मत्ती 21
21
यरुशलेमा दी ज़ीत आशणी
(मरकुस 11:1-11)
1ज़ैबै यीशु और तेसरै च़ेलै यरुशलेमा रै नज़दीक पौउंच़ै और जैतूना री पहाड़ी माथै बैतफगे काऐ आशै, ता यीशुऐ दुई च़ेलै इणै बोलीयौ भेज़ै, 2“सामनै वाल़ै गांवा दी डैऔ। तिऐ पौउंच़िऔ ई तुमुकै एक गादी मिला खुंटी दी बानी औन्दी, और तिंया आइलै तियांरौ गौधेटु मिला। तिऊं खोलियौ मुं काऐ आणौ। 3अगर तुमु आइलै कोई कुछ़ बोलालै, ता तुमै बोलेऊ प्रभु कै एसरी ज़ुरत आ, तैबै सेऊ तेबी भेज़ा” 4इणौ एथलै हुऔ कि ज़ो वचन पुराणै ज़मानै रै गुरु रै तौरफा कु बोलौ औन्दौ थौ सेऊ पुरौ हुआ: 5“सिय्योना री छ़ोटुड़ी कु बोलौ, ‘देख, तैरौ राज़ौ ताऊं काऐ आशौ आ: सेऊ नीउलौ आ, और गौधेटु माथै बोशौ औन्दौ आ: पर गादी रै मांऊ माथै।’ ” 6च़ेलेउऐ डेइऔ, ज़िणौ यीशुऐ तिउंलै बोलौ थौ, तिणी ई किऔ। 7और गादी और तिंयारौ गौधेटु आणौ, तिऊं माथै आपणै जुड़कै छ़ाड़ै, और यीशु तेस माथै बोशी गौ। 8तैबै भौरी लोगुऐ आपणै जुड़कै बाटा दी बिछ़ाऊंदै लागै, और कुछ़ लोगुऐ पेड़ा रै शाऊंटै काटियौ बाटा दी बिछ़ाऐ। 9ज़ो भीड़ औगाड़िऐ और पिछ़ाड़िऐ आण्डदै थै लागै औन्दै, सै औटाइयौ बोलदै थै लागै औन्दै, “दाऊदा रै संताना री बौड़ाई हो होसाना, आशीष वाल़ौ ई तुमै ज़ो प्रभु रै नावां कौरीऐ आशै ई, सौरगा दी परमेश्वरा री बड़ाई हो होसाना।” 10ज़ैबै यीशु यरुशलेमा दी डैऔ, ता सारै शहरा दी हलचल माच़ी गोई, और लोग बोलदै लागै, “एऊ कुण आ?” 11लोगुऐ बोलौ, “एऊ गलीला रै नासरता रौ गुरु यीशु आ।”
परमेश्वरा रै घौरा कु सामाना बेच़णै वाल़ै गाड़नै
(मरकुस 11:15-19; लुका 19:45-48; यहुन्ना 2:13-22)
12यीशुऐ परमेश्वरा रै घौरा दी डेइयौ सै सौभी, ज़ो परमेश्वरा रै घौरा दी लेण-देण थै कौरदै लागै औन्दै, गाड़ी गौऐ, सर्राफो रै पीढ़ै और कबुतर बेच़णै वाल़ेऊ री रेढ़ी पौल्टी। 13और यीशुऐ बोलौ, “लिखौ औन्दौ आ, ‘मैरौ घौर प्राथना रौ घौर आ।’ पर तुमुऐ एऊ लुटणै वाल़ेऊ रौ आड्डौ चाणी गौ आ।” 14तैबै शेड़ै और लौंगड़ै, परमेश्वरा रै घौरा दी यीशु काऐ आशै, और यीशुऐ सै ठीक कियै। 15पर ज़ैबै बौड़ै याजकु और शास्त्रिउऐ एज़ै हैरान कौरणै वाल़ै काम, ज़ो यीशुऐ कियै, और छ़ोहरुऐ परमेश्वरा रै घौरा दी दाऊदा री संताना लै “होसाना” औटाउंदै बारै देखै, ता तिंउरै रोश आशी गोऐ, 16और यीशु लै बोलदै लागै, “का तू शुणाई कि इऐ का बोलाई?” यीशुऐ तिउंलै बोलौ, “ओ। का तुमुऐ इणौ केबी नाईं पौड़ौ, ‘लोल़ड़ै और दूध पिणै वाल़ै मांऊ कु ताइंऐ अपार स्तुति कौरा ई।’ ” 17तैबै यीशु तिऊं छ़ाड़ियौ तेस इलाकै कु बाइरै बैतनिय्याह लै डेवै और ब्याल़ी रौऔ तिदै ई।
बिणा फौल़ा रौ फेड़ु रौ पेड़
(मरकुस 11:12-14,20-24)
18दोअती ज़ैबै यीशु इलाकै कु डेउंदै थौ लागौ औन्दौ ता यीशु रै भूख लागी। 19बाटा दी यीशुऐ एकी भिलै फेड़ु रौ एक पेड़ देखौ और सेऊ तेस पेड़ा काऐ डैऔ, और पेड़ा दी पाचा छ़ाड़ियौ और कुछ़ नाईं थौ और तेसलै बोलौ, “आज़ा कु पोरु ताऊं दी केबी फल़ नाईं लागदै।” और फेड़ु रौ पेड़ खरकच़ार शुकी गौ। 20इणौ देखीयौ च़ेलै हैरान हुऐ और तिंउऐ बोलौ, “एऊ फेड़ु रौ पेड़ खरकच़ार किणौ शुकी गौ?” 21यीशुऐ तिउंलै ज़वाब दैऔ, “हाऊं तुमुलै सौच़्च़ौ बोलाऊ, अगर तुमै विश्वास छ़ाड़ा और शौक नाईं कौरालै, ता ना सिरफ इणौ कौरालै ज़ो एस फेड़ु रै पेड़ा लै किऔ आ, पर अगर एस पहाड़ी लै बोलालै, ‘तू उठ, और समुन्दरा दी डेऊ,’ ता इणौ हुआई। 22और ज़ो तुमै प्राथना दी विश्वासा कौरी मांगा ई सेऊ सौभी तुमुलै मिला सा।”
यीशु रै हक्का माथी सवाल
(मरकुस 11:27-33; लुका 20:1-8)
23यीशु परमेश्वरा रै घौरा दी शिक्षा दैंदै थौ लागौ औन्दौ, ता बौड़ै याजक और स्याणै लोग यीशु काऐ आशै और बोलदै लागै, “तू इणै काम केज़ै हक्का कौरी कौरा ई? और ताउंकै एज़ौ हक्क कुणिऐ दैऔ आ?” 24यीशुऐ तिउंलै ज़वाब दैऔ, “हाऊं भी तुमु कु एक सवाल पुछ़ाऊ। अगर तुमै मुकै ज़वाब दिआ लै, ता हाऊं भी तुमुकै बोलाऊ कि इणै काम कासरै हक्क कौरीऐ कौराऊ। 25यहुन्ना रौ बपतिस्मौ किदरु कु थौ? सौरगा री तौरफा कु या आदमी री तौरफा कु?” तैबै सै आपु माझ़ियै चौपड़ीदैं लागै, “अगर आमै बोलु लै ‘सौरगा री तौरफा कु,’ ता एऊ आमुकु बोला, ‘तैबै तुमुऐ तेस माथै विश्वास कैलै ना कियौ?’ 26और अगर आमै बोलु लै ‘आदमी री तौरफा कु,’ ता आमुलै भीड़ा रौ डौर आ, कैलैकि इऐ सौभी यहुन्ना भविष्यवक्ता माना ई।” 27तैबै इउंऐ यीशु लै ज़वाब दैऔ, “आमै नाईं ज़ाणदै।” यीशुऐ भी तिउंलै बोलौ, “ता हाऊं भी नाईं बोलदौ कि एज़ौ काम केज़ै हक्का कौरीऐ कौराऊ।”
दुई छ़ोहरु लै आखी रौ दाण
28“तुमै का सौमझ़ा ई? कास आदमी रै दुई छ़ोहरु थै। तिणीऐ पैहलै छ़ोहरु लै बोलौ, ‘ओ छ़ोहरु, आज़ अंगुरा रै बौगिच़ै दी काम कर।’ 29तिणी छ़ोहरुऐ ज़वाब दैऔ, ‘हाऊं नाईं डेउंदौ,’ पर बासिऐ पछ़ताइऔ डैऔ। 30तैबै सेऊ दुजै छ़ोहरु काऐ डेइयौ तिणौ ई बोलौ, तिणी दुजै छ़ोहरुऐ बोलौ, ‘ओ हाऊं डिआऊ,’ पर नाईं डैऔ। 31इऊं दुई मांझ़िऐ कु कुणिऐ बाबा री इच़्छ़ा पुरी की? तिंउऐ बोलौ, ‘पैहलै।’ ” यीशुऐ तिउंलै बोलौ, “हाऊं तुमुलै सौच़्च़ौ बोलाऊ कि मामलै निणै वाल़ै और गान्दै काम कौरणै वाल़ै तुमु कु पैहलै परमेश्वरा रै राज़ा दी डिआई। 32कैलैकि यहुन्ना भौलाई री बाटा देखाउंदै तुमु काऐ आशौ, और तुमुऐ तेस माथै विश्वास ना कियौ। पर मामलै निणै वाल़ेउऐ और गान्दै कामा कौरणै वाल़ेउऐ तेसरी बुशु माथै विश्वास कियौ और तुमै इणौ देखीयौ बासिऐ भी नाईं पछ़ताऐ कि तेसरौ विश्वास कौरा थै।
बुरै ज़िमीदारु रौ औनैणौ
(मरकुस 12:1-12; लुका 20:9-19)
33“एक औज़ौ औनैणौ शुणौ: एक घौरा रौ मालिक थौ तिणीऐ अंगुरा रौ बौगिच़ौ लाऔ, तेसरै च़ारौ तौरफा दी तारबाड़ लाऔ, तेस बौगिच़ै दी एकी भिलै अंगुरा रै रस गाड़ने री ज़ागाह भी चाणी और छ़ोटी ज़ेई छ़ानी भी चाणी, और तेसरौ ठेकौ ज़िमदारु कै देइयौ आपु डैऔ परदेशा लै। 34ज़ैबै अंगुरा चोड़णै रौ बौगत आशौ, ता तिणी मालिकै आपणै नुकुरा लै फल़ आणना लै ज़िमदारु काऐ भेज़ै। 35पर ज़िमदारुऐ तेसरै नुकुर पाकड़ियौ, केज़ै पिटै, और केज़ै झ़ांगै पोरु, और केज़ै ढोल़ियाऐ। 36तैबै तिणी मालिकै पैहलै कु भौरी औज़ौ नुकुर भेज़ै, और तिंउऐ तिऊं आइलै भी तिणौ ई कियौ। 37बासिऐ तिणी मालिकै आपणौ छ़ोहरु तिऊं काऐ इणौ सुंच़ीयौ भेज़ौ कि सै मैरै छ़ोहरु री इज़्ज़त कौरालै। 38पर ज़िमदारुऐ सेऊ छ़ोहरु देखीयौ आपु मांझ़िऐ चौपड़िंदै लागै, ‘एऊ ता एस बौगिच़ै रौ मालिक आ, आशौ, आमै एस पोरु झ़ांगी, ताकी एऊ बौगिच़ौ आमारौ हुआ।’ 39तैबै तिंउऐ सेऊ छ़ोहरु पाकड़ौ और सेऊ अंगुरा रै बौगिच़ै कु बाइरै गाड़ीयौ पोरु झ़ांगौ। 40एथीलै ज़ेबी बौगिच़ै रौ मालिक आशा लौ, ता तिऊं ज़मीदारु आइलै का कौरा?” 41तिंउऐ तेसलै बोलौ, “सेऊ तिऊं लोग पोरु झ़ांगा और अंगुरा रौ बौगिच़ौ ओरी लोगु कै सौंभाल़ा, ज़ो बौगतै माथै तेसलै फल़ दिआ कौरा।” 42यीशुऐ तिउंलै बोलौ, “का तुमुऐ केबी पवित्रशास्त्रा दी इणौ नाईं पौढ़ौ कि: ‘ज़ेज़ौ पात्थर मिस्त्रिऐ बेकार ज़ाणौ थौ, सेज़ौ पात्थर कुणे दी लागणै वाल़ौ बौणौ? एज़ौ काम परमेश्वरा री तौरफा कु हुऔ, और एज़ौ आमारी नौज़री दी नोखौ आ।’ 43एथीलै हाऊं तुमुलै बोलाऊ कि परमेश्वरा रौ राज़ तुमु कु नींई बौल़िया आ और इणी ज़ाती लै ज़ो तेसरौ फल़ आणा, देई आ। 44ज़ो एस पात्थरा माथै पौड़ालौ, सेऊ च़ूर-च़ूर हुआ। और ज़ास माथै सेऊ पात्थर पौड़ालौ, सेऊ पिशीया पोरु पा।” 45बौड़ै याजकु और फरीसी लोग यीशु रै औनैणौ शुणिऐ सौमझ़ी गौऐ कि सेऊ तिंउरै बारा दी बोला आ। 46और तिंउऐ यीशु पाकुड़नौ च़ाऔ, पर सै लोगु कु डौरी गौऐ कैलैकि सै यीशु भविष्यवक्ता माना थै।
Currently Selected:
मत्ती 21: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.