Mal 3
3
1 #
Mat 11.10; Mk 1.2; Lk 1.76; 7.27 Mwĩai Ngai Mwene Ũtonyi W'onthe easya atĩĩ, “Nĩngũtũma mũtũmwa wakwa akanzeũvĩsye nzĩa. Nĩvo ĩndĩ Mwĩai ũsu mũũmantha wĩũka kwa kĩthũlũmũko Ĩkalũnĩ yake. Mũtũmwa ũla mweteele kwona akooka na aitavany'a ũtianĩo wakwa.”
2 #
Yoe 2.11; Ũvu 6.17 Ĩndĩ nũũ ũla ũkomĩĩsya mũthenya wa kũka kwake? Nũũ ũla wĩĩthĩwa na ũlũmu yĩla wĩumĩla? Mwĩai akeethĩwa ailyĩ ta mwaki ũla ũvĩvasya syũma ikatweka, kana ta savunĩ wĩ vinya wa ũla ũvũaa ngũa. 3Akooka kũsilĩla ailyĩ ta mũndũ ũla ũvĩvasya na kũthesya silĩva. O tondũ mũtwii wa syũma ũvĩvasya silĩva na thaavu, now'o mũtũmwa wa Mwĩai wĩthesya athembi nĩ kana maetee Mwĩai Ngai nthembo ĩla yaĩlĩte. 4Nĩvo ĩndĩ nthembo ya andũ ma Yuta na Yelũsalemu yĩmwendeesya Mwĩai Ngai, o tondũ ĩvindanĩ ĩvĩtũku kwailyĩ.
5Mwĩai Ngai Mwene Ũtonyi W'onthe easya atĩĩ, “Ngooka vakuvĩ nenyu nĩ kana nĩmũsilĩle. Ngaumya ũkũsĩ ĩũlũ wa aoi, ilaalai, ala mevĩtaa na ũvũngũ, ala mataĩvaa athũkũmi moo ĩtuvi yoo, ala mathĩnasya aka ndiwa na syana ndiwa, na kũlea kũnenga aeni sila wa katĩ na kũlea kũngĩa.”
Kumw'a kwa Kĩlungu kya Ĩkũmi
6“Nyie Mwĩai Ngai ndialyũkaa, na kwoou inyw'ĩ nzyawa sya Yakovo mũyaaminwa. 7Kuma ĩvinda ya aaũmae menyu, nĩmweelelũkile kuma motw'ĩonĩ makwa na mwalea kũmaatĩĩa. Nzyokeai, nakwa ngamũsyokea. Nĩasya ũu nyie Mwĩai Ngai Mwene Ũtonyi W'onthe. Ĩndĩ inyw'ĩ mwĩkũlya, ‘Twĩkũsyokea ũndũnĩ wĩva?’ 8Mũndũ akamũyĩa Ngai ata? Ĩndĩ inyw'ĩ nĩmũmbũyĩaa. Mwĩkũlya, ‘Twĩkũyĩa ata?’ Mwĩmbũyĩa ilungunĩ syenyu sya ĩkũmi na nthembonĩ syenyu. 9Mwĩ aumanĩe inyw'onthe andũ na nthĩ ĩno nũndũ nthĩ nĩmũmbũyĩaa. 10#Ali 27.30; Mot 18.21-24; Kũt 12.6; 14.22-29; Nee 13.12 Etei kĩlungu kya ĩkũmi kyonthe ĩkũmbĩnĩ nĩ kana vethĩwe lĩu nyũmbanĩ yakwa. Ndatei nyie Mwĩai Ngai ũndũnĩ ũũ yu mwone navingũa ĩtu, na ngĩmũtulũĩla ũathimo mwingĩ mwaĩwe nĩ vandũ va kũwĩkĩa. 11Ndiketĩkĩla ngie syanange ũsyao wa mĩũnda yenyu. Mĩsavivũ yenyu ĩkeethĩwa na ũsyao mwingĩ. Nĩasya ũu nyie Mwĩai Ngai Mwene Ũtonyi W'onthe. 12Nĩvo ĩndĩ andũ ma nthĩ syonthe meweta ũndũ mũathimĩtwe, nũndũ nthĩ yenyu ĩkeethĩwa yĩ ya kwendeesya mũno. Nĩasya ũu nyie Mwĩai Ngai Mwene Ũtonyi W'onthe.”
Mwĩai Ngai Akaete Sila wa Katĩ
13Mwĩai Ngai easya atĩĩ, “Nĩmũneenete ndeto nthũku mũno. Ĩndĩ inyw'ĩ mwĩkũlya, ‘Tũneenete ata ĩũlũ waku?’ 14Nĩmũneenete mũkasya, ‘Nĩ wĩa wa mana kũthũkũma Ngai. Ve vata mwaũ kwĩka ũndũ Ngai ũkwasya, kana kwony'a Mwĩai Ngai Mwene Ũtonyi W'onthe twĩ na kyeva nũndũ wa ũndũ twĩkĩte? 15Ũndũ kũilyĩ, twĩona andũ ala athũku me atanu. Andũ athũku maendee nesa, na o na yĩla matata Ngai nĩmavonokaa.’ ”
16Nĩvo ĩndĩ ala makĩaa Mwĩai Ngai maneenanisye ene kwa ene. Mwĩai Ngai nĩweethukĩĩisye na eew'a ũndũ maisye, na mbee wake vaandĩkwa ĩvukunĩ ya ũlilikany'o masyĩtwa ma ala me na kĩkĩo kyake, na manengete ĩsyĩtwa yake ndaĩa. 17Mwĩai Ngai Mwene Ũtonyi W'onthe easya atĩĩ, “Makeethĩwa andũ makwa mũthenya ũla nĩtw'a, makeethĩwa andũ makwa ki na ngamew'ĩa tei o tondũ mũndũ wĩw'ĩaa tei mwana wake ũla ũmũthũkũmaa. 18Nĩvo ĩndĩ mwĩĩthĩwa mũtonya ĩngĩ kũvathũkany'a ala alũngalu na ala athũku, mũndũ ũla ũthũkũmaa Ngai na ũla ũtamũthũkũmaa.”
Currently Selected:
Mal 3: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011