मत्ती 24
24
परमेश्वरा रै घौरा रै विनाशा री भविष्यवाणी
(मरकुस 13:1-2।; लुका 21:5,6)
1ज़ेबी यीशु परमेश्वरा रै घौरा कु बाइरै निकुल़दै थौ लागौ औन्दौ, ता तेसरै च़ेलै परमेश्वरा रै घौरा रै बारै दी यीशु काऐ पुछ़दै आशै। 2तिणीऐ तिउंलै बोलौ, “तुमै एस सब देखदै लागै औन्दै ई ना! हाऊं तुमुलै सौच़्च़ौ बोलाऊ, इदै ढोल़ा माथै ढोल़ भी नाईं बौच़दै कैलैकि इयौ सब कुछ़ ढाल़िया नाश हुआ।”
मुसीबत और क्लेश
(मरकुस 13:3-13; लुका 21:7-19)
3ज़ेबी यीशु जैतूना री पहाड़ी माथै थौ बोशौ औन्दौ, ता च़ेलेउऐ एखुली दी यीशु काऐ आशीयौ तेसलै बोलौ, “आमुलै बोल कि एज़ी बुशै केबी हुआई? तैरै आशणै रौ और धौतरी आखरी हुणै रौ का निशाण हुआ सा?” 4यीशुऐ तिउंलै ज़वाब दैऔ, “बौच़ियौ रौएऊ! कुणिऐ तुमुलै धोखौ ना च़ांई दैऔ, 5कैलैकि कई लोग इणै हुआई ज़ो मैरै नावां कौरीऐ आशीयौ बोलाई, हाऊं मसीहा ऊ, और भौरी लोग तिऊं पिछ़ु डेउणै ई। 6तुमै लौड़ाई और झ़ौगड़ै रै बारै दी शुणा लै, ता तुमै घौबराएऊ नाईं कैलैकि इऐ बुशै हुणी ता ज़ुरुरी ई, पर सेज़ौ बौगत आखरी नाईं हुन्दौ। 7कैलैकि एकी ज़ाती रै लोग दुजी ज़ाती रै लोगु रौ विरोध कौरा ई, एकी देशा रै लोग दुजै देशा रै लोगु रौ विरोध कौरा ई, और ज़ागाह-ज़ागाह दी काल़ पौड़ा आ, और भुईंच़ाल़ हुणै ई। 8इऐ सब बुशै मुसीबता री शुरुआत ई। 9तैबै सै ज़ुण तुमारै विरोधी ई दुःख देणा लै तुमु पाकड़ाई, और तुमु पोरु झ़ांगाई, और मैरै नावां री वज़ाह कु सारै गुटा रै लोग तुमु आइलै दुश्मनी छ़ाड़ाई। कैलैकि तुमै मुं माथै विश्वास कौरा ई। 10तैबै भौरी लोग विश्वास पोरु छ़ाड़ाई, और एकी दुजै पकड़ावा ई, और एकी दुजै आइलै दुश्मनी छ़ाड़ाई। 11भौरी ज़ौणै झ़ुठै और पुराणै भविष्यवक्ता आशा ई, और भौरी लोगु बिशवाशाई। 12अधर्मा रै बौड़णै कु भौरी लोग प्यार पोरु बिसरा ई, 13पर ज़ो आखरी झ़ांऊ मुं माथै विश्वास छ़ाड़ा लौ, सेऊ ई बौच़ा आ। 14और परमेश्वरा रै राज़ा री इऐ खुश खौबरी धौतरी री सारी ज़ागाह दी परचार कौरालै, कि सब ज़ाती रै लोगु लै तेस अपणाउणा रौ मौकौ मिला, तैबै सण्सार रौ आखरी बौगत आशा सा।”
बौड़ी मुसीबता री शुरुआत
(मरकुस 13:14-23; लुका 21:20-24)
15“एथीलै ज़ेबी तुमै तिऐं उज़ाड़णै वाल़ी बुरी चीज़ ज़ेथरै बारै दी दानिय्येल भविष्यवक्ता रै ज़ौरिऐ बोली ऐन्दौ थी, एक भौरी बुरौ आदमी आशीयौ एस परमेश्वरा रै आराधना रै घौरा री सारेऊ कु शुद्ध ज़ागाह गान्दी कौरा आ (पढ़ने वाल़ौ सौमझ़ा लौ।), 16तैबै ज़ेज़ै लोग यहुदिऊ दी औलै सै बौच़णा लै पहाड़ा दी जा डेउणौ। 17ज़ो छ़ापरा माथै औलै, सै आपणै घौरा कु समाना आणना लै तौल़ै नाईं उतरियौ। 18और ज़ो डोखरै दी औलै, सै आपणै जुड़कै आणना लै घौरै नाईं डेआलै। 19सेज़ै दिनै दी ज़ो छ़ेउड़ी गौरकै ज़िवा री औली और ज़ासकै दूध पिणै वाल़ै लोल़डै औलै, तुमुलै इऐ केती बुरी बूश आ। 20प्राथना कौरदै थाकौ लागी कि तुमै शेल़ै रै दिनै या आरामा रै दिना दी नाईं जा लौ भागणौ। 21कैलैकि सेज़ै बौगतै इणौ भौरी दुःख हुआ, ज़िणौ धौतरी रै पैहलै कु ना इबी झ़ांऊ हुऔ और ना केबी हुणौ। 22अगर सेज़ै दीन कम नाईं कौरा थै ता कोई भी प्राणी नाईं बौच़ा थौ, पर च़ुनै औन्दै री वज़ाह कु सै दीन कम कौरी गौऐ। 23सेज़ै बौगतै अगर तुमुलै कुण बोलालौ, ‘शुणौ, मसीह इदै आ!’ या ‘तिदै आ!’ ता विश्वास नाईं कौरेऊ। 24कैलैकि झ़ुठै मसीह और झ़ुठै भविष्यवक्ता आशा ई, और बौड़ै निशाण, और हैरानी वाल़ै काम देखाइयौ लोगु परमेश्वरा री बाटा कु टाल़णै री कोशिश कौरा ई। 25शुणौ, मुंइऐ तुमुलै सारी कुछ़ बुशै पैहलै ई बोली गोई आ। 26एथीलै अगर सै तुमुलै बोलालै, ‘शुणौ, सेऊ ज़ांगल़ा दी आ,’ ता बाइरै नाईं निकल़ियौ। या बोलालै ‘शुणौ, सेऊ कोठरिउ दी आ,’ ता विश्वास नाईं कौरेऊ। 27कैलैकि ज़िणौ बिज़ल़ी पुर्वा कु निकल़ियौ पश्चिमा झ़ांऊ च़ौमका ई, तिणी ई आदमी रै छ़ोहरु रौ आशणौ हुआ सा। 28ज़ियै मौरौ औन्दौ प्राणी हुआ सा, तिऐ बाज़ कौठै हुआई।”
आदमी रै छ़ोहरु रौ दुजी बारै आशणौ
(मरकुस 13:24-27; लुका 21:25-28)
29“सेज़ै दिना रै दुखा बासिऐ सुरज काल़ौ पौड़ा सा, और सुरज और ज़ून भी प्याशौ दैणौ बन्द कौरा, और तारै सौरगा कु छ़ुटियौ तौल़ै पौड़ा ई और सौरगा री शक्ति हिलणी। 30तैबै आदमी रै छ़ोहरु री निशाणी सौरगा दी दिशा ई, और तैबै सौरगा रै सारै कुला रै लोग हिकड़ौ पिटाई। और आदमी रै छ़ोहरु बौड़ी शक्ति और शाना कौरीऐ सौरगा रै बादल़ा माथै आशदै देखा ई। 31सेऊ बांइशी बाज़ियौ आपणै सौरगदूत भेज़ा आ, और सै पुरी धौतरी कु मैरै छ़ांटै औन्दै लोग कौठै कौरा ई।”
फेड़ु रै पेड़ा रौ औनैणौ
(मरकुस 13:28-31; लुका 21:29-33)
32“फेड़ु रै पेड़ा कु एज़ौ औनैणौ शिखौ ज़ेबी फेड़ु रै पेड़ा रै शाऊंटै कौंउल़ै हुआई और तेसदी पाच लागदै लागा ई, ता तेबी तुमुकै पौतौ लागा कि गौरमी आशणै वाल़ी आ। 33तिणी ई ज़ेबी तुमै इऊं सब बुशै औन्दै देखा लै, ता तुमै सौमझ़ेऊ कि मैरौ दुजी बारै वापिस आशणै रौ बौगत हुई ऐरौ आ। 34हाऊं तुमुलै सौच़्च़ौ बोलाऊ कि ज़ेबी झ़ांऊ इऐ सारी बुशै पुरी ना औली, तेबी झ़ांऊ एज़ी पीड़ी रौ नाश नाईं औन्दौ। 35सौरग और धौतरी टौल़ी सौका ई पर मेरी बोली ऐन्दी बुशै केबी ना टौल़दी।”
उज़ीई रौएऊ
(मरकुस 13:32; लुका 17:26-30,34-36)
36“मैरौ दुजी बारै आशणै रै बौगता रै बारै दी कोई नाईं ज़ाणदौ, ना सौरगदूत और ना छ़ोहरु, सिरफ परमेश्वरा कै पौतौ। 37ज़िणै नुहा रै दीन थै, तिणी ई मुं आदमी रै छ़ोहरु रौ आशणौ भी हुआ सा। 38कैलैकि ज़िणौ पाणी रै विनाशा कौरी पैहलै रै दिना दी, ज़ेबी झ़ांऊ कि नूह ज़ाहज़ा दी नाईं डैऔ, सेज़ै दिनै झ़ांऊ लोग खा-पिया थै, और तिऊं मांझ़िऐ शादी ब्याऐ औआ थै। 39और ज़ेबी झ़ांऊ पाणी रै विनाशा आशीयौ सै सारै बौआइयौ नाईं निऐं, तेबी झ़ांऊ तिउंकै कुछ़ भी सौमझ़िऐ नाईं आशौ। तिणी ई हाऊं आदमी रै छ़ोहरु रौ आशणौ भी हुआ आ। 40सेज़ै दिनै दी ज़ो लोग डोखरै दी हुआई, एक निंआई पोरु दुजौ छ़ाड़ाई तिदै। 41दुई छ़ेउड़ी जांजै पिशदै रौआ ई, एक पोरु निंआलै और दुजी छ़ाड़ा लै तिदै। 42एथीलै उज़ीई रौऔ, कैलैकि तुमै नाईं ज़ाणदै कि तुमारौ प्रभु केज़ै दिना दी आशा सा। 43पर इणौ ज़ाणौ कि अगर घौरा रौ मालिक ज़ाणदौ औलौ कि च़ोर केज़ै बौगतै आशा ई ता उज़ीई रौआ थौ, और आपणै घौरा दी च़ोरी कौरणै नाईं दिया थौ। 44एथीलै तुमै भी तैयार रौऔ, कैलैकि ज़ेज़ै बौगतै रै बारै दी तुमै सुंच़दै नाईं, सेज़ै बौगतै आदमी रौ छ़ोहरु आशा सा।”
विश्वासा वाल़ौ दास और दुष्ट दास
(लुका 12:41-48)
45“तैबै विश्वास वाल़ौ बुद्धी वाल़ौ दास सेऊ आ, ज़ो मालिकै आपणै ओरी नुकरा-च़ाकरा रौ मुख्यौ चाणौ कि सेऊ बौगता दी तिउंलै रोटी दिआ 46भौलौ आ सेऊ दास, ज़ो तेसरौ मालिक आशीयौ इणौ कौरदै तेस देखा लौ। 47हाऊं तुमुलै सौच़्च़ौ बोलाऊ, ‘सेऊ मालिक आपणै तेस दासा कै आपणी सारी धन-ज़यदादा सौम्भाल़णै रौ हक्क दिआ सा। 48अगर सेऊ दास सुंच़ा लौ कि मैरौ मालिक ता कुछ़ दिना झ़ांऊ वापिस ना आशदौ, 49और दुजै नुकरा लै दुःख दैणौ शुरु कौरालौ, और आपुलै खाणै पिणै रौ इन्तज़ाम कौरालौ और सूर पिआ लौ। 50ता तेसरौ मालिक बिण बोली तेबी वापिस आशा ज़ेबी तिणीऐ सुंच़ौ औन्दौ भी नाईं औलौ।’ 51तैबै सेऊ मालिक तेस नुकरा लै सौज़ा दिया और कौपटीऊ मांझ़िऐ भेज़ा तिऐ लेरणौ और दांद पिशणौ हुआई।”
Currently Selected:
मत्ती 24: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.