मरकुस 2
2
अधरौंगा वाल़ौ आदमी च़ांगौ कौरणौ
(मत्ती 9:1-8; लुका 5:17-26)
1कुछ़ दिना बासिऐ यीशु कफरनहूम गांवा दी वापिस आशौ। लोगुऐ शुणौ कि यीशु एकी घौरा दी आ। 2तैबै तिऐ एतरै लोग भौरुऐ कि दारा काऐ भी ज़ागाह नाईं थी। यीशु तिऊं काऐ परमेश्वरा रै वचना शुणाउंदै थौ लागौ औन्दौ। 3तैबै तिदै च़ार आदमीउऐ च़ुंगियौ एक इणौ आदमी आणौ ज़ासकै आपणै ज़िसमा रौ केज़ौ भी आंग नाईं हिलाइया थौ। 4भौरी लोगु री भीड़ा ई तिउंकै यीशु काऐ नाईं पउंच़ुऔ। एज़ी ताईं तिंउऐ उपरै स्वाणै पारै च़ौड़ियौ तेस घौरा रै छ़ापरा कु कुछ़ ज़ाण्दै गाड़ीयौ बिस्तरै रै च़ार कुणै दी लोऊल़ी बानियौ सेज़ौ बिमार आदमी यीशु काऐ धौनी उतारौ। 5तैबै यीशु तिऊं च़ार लोगु रौ विश्वास देखीयौ बिमार आदमी लै बोलौ, “ओ गोश्टण, तैरै पाप माफ हुई गोऐ ई।”
6तैबै ज़ो तिऐ यहुदी शास्त्री थै बोशै औन्दै, सै आपणै मौना दी सुंच़दै लागै कि, 7“एऊ यीशु इणौ कैलै बोला आ? इयौ परमेश्वरा री बुराई कौरा आ! पाप ता सिरफ परमेश्वर ई माफ कौरा सा?” 8यीशुऐ खरकच़ार तिउंरै मौना री बुशै ज़ाणीऔ बोलौ, “तुमै आपणै मौना दी का ई लागै औन्दै सुंच़दै? 9आसान का सा? बिमार आदमी लै इणौ बोलणौ कि, ‘तैरै पाप माफ हुई गोऐ’ या इणौ बोलणौ कि, ‘खौड़ौ उठ, आपणौ बिस्तरौ च़ुंग और आण्डदै लाग्ग?’ 10एथीलै तुमुकै देखाउणा लै कि पाप माफ कौरणै रौ हक्क मुकै आ, ज़ुण परमेश्वरा री तौरफा कु भेज़ौ औन्दौ,” तैबै यीशुऐ तेस बिमार आदमी देखीयौ बोलौ, 11“हाऊं ताउंलै बोलाऊ, खौड़ौ उठ, आपणौ बिस्तरौ च़ुंग और घौरै डेऊ।” 12तैबै सेऊ आदमी खरकच़ार सारै लोगु काऐ उठौ और आपणै बिस्तरै च़ुंगियौ बाइरै डैऔ। तिऐ सारै लोग इणै देखीयौ हैरान हुऐ और इणै बोलीयौ परमेश्वरा री बौड़ाई कौरी, कि “इणौ आमुऐ पैहलै केबी ना देखौ।”
लेवी औटाउणौ
(मत्ती 9:9-13; लुका 5:27-32)
13यीशु तेस घौरा कु गलील झ़िला रै डिका काऐ डैऔ। तैबै लोगु री भीड़ यीशु काऐ डेई। यीशु लागौ तिऐ तिउंलै शिक्षा दैंदै। 14तेत बासिऐ यीशु दुजी ज़ागाह दी डैऔ। तैबै यीशुऐ हलफई रौ छ़ोहरु देखौ ज़ासरौ नाऊं लेवी थौ। सौ मामलै निणै वाल़ेऊ रै आड्डै माथै थौ बोशौ औन्दौ। यीशुऐ तेसलै बोलौ, “मुं पिछ़ु आश।” तैबै सौ उठीयौ यीशु पिछ़ु लागौ आण्डदै।
15एकी दिनै तिणी मामलै निणै वाल़ै लेवीऐ यीशु आपणै घौरा दी रोटी खांदै औटाऔ। मामलै निणै वाल़ै और पापी लोग भी बोशै रोटी खांदै कैलैकि सै यीशु पिछ़ु च़ाला थै, यीशु रै च़ेलेऊ आइलै। 16यहुदी शास्त्री ज़ासलै फरीसी भी बोला थै कैलैकि सै आपुलै धौर्मी सौमझ़ा थै, तिंउऐ देखौ कि यीशु मामलै निणै वाल़ेऊ और पापी लोगु आइलै रोटी खांदै लागौ औन्दौ। तैबै तिंउऐ यीशु रै च़ेलेउलै बोलौ, “यीशु कैलै खा सा इऊं मामलै निणै वाल़ेऊ और पापी लोगु आइलै रोटी?”
17यीशुऐ इणै शुणियौ तिउंलै बोलौ, “भौलै-च़ांगेउ लै डाक्टरा री ज़ुरत नाईं औन्दी, पर बिमार लोगु लै डाक्टरा री ज़ुरत हुआ सा। हाऊं धौर्मी लोगु नाईं बल्कि पापी लोगु औटाउंदै ऊ आशौ औन्दौ।”
ब्रौता रौ सवाल
(मत्ती 9:14-17; लुका 5:33-39)
18यहुन्ना बपतिस्मौ दैणै वाल़ै रै च़ेलै और फरीसी थै ब्रौत कौरदै लागै औन्दै। तैबै सै यीशु काऐ आशीयौ यीशु लै बोलदै लागै, “यहुन्ना रै च़ेलै और फरीसी रै च़ेलै ता कौरा ई ब्रौत। पर तुमारै च़ेलै ब्रौत नाईं कौरदै। इणौ कैलै सा?” 19यीशुऐ तिउंलै बोलौ, “ज़ेबी झ़ांऊ लाड़ौ साथा दी हुआ, का बराती ब्रौत कौरदै लागा ई? ज़ेबी झ़ांऊ लाड़ौ बरातीउ आइलै हुआ, सै खुश हुआई। एथीलै तिउंकै ब्रौत कौरणै री कोई ज़ुरत नाईं 20पर सेज़ै दीन आशालै, ज़ेबी लाड़ौ तिऊंकु अलग कौरालै, सेज़ै बौगता दी सै ब्रौत कौरा ई।”
21यीशुऐ इणौ भी बोलौ, “केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाइंदौ। नाईं ता धोइदीं बारै सेऊ नौऐं जुड़कै रौ टालकौ तेस पुराणौ जुड़कौ पोरु थोसियौ ज़ादड़ौ च़ीरा सा।” 22यीशुऐ तिउंलै इणौ औनैणौ भी दैऔ, “कोई भी आदमी अंगुरा री सूर चाणना लै ताज़ै अंगुरा रौ रस पुराणै खाल़ढै दी नाईं छ़ाड़दौ। नाईं ता अंगुरा रौ रस दख बौगता बासिऐ फैलीयौ तेस पुराणौ खाल़ढौ भी पोरु च़ीरा, ज़ेथ कौरीऐ अंगुरा रौ रस और खाल़ढौ दुइया बरबाद हुआई। एथीलै ताज़ै अंगुरा रौ रस नौऐ खाल़ढै दी भौराई।”
आरामा रै दिना रौ भी प्रभु
(मत्ती 12:1-8; लुका 6:1-5)
23इणौ हुऔ कि एकी दिनै यीशु आपणै च़ेलेऊ आइलै आरामा वाल़ै दिना दी डोखरेऊ दी थौ लागौ औन्दौ डेउंदै। यीशु रै च़ेलेऊ कै थी भूख लागी औन्दी। तेस डोखरै दी थै गीऊं बौऔ औन्दै, सै च़ेलै लागै तिऊं गीऊं सै सीला चोड़ियौ खांदै। 24तैबै फरीसीउऐ यीशु लै बोलौ, “देखौ। ज़ेज़ौ काम आरामा रै दिना दी कौरणौ मौना सा, सेज़ौ काम तुमारै च़ेलै कैलै कौरा ई?”
25यीशुऐ तिउंलै बोलौ, “धौर्म शास्त्रा दी तुमुऐ ज़ुरुर पौढ़ौ औलौ कि ज़ेबी राज़ौ दाऊद और तेसरै साथी भुखै थै, तिउंकै खाणा लै कुछ़ भी नाईं थौ, तैबै दाऊदै का कियौ? 26आपणी ज़ुरता लै परमेश्वरा रै ताम्बु दी अबियातार नावां रै परधान याजका काऐ डेइयौ और तिऐ परमेश्वरा लै चड़ाई औन्दी भोगा री रोटी खाई और आपणै साथीऊ लै भी देई, ज़ो सिरफ याजक ई खा थै।” 27यीशुऐ तिउंलै इणौ भी बोलौ, “परमेश्वरै आरामा रौ दीन आमारै फाइदै लै चाणौ आ, ना कि आदमी आरामा रै दिना रै नियम मानणा लै चाणौ।” 28यीशुऐ इणौ भी बोलौ, “हाऊं आदमी रौ छ़ोहरु आरामा रै दिना रौ भी प्रभु ऊ।”
Currently Selected:
मरकुस 2: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.