Mat 8
8
Yesũ Aivosya Mũndũ Mũwau Mangũ#8.1 Mangũ: Ũũ nĩ ũwau mũthũku mũno. Mũndũ e naw'o, syaa sya moko na maũũ nitonya kũtilĩkanga na kuma, o na manyiũũ na ũĩmĩ kwanangwa na nzw'ĩĩ kũunyũka.
(Mk 1.40-45; Lk 5.12-16)
1Yesũ atheea kuma kĩĩmanĩ, nĩwaatĩĩwe nĩ andũ aingĩ mũno. 2Mũndũ ũmwe waĩ mũwau mangũ nĩwookie atulya ndu mbee wake na amwĩa atĩĩ, “Mwĩai, ethĩwa nũkwenda nũtonya kũmbosya ngathea.”
3Yesũ nĩwatambũũkisye kw'oko amũkwata na amwĩa atĩĩ, “Ĩĩ, nĩngwenda. Ĩthĩwa mũtheu!” Vau kwa vau nĩwavoiw'e ũwau ũsu vyũ. 4#Ali 14.1-32 Nĩvo ĩndĩ Yesũ wamwĩie atĩĩ, “Ĩthukĩĩsye! Ndũkatate kũtavya mũndũ o na ũmwe ũndũ ũũ. Ĩndĩ enda ĩmwe kwa ĩmwe ũkeyonany'e kwa mũthembi aĩkĩĩthye kana wĩ mũvou, na ũyumya nthembo kwĩanana na Mĩao ya Mwose nĩ kana kĩla mũndũ amanye wĩ mũvou.”
Yesũ Aivosya Mũthũkũmi wa Mũnene wa Asikalĩ ma Loma
(Lk 7.1-10)
5Yesũ ailika ndũanĩ ya Kavelinaũmu, mũnene ũmwe wa kĩkundi kya asikalĩ ĩana nĩwamũkomanie na amwĩsũva 6akĩmwĩa atĩĩ, “Mwĩai, mũthũkũmi wakwa e mũsyĩ akomete. Mamutha make mai na vinya na ealw'a mũno.”
7Yesũ amwĩa atĩĩ, “Nĩngũka kũmũvosya.”
8Ĩndĩ mũnene ũsu wa asikalĩ amwĩa atĩĩ, “Ai, aiee! Mwĩai, nyie ndyaĩlĩtwe nue wũke mũsyĩ kwakwa. Neena o ndeto tũ, na mũthũkũmi wakwa nũkũvoa. 9Nũndũ nyie o nakwa nĩ ungu wa anene angĩ, nĩ na asikalĩ nĩũngamĩe. Nĩnĩaa mũsikalĩ ũmwe nathi na aithi, na ndyĩa ũngĩ nĩoke na ayũka. O na nĩnĩaa mũthũkũmi wakwa nĩ eke ũndũ mũna na ayĩka.”
10Yĩla Yesũ weewie ũu, nĩwaseng'ie na amea ala mamũatĩĩe atĩĩ, “Nĩmũtavya w'o, ndyaaona mũndũ nthĩnĩ wa Ĩsilaeli wĩ na mũĩkĩĩo ta ũũ. 11#Lk 13.29 Ekai nĩmũtavye, andũ aingĩ makooka kuma wumĩlonĩ wa syũa na ũthũĩlonĩ wayo, malike mbokanĩ vamwe na Avalaamu, na Isaka na Yakovo, ũsumbĩnĩ wa ĩtu. 12#Mat 22.13; 25.30; Lk 13.28 Ĩndĩ ala maaĩlĩtwe nĩkwĩthĩwa me ũsumbĩnĩ, makekw'a nza kĩvindunĩ, vala vakethĩwa kũĩa na kũvevetany'a maeo.” 13Nĩvo ĩndĩ Yesũ weeie ũla mũnene wa asikalĩ ĩana atĩĩ, “Ĩnũka, na kĩu waĩkĩĩa nĩkĩkwĩanĩw'a kwaku.” Mũthũkũmi wa mũnene ũsu nĩwavoie saanĩ o ũsu.
Yesũ Aivosya Andũ Aingĩ
(Mk 1.29-34; Lk 4.38-41)
14Yesũ nĩwaendie mũsyĩ kwa Vetelo, na eethĩa inyia wa mũka wa Vetelo nũkomete awaĩte ndetema. 15Yesũ nĩwamũkwatie kw'oko, na ndetema yavoa, nake ookĩla ambĩĩa kũmũthũkũma.
16Ĩa mawĩoo syũa yathũa, andũ nĩmamũeteie Yesũ andũ ala malikĩtwe nĩ maimũ; nake alũngya maveva asu, kwa kũneena o ndeto tũ. O ta ũu nĩwavoisye andũ onthe ala maĩ awau. 17#Ĩsa 53.4 Eekie ũu eanĩsye kĩla kyaneenetwe nĩ mwathani Ĩsaia akasya atĩĩ, “We mwene nĩwavetie mowau maitũ atũvosya.”
Ũito wa Kwĩthĩwa Mũatĩĩi wa Yesũ
(Lk 9.57-62)
18Yĩla Yesũ woonie andũ aingĩ mũno mamũthyũlũlũkĩte, nĩweeie amanyĩw'a make atĩĩ, “Tũendei mũingo ũya ũngĩ wa ĩia.” 19Nĩvo ĩndĩ mũmanyĩsya ũmwe wa Mĩao waendie vala ũĩ amwĩa atĩĩ, “Mũmanyĩsya, nyie ngaendanasya naku kw'onthe kũla wĩendaa.”
20Yesũ amũsũngĩa amwĩa atĩĩ, “Mbĩwa syĩ na maima ma kwĩkala na nyũnyi syĩ na ndala, ĩndĩ Mwana wa Mũndũ nde na vandũ va kwĩkala.”
21Mũndũ ũngĩ, nake aĩ ũmwe wa amanyĩw'a make nĩwamwĩie atĩĩ, “Mwĩai, eka nambe kũsyoka mũsyĩ ngathike ĩthe wakwa.”
22Ĩndĩ Yesũ amũsũngĩa amwĩa atĩĩ, “Ngatĩĩa na ũyĩekana na akw'ũ mathike akw'ũ moo.”
Yesũ Aivindĩthya Kĩuutani
(Mk 4.35-41; Lk 8.22-25)
23Yesũ nĩwalikile ĩsiwanĩ, na amanyĩw'a make maendany'a nake. 24O mĩtũkĩ kĩuutani kĩnene nĩkyookĩlanilye ĩianĩ, na itulumo syakũna yĩla ĩsiwa iiyĩlikya kĩw'ũ. Ĩndĩ we Yesũ nĩwakomete. 25Amanyĩw'a make nĩmaendie vala ũĩ mamũamũkya na mamwĩa atĩĩ, “Mwĩai tũtangĩĩe! Nĩtũũkw'ĩĩa vaa!”
26Yesũ amakũlya atĩĩ, “Mũtelemetw'e ũu nĩ kyaũ? Mũĩkĩĩo wenyu ko ũnyivĩte ata!” Nĩvo ĩndĩ wookĩlile eeaĩa kĩuutani kĩu na itulumo iusye, na kwausya vyũ.
27Andũ asu maĩ ĩsiwanĩ nĩmaseng'ie mũno na makũlany'a atĩĩ, “Mũndũ ũũ nĩ wa mũthemba mwaũ, ũkwĩw'ĩka o na nĩ iuutani na itulumo?”
Yesũ Aivosya Aũme Elĩ Malikĩtwe nĩ Maimũ
(Mk 5.1-20; Lk 8.26-39)
28Yesũ amina kũinganĩsya ĩia ya Kalilii, nĩwavikie nthĩ ya Akandalinĩ na akomana na aũme elĩ maumĩte vala vathikawa andũ. Aũme asu malikĩtwe nĩ maimũ, na maĩ athũku ũkethĩa vai mũndũ wĩsĩla nzĩa ĩsu. 29Yĩla mamwonie Yesũ oou, nĩmakayie na wasya mũnene mayasya atĩĩ, “Wĩenda kyaũ kũla tũĩ we Mwana wa Ngai? Wooka kũũ kũtũthĩny'a ĩvinda yĩte ĩviku?”
30Vau ũkuvĩnĩ vaĩ ndĩthya nene ya ngũlũe syaĩsaa vo. 31Kwoou maimũ asu mamwĩsũva Yesũ mamwĩa atĩĩ, “Ethĩwa nũũtũlũngya kuma andũnĩ aa, twĩtĩkĩlye tũkalike ndĩthyanĩ ĩya ya ngũlũe.”
32Nake amea atĩĩ, “Endai!” Maimũ asu nĩmaumie aũmenĩ asu, na mathi malika ila ngũlũenĩ. Ngũlũe isu syonthe nĩsyatheeie kĩvaũũkonĩ isembete na syeeyĩkya kĩw'ũnĩ syakw'ĩĩa vo.
33Andũ ala maĩthasya ngũlũe isu nĩmasembie makĩa mathi ndũanĩ. Kũu nĩmatavisye andũ ũvoo ũsu, na mũno mũno kĩla kyeekĩka kwa andũ ala malikĩtwe nĩ maimũ. 34Kwoou andũ aingĩ mũno kuma ndũanĩ ĩsu nĩmaendie vala ve Yesũ, na yĩla mamwonie mamwĩsũva aume nthĩ yoo athi.
Currently Selected:
Mat 8: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011