Mat 4
4
Jesû nîwagerirue nî ngoma
(Mar 1.12-13; Luka 4.1-13)
1 #
Ahib 2.18; 4.15 Na vuva wa ûguo Jesû nîwavirirwe nî Roho werûrî nîguo akagerue nî Ngoma. 2Nake Jesû nîwenyerekirie mîthenya mîrongo îna. Na kwoguo nîwavûtire mûno. 3Nayo Ngoma nîyathiîre kûrî ke na îkîmwîra atîrî, “Ethîrwa nîwe Mûriû wa Ngai, atha mathiga mama matuîke mîgate!”
4 #
Gûco 8.3
Nake Jesû nîwacokirie atîrî, “Mandîkorî matheru kwandîkîtwe atîrî, ‘Andû matitûûragua nî mîgate yonga, nwatî nîmatûûragua nî kiugo wa kîonthe kîrîa Ngai aaragia.’ ”
5Nayo Ngoma îo nîyacokire îkîvira Jesû îtûûrarî rîrîa rîtheru rîa Jerusalemu, na îkîmûrûngamia gacûmbîrî ga hekarû. 6#Tha 91.11-12 Nayo nîyamwîrire atîrî, “Ethîrwa we nîwe Mûriû wa Ngai, îîrivanie nthî, nîûndû mandîko matheru maugîte atîrî,
‘Ngai nîakaatha araika ake makûmenyerere;
nao nîmagagûtavîria na njara ciao,
nîguo ndûkaringwe kûgûrû nî îthiga.’ ”
7 #
Gûco 6.16
Nake Jesû nîwamîcokerie atîrî, “Wana rîngî mandîko matheru nîmaugîte atîrî, ‘Ndûkanagerie Mwathani Ngai waku.’ ”
8Nayo Ngoma îo nîyacokire îkîvira Jesû kîrîmarî kîraca mûno na îkîmwonia mothamaki monthe ma nthî, ûnene na ûthaka wamo. 9Nayo Ngoma îo nîyamwîrire atîrî, “Indo ino cionthe ûrona nîngûkûva, ethîrwa nîûkûndurîria maru ûngooce.”
10 #
Gûco 6.13
Nake Jesû nîwamîrire atîrî: “Uma varî nie Caitani! Mandîko matheru maugîte atîrî, ‘Goocaga Mwathani Ngai waku na ûmûtungatagîre wa ke wenga.’ ”
11Nayo Ngoma îo nîyatigire Jesû; nao araika makîthiî kûmûtungatîra.
Jesû nîwambîrîrie ûtungati wake îtûûrarî rîa Galili
(Mar 1.14-15; Luka 4.14-15)
12 #
Mat 14.3; Mar 6.17; Luka 3.19-20 Rîrîa Jesû eegwire atî Johana Mûvatithania aarî mwikie njeera, nîwathiîre vûrûrirî wa Galili. 13#Joh 2.12 Jesû nîwaumire îtûûrarî rîa Nazarethi, na akîthiî gûtûûra Kaperinaumu itûûra rîrîa rîarî vakuvî na îria rîa Galili vûrûrirî wa Zebuluni na Nafutali. 14Ûndû ûyû wekirwe nîguo maûndû mavinge marîa Ngai aarîtie na njîra ya mûrathi Isaia atî:
15 #
Isa 9.1,2 “We vûrûri wa Zebuluni, na vûrûri wa Nafutali,
mavûrûri marîa marî njîrarî ya kûthiî îriarî rîa Galili,
mûringo ûcio wîngî wa rûnjî rwa Jorodani,
Galili, kûrîa andû a ndûrîrî matûûraga!
16Andû arîa matûûraga ndumarî,
nîmonete ûtheri mûnene.
Nao arîa matûûraga mûtûûrîre ûrîa ûtagîrîrîte,
nîmakinyîrîtwe nî ûtheri.”
17 #
Mat 3.2
Kuuma vîndî îo Jesû nîwambîrîrie kûvunjia, akaugaga atîrî, “Îîrireeni mevia menyu, nîûndû ûthamaki wa îgûrû ûrî vakuvî!”
Jesû nîwetire ategi ana a nthamaki
(Mar 1.16-20; Luka 5.1-11)
18Na rîrîa Jesû aavîtûkîrîrîte rûtererî rwa îria rîa Galili, nîwonire ariû aîrî a ng'ina ûmwe magîtega nthamaki îriarî na neti, nîûndû ûcio nîguo warî wîra wao. Nao maarî, Simoni (ûrîa wîtagwa Petero) na mûrwang'ina Enderea. 19Nake Jesû nîwamerire atîrî, “Nûmîrîrani na nîngûmûtua ategi a andû.” 20Nao nîmaatiganîrie neti ciao wa rîmwe na makîmûrûmîrîra.
21Nake Jesû auma vau, nîwonire arûme engî aîrî a ng'ina ûmwe, Johana na Jakuvu. Nao maarî îtarûrî vamwe na îthe wao wetagwa Zebedii, magîtuma neti ciao. Nake Jesû nîwametire. 22Na wa rîmwe nîmatiganîrie îtarû wa vamwe na îthe na makîmûrûmîrîra.
Jesû nîwathomithanirie, akîvunjia na akîvonania
(Luka 6.17-19)
23 #
Mat 9.35; Mar 1.39 Nake Jesû nîwathiîre kûndû kuonthe vûrûrirî wa Galili, akîthomithanagîria mavoerorî, akîvunjagia Ûvoro Mwaro wîgiî Ûthamaki wa Ngai, na akîvonagia andû arîa maarwarîte mîrimû ya mîthemba yonthe, wana arîa maarî na wonje wa mîthemba yonthe. 24Nayo ngumo yake nîyatambire vûrûrirî wonthe wa Sîria. Kwoguo andû nîmaamûvirîre andû onthe arîa maarî arwaru na maarî na mîrimû ya mîthemba yonthe: ndaimono, kîvava na kwonja ciîga cia mwîrî. Jesû nîwamavonirie onthe. 25Nao andû eengî mûno a kuuma Galili, Dekapoli#4.25 Dekapoli: na rûthiomi rwa Kîngiriki nî kuga ‘matûûra îkûmi.’, Jerusalemu, Judea na mûringo ûcio wîngî wa rûnjî rwa Jorodani, nîmaamûrûmîrîre.
Currently Selected:
Mat 4: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019