मत्ती 27
27
पिलातुसा रै सामनै यीशु
(मरकुस 15:1; लुका 23:1,2; यहुन्ना 18:28-32)
1ज़ेबी दोउत हुई ता सारै बौड़ै याजक और लोगु रै स्याणै लोगुऐ यीशु झ़ांगणौ च़ाऔ। 2तिंउऐ यीशु बानौ और नीईंयौ पिलातुसा कै सौंभाल़ौ ज़ो रोमी सरकारा रौ आफसर थौ।
यहुदा फाई दी लौटका
(प्रेरित 1:18-19)
3ज़ैबै यीशु पकडाउणै वाल़ै यहुदै देखौ की सेऊ मौउता आरोपी चाणी गौ आ ता सेऊ भौरी पछ़ताऔ और सै च़ांदी रै तीस सिक्कै बौड़ै याजक और स्याणै लोगु काऐ वापिस आणै। 4और तिणीऐ बोलौ, “मुंइऐ बेकसूर आदमी झ़ांगणा लै पकड़ाइयौ पाप कियौ आ!” तिंउऐ तेसलै बोलौ, “आमै का कौरी? तू ई ज़ाण।” 5तैबै यहुदै सै सिक्कै परमेश्वरा रै घौरा रै खौल़ै दी शोटीयौ डेई गौ, और डेइयौ आपु दी फांसी लाई। 6बौड़ै याजकै सै सिक्कै च़ुंगै और बोलौ, “इऐ, खज़ाना दी छ़ाड़णै ठीक नाईं, कैलैकि इऐ सिक्कै लोऊ री किम्मत ई।” 7तैबै सै चौपड़ुऐ और तिंउऐ तिऊं सिक्कै कौरी परदेशी दाबणा लै कुम्हारा रौ डोखरौ खरीदी गौ। 8एज़ै कारणै तेस डोखरा लै आज़ा झ़ांऊ लोऊ रौ डोखरौ बोलाई। 9तैबै ज़ो वचन यिर्मयाह भविष्यवक्ता रै ज़ौरिऐ थौ बोलौ औन्दौ सेऊ पुरौ हुऔ, “तिंउऐ सै तीस सिक्कै मतलब सै ठहराई औन्दी कीमत (ज़ो इस्राइला री संताना मांझ़िऊ कु काइएउऐ थी ठहराई ऐन्दी) नीं गौऐ। 10और ज़िणी प्रभुऐ मुलै हुकम दैऔ थौ तिणी ई तिऊं पैसेऊ कौरी कुम्हारा रौ डोखरौ खरीदौ।”
पिलातुसा रै सवाल
(मरकुस 15:2-5; लुका 23:3-5; यहुन्ना 18:33-38)
11ज़ेबी यीशु पिलातुस आफसरा काऐ खौड़ौ थौ ता आफसरै तेसकु पुछ़ौ, “का तू यहुदिया रौ राज़ौ ई?” यीशुऐ तेसलै बोलौ, “तू आपु ई बोलदै लागौ औन्दौ।” 12ज़ैबै बौड़ै याजक और स्याणै यीशु माथै आरोप थै लाइंदै लागै औन्दै, ता यीशुऐ कुछ़ ज़वाब नाईं दैऔ। 13एथ माथै पिलातुसै यीशु लै बोलौ, “का तू नाईं सुंच़दौ कि इऐ तैरै बारै दी केती गवाही ई दैंदै लागै औन्दै?” 14पर यीशुऐ तेसलै एक भी बुशा रौ ज़वाब नाईं दैऔ, इदरा झ़ांऊ की आफसरा कै बौड़ी हैरानी हुई।
मौरणै री सौज़ा रौ हुकम
(मरकुस 15:6-15; लुका 23:13-25; यहुन्ना 18:39; 19:16)
15पिलातुस आफसरा रौ इणौ रिवाज़ा थौ कि तेस फसह रै साज़ै दी लोगु कालै कास एक कैदी ज़ास सै लोग च़ाहा थै, तेस आज़ाद कौरा थै। 16सेज़ै बौगतै तिउंरी कैदा दी बरअब्बा नावां रौ एक मानौ औन्दौ कैदी थौ। 17ज़ैबै सै कौठै हुऐ, ता पिलातुसै तिउंलै बोलौ, “तुमै कास च़ाहा ई कि हाऊं तुमु कालै छ़ाड़ु? बरअब्बा, या यीशु ज़ासलै मसीहा बोलाई?” 18कैलैकि पिलातुस ज़ाणा थौ बौड़ै याजक लोग यीशु री मीश कौरा ई। तैबै यीशु पकड़ाऔ आ। 19ज़ैबै पिलातुस फैसलै कौरणै वाल़ी गाद्दी माथै बोशौ औन्दौ थौ ता तेसरी छ़ेउड़ीऐ तेसलै बोलौ, “तू एस धौर्मी रै मामला दी आपणौ हाथ नाईं पा, कैलैकि मुंइऐ आज़ सुइणा दी तेसरी वज़ाह कु भौरी दु:ख उठाऐ ई” 20बौड़ै याजकै और स्याणै लोगुऐ आपणै लोग उकसाऐ कि सै बरअब्बा मांगा लै, और यीशु झ़ांगा लै पोरु। 21पिलातुसै तिऊंकु पुछ़ौ, “इऊं दुई मांझ़िआ कु कास च़ाहा ई कि हाऊं तुमु कालै छ़ाड़ु?” तिंउऐ बोलौ, “बरअब्बा।” 22पिलातुसै तिऊंकु पुछ़ौ, “तैबै यीशु, ज़ासलै मसीह बोलाई, एसरौ का कौरु?” सौभीऐ तेसलै बोलौ, “एस क्रुसा माथै च़ड़ाऔ!” 23पिलातुसै बोलौ, “कैलै, इणीऐ का बुराई की आ?” पर सै औज़ौ भी ज़ोरै-ज़ोरै च़िल्लाइयौ बोलदै लागै, “एस क्रुसा माथै च़ड़ाऔ।” 24ज़ैबै पिलातुसै देखौ कि कुछ़ बौणदै नाईं लागौ औन्दौ पर तिदै भौरी भीड़-भड़ाकौ औन्दै लागौ, ता तिणीऐ पाणी नियौं और भीड़ा काऐ आपणै हाथ धोऐ और बोलौ, “हाऊं एस धौर्मी रै लोऊ कु बेकसूर ऊ। तुमै इऐ ज़ाणौ।” 25सारै लोगुऐ ज़वाब दैऔ, “एसरौ लोऊ आमु माथै और आमारै संताना माथै पौड़ा!” 26एथ माथै पिलातुसै बरअब्बा तिऊं कालै छ़ाड़ी गौ, और यीशु दी कोड़ै लाइणा लै और क्रुसा माथै च़ड़ाउणा लै बोली ऐरौ।
सिपाईउ रै ज़ौरिऐ यीशु री बेइज़्ज़ती
(मरकुस 15:16-20; यहुन्ना 19:2-3)
27तैबै पिलातुसा रै सिपाइउऐ यीशु मैहला दी निऔं और सारी पल़टन यीशु रै च़ारौ तौरफ कौठै की, 28और यीशु रै जुड़कै उतारीयौ लाल रौंगा रौ च़ोगौ भिड़ाऔ, 29और कांडेउ रौ ताज़ बुणीयौ यीशु रै मुंडा माथै छ़ाड़ौ, और यीशु रै सुल़टै हाथा दी शाऊंटौ दैऔ और यीशु काऐ औगाड़ी घुण्डै टेकियौ तेसरौ मज़ाक उड़ाउंदै लागै और बोलौ, “ओ यहुदिऊ रै राज़ै, ताउंकै ढाल!” 30और यीशु माथै थुकौ। और तेस शाऊंटै कौरै यीशु रै मुंडा दी लाइंदै लागै। 31ज़ैबै सै यीशु रौ आच़्छ़ै कौरीऐ मज़ाक उड़ाऔ, ता सेऊ च़ोगौ यीशु कु उतारीयौ तेसकै तेसी रै जुड़कै भिड़ाऐ, और यीशु क्रुसा माथै च़ड़ाउणा लै नियौं।
यीशु क्रुसा माथी च़ौड़ाउणौ
(मरकुस 15:21-32; लुका 23:26-43; यहुन्ना 19:17-27)
32बाइरै डेउंदी बारै तिउंकै शमौन नावां रौ एक कुरेन नावां रै देशा रौ आदमी मिलौ। तिंउऐ सेऊ बाटा दी पाकड़ौ ज़ीतीऐ तेसकु क्रूस च़ुंगाऔ। 33सेज़ी ज़ागाह माथै ज़ो गुलगुता मतलब खोपड़ी ज़िणी ज़ागाह बोलाई, तिऐ यीशु आणौ 34तिंउऐ पित मिलाऔ औन्दौ अंगुरा रौ रस (सिरकौ) यीशु लै पिणा लै दैऔ, पर यीशुऐ सेऊ च़ाखियौ नाईं पियौ। 35तैबै तिंउऐ यीशु क्रुसा माथै च़ड़ाऔ, और पौर्च़ी टाल़ियौ यीशु रै जुड़कै रोमी सिपाइउऐ आपु मांझ़िऐ बांटै, 36और तिऐ बोशियौ तेसरौ पैहरौ दैंदै लागै। 37और क्रुसा माथै एक तख्ती भी लाई ज़ासदी यीशु लै लिखौ औन्दौ थौ कि, “एऊ यहुदिऊ रौ राज़ौ यीशु आ”। 38तैबै यीशु आइलै दुई डाकु भी थै, ज़ो अलग-अलग क्रुसा माथै थै च़ड़ाऐ औन्दै, एक थौ यीशु री सुल़टी भिलै, एक थौ उल़टी भिलै। 39तिऐ बाटा दी आशणै-डेउणै वाल़ै लोग आपणौ मूंड हिलाई-हिलाइयौ यीशु री बेइज़्ज़ती थै कौरदै लागै औन्दै, 40और इणौ बोला थै, “ओ परमेश्वरा रै घौर ढाल़नै वाल़ै और चिजै दिना दी तेस चाणनै वाल़ौ, आपु ता बौच़ाऊ! अगर तू परमेश्वरा रौ छ़ोहरु ई, ता क्रुसा माथै कु उतरियौ आश।” 41यहुदी शास्त्री, मुख्यै और बौड़ै याजक भी यीशु रौ मज़ाक उड़ाइयौ बोला थै, 42“इणीऐ ता दुजै बौच़ाऐ ई, और आपु नाईं बौच़ी बौल़दौ। एऊ ता ‘इस्राइला रौ राज़ौ’ आ। अगर इयौ आमारै सामनै क्रुसा कु उतरा लौ ता आमै भी एस माथै विश्वास कौरी ई।” 43इणीऐ परमेश्वरा माथै विश्वास कियौ आ। अगर सेऊ एस च़ाहा ई, ता आबै एस छ़ुड़ावा लौ, कैलैकि इणीऐ बोलौ थौ, “हाऊं परमेश्वरा रौ छ़ोहरु ऊ।” 44यीशु आइलै ज़ो दुई डाकु थै क्रुसा माथी टांगै औन्दै सै भी यीशु रौ मज़ाक उड़ाउंदै थै लागै औन्दै।
यीशु रै प्राण छ़ाड़णै
(मरकुस 15:33-41; लुका 23:44-49; यहुन्ना 19:17-27)
45दुसकौ बौगत हुई गौ आ। बारह बाज़ै कु चिआ बाज़ै झ़ांऊ सारै देशा दी न्यारौ पौड़ी गौ। 46दुसकै चिआ बाज़ै दी यीशुऐ ज़ोरै-ज़ोरै बोलौ, “एली, एली, लमा शबक्तनी?” ज़ासरौ मतलब आ, “ओ मैरौ परमेश्वर, ओ मैरौ परमेश्वर, तांऐ हाऊं कैलै छ़ाड़ी ऐरौ ऊ?” 47ज़ो लोग तिऐ खौड़ै थै, तिऊं मांझ़िऐ भौरी लोगुऐ इणौ शुणियौ बोलौ, “सेऊ ता एलियाह भविष्यवक्ता लै आ औटाइंदै लागौ औन्दौ।” 48तिऊं सिपाई मांझ़िआ कु एक फेटा मारीयौ आशौ, और स्याइचूश सिरकै दी भिज़ाइयौ, और एक लाम्बै डिंगै दी बानियौ यीशु कु चुशाऔ। 49तैबै कुणिऐ बोलौ, “रुकौ देखी एरी कि एलियाह भविष्यवक्ता एस बौच़ाउंदै आशा कि नाईं।” 50तैबै यीशुऐ औज़ौ ज़ोरै राड़ देई और मौरी गौऔ। 51और देखौ, परमेश्वरा रै घौरा रौ पौरदौ माथा कु तौल़ झ़ांऊ च़ीरुइयौ दुई भिलै हुऔ: और धौतरी हिली गोई और ढोकै टकराउवी गोऐ, 52और ओडाच़ी खुली गोई, और मौरै औन्दै पवित्र लोगु रै भौरी मौड़ै ज़िउंदै हुऐ, 53और तेसरै ज़िउंदै हुणै बासिऐ सै ओडाच़ी मांझ़िआ कु निकल़ियौ पवित्र इलाकै दी डेवै और भौरी ज़ौणैउ कै दिशै। 54तैबै सरदार और ज़ो तेस आइलै यीशु रौ पैहरौ दैंदै थै लागै औन्दै, तिंउऐ भुंच़ाल़ और ज़ो कुछ़ हुऔ थौ इणौ देखीयौ भौरी डौरी गौऐ और तिंउऐ बोलौ, “सौच़्च़ी इयौ आदमी परमेश्वरा रौ छ़ोहरु थौ!” 55तिऐ भौरी छ़ेउड़ी ज़ो गलीला कु यीशु री सेवा कौरदै बारै तेस आइलै आशी थी, सै दुरा कु थी लागी औन्दी देखदै। 56तिऊं मांझ़िऐ मरियम मगदलीनी, याकूब और योसेसा री मां मरियम, और जबदी रै छ़ोहरु री मां थी।
यीशु ओडाच़ी दी छ़ाड़णौ
(मरकुस 15:42-47; लुका 23:50-56; यहुन्ना 19:3-4)
57ज़ैबै ब्याल़ हुई ता युसुफ नावां रौ ज़ो अरिमतिया रौ एक सेठ आदमी, ज़ो आपु ई यीशु रौ च़ेलौ थौ, सेऊ आशौ। 58तिणीऐ पिलातुसा कु यीशु रौ मौड़ौ मांगौ। एथ माथै पिलातुसै यीशु रौ मौड़ौ निणै दैऔ। 59युसुफै मौड़ौ नियौं, यीशु रौ मौड़ौ मखमला री च़ादरी दी मेटौ, 60और सेऊ मौड़ौ आपणी नौईं ओडाच़ी दी छ़ाड़ौ, ज़ो तिणीऐ ढोकै दी थी काटियौ चाणी औन्दी, और ओडाच़ी दी एक बौड़ै पात्थरा कौरीऐ बन्द कौरीऔ डेई गौ। 61मरियम मगदलीनी और दुजी मरियम, दुइया तिऐ ओडाच़ी काऐ बोशी औन्दी थी।
ओडाच़ी दी पैहरौ
62दुजै दिनै ज़ो त्यारी रै दिना बासिऐ आरामा रौ दीन थौ, बौड़ै याजक और फरीसीउऐ पिलातुसा काऐ कौठै हुइयौ बोलौ, 63“ओ महाराज़, आमुकै याद आ तिणी भरमाणै वाल़ै ज़ेबी सौ ज़िउंदौ थौ, तिणीऐ बोलौ थौ, ‘हाऊं मौरणै बासिऐ चिजै दिनै ज़िउंदौ हुआ ऊ।’ 64तैबै हुकम दैऔ कि चीज़ै दिना झ़ांऊ ओडाच़ी री च़ोकसी हुआ। इणौ ना च़ांई हुऔ कि तेसरै च़ेलै आशीयौ तेसरी लाश च़ोरिऐ निंआलै पोरु, और लोगु लै बोलदै लागा लै, ‘सेऊ मौरै औन्दै मांझ़िऊ कु ज़िउंदौ हुई ऐरौ आ।’ तैबै पिछ़लौ धोखौ पैहलै कु भी बुरौ हुआ सा।” 65पिलातुसै तिउंलै बोलौ, “तुमुकै पैहरैदार ता आसा ई, डैऔ, आपणी सौमझ़ी कौरै च़ोकसी कौरौ।” 66तैबै सै पैहरैदार आपु आइलै निऐं, और पात्थरा माथै मोहर लाइऔ ओडाच़ी री च़ोकसी की।
Currently Selected:
मत्ती 27: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.