ़ सुख ना मिलौ, पर तिंयारी बिमारी औज़ौ भी बौड़दै लागी। 27तियांऐ यीशु रै बारै दी शुणौ थौ कि तिणीऐ बिमार च़ांगै किऐ ई सै भीड़ा मांझ़िऐ यीशु पिछ़ु आशी। 28सै बोला थी कि, “हाऊं यीशु रै जुड़कौ छ़ूंऊं लै ता हाऊं ठीक हुआ ऊ।” 29तियांऐ यीशु रौ जुड़कौ छ़ुंऔ और तेबी तिऐं छ़ेउड़ी रौ लोऊ बौइणौ बंद हुऔ। तियांकै आपणै ज़िसमा दी च़ौगरु ई ऐरौ कि, “हाऊं च़ांगी हुई गोई।” 30यीशुऐ आपणै ज़िवा दी च़ौगरौ कि, “मुकु शक्ति निकल़ी आ।” तैबै खरकच़ार भीड़ा दी पिछ़ाऊं मुड़ियौ पुछ़ौ, “मैरौ जुड़कौ कुणिऐ छ़ुंऔ?” 31यीशु रै च़ेलेउऐ तेसलै बोलौ, “तुमै देखदै ई लागौ औन्दै कि तुमु माथै भीड़ आ लागी औन्दी पौड़दै। तौंइऐ भी पुछ़ा ई तुमै इणौ कि, ‘हाऊं कुणिऐ छ़ुंऔ?’ ” 32तैबै यीशुऐ लोगु भिलै देखौ कि, “हाऊं कुणिऐ छ़ुंऔ औलौ?” 33सै छ़ेउड़ी इणौ ज़ाणियौ कि तिंया आइलै केती भौलौ काम हुऔ, डौरीयौ और कांबीयौ यीशु काऐ आशी। सै तेसरी लातेऊ माथै पौड़ी और तियांऐ तेस काऐ आपणौ सारौ हाल सौच़्च़-सौच़्च़ बोलौ। 34यीशुऐ तियांलै बोलौ, “धीया, तू च़ांगी हुई गोई कैलैकि तांऐ मुं माथै विश्वास छ़ाड़ौ। आरामा कौरीऐ डेऊ, और आपणी दु:ख पिड़ा कु बौच़ी रौऊ।” 35ज़ैबै यीशु बोलदै थौ लागौ औन्दौ, तैबै आराधनालय रै मुख्यै याईरा रै घौरा कु लोगुऐ आशीयौ याईरा लै बोलौ, “तुमारी मांई मौरी गोई। आबै गुरु लै कौष्ट ना दैऔ।” 36ज़ो बूश सै लोग बोलदै थै लागौ औन्दै, यीशुऐ तिऐं बुशा री कौन्थशुणी की, और तेस आराधनालय रै मुख्यै याईरा लै बोलौ, “नाईं डर! सिरफ विश्वास छ़ाड़! सै ज़िउंदी हुआ आ।” 37यीशुऐ पतरस, याकूब, और याकुबा रौ भाई यहुन्ना आपणै साथा दी निऐं, तिणीऐ औज़ौ कोइयौ ना नियौं। 38यीशु याईरा रै घौरा दी पौउंच़ै। तिणीऐ लोग लेरदै, छ़ाती पिटदै और राड़ै मारदै देखै। 39यीशु घौरा भितै डेवै और तिउंलै बोलौ, “तुमै कैलै ई लागै औन्दै हालै पाइंदै और लेरदै? इऐ मांई मौरी नाईं बल्कि सुती औन्दी आ।” 40सै इऐं बुशु शुणियौ यीशु रौ मज़ाक उड़ाउंदै। पर तिणीऐ सारै आदमी बाइरै गाड़ै। आपु डैऔ तिऐं मांई रै मां-बाब और तिऊं चीन च़ेलेऊ आइलै भितरै, ज़िऐ सै मांई थी। 41यीशुऐ तिऐं मांई रौ हाथ पाकड़ौ और तियांलै आपणी बोली दी बोलौ, “तलीता कूमी” ज़ेथरौ मतलब इणौ आ, “ओ मांई! हाऊं ताउंलै बोलाऊ, उठ।” 42मांई खरकच़ार उठीयौ च़ालदै-फिरदै लागी। (सै बारह साला री थी) इणै देखीयौ सै खरकच़ार भौरी हैरान हुऐ। 43यीशुऐ तिउंकै च़ितल़ाऔ कि एज़ी बुशा रौ कासी कै पौतौ ना च़ांई लागौ। और इणौ भी बोलौ, “इऐं मांई लै कुछ़ खाणा-पिणा लै दैऔ।”
Currently Selected:
मरकुस 5: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.