2 MACABEOS 6
6
Cu cha'apachta'al ocsaj óolo'ob
(1 Mac 1.41-64)
1Cu dzo'ocol u máan dze'edzec kiine', ajawe' tu túuxtaj jun túul u nojochil u caajil Atenas u ti'al u beet u manba'alcunta'al u a'almaj t'aan u máanja'an ch'i'ibalo'ob le judíob bey xan u ti'al u beet u cuxtalo'ob jela'an ti' u a'almaj t'aano'ob Yuum Ku, 2u ti'al u manba'alcuntic u kulnajil Jerusalén yéetel u ti'al u jun páaycuntic ti' ku Zeus Olímpico, yéetel u ti'al u jun páaycuntic u kulnajil u pu'uquil Gerizim ti' Zeus Hospitalario, je'el bix tu káataj u cajnáalilo'ob le cúuchilo'.
3Tac le caajo' yaj u yilico'ob le kaakas ba'alo'obo'. 4Le kulnajo' u cúuchil ca'ach u yila'al ba'alo'ob kaastac ma' tu dzabal u p'iisilo'ob bey xan ma' ocsaj óol kiinbesajo'ob, cu beeta'al tumen ma' ocsaj óolo'ob cu qui'imaccuntic u yóolo'ob yéetel co'olelo'ob kaas u cuxtalo'ob bey xan cu yocsicuba'ob yéetel x choco pool x co'olelo'ob tu sujuy lu'umil kulnaj. Cu dzo'ocole' cu bisico'ob kulnaj ba'alo'ob wet'a'ano'ob u yocsa'ali', 5cu dzo'ocole' u multuunil le kultajo' cu yila'al chuup yéetel ba'alche'ob wet'a'an tumen a'almaj t'aan u ku'ubuli'. 6Ma' tu páajtal ca'ach u dzo'ocbesa'al u kiinil je'elel, mix tu páajtal u kiinbesa'al le kiino'ob suuca'ano'obo', mix tu páajtal u ya'ala'al wa judío le caajo'. 7Le caajo' quex ma' u káato'obe' cu beeta'al u jaantico'ob le ba'alche'ob cu quíimsa'alo'ob junjun winal u ti'al u kiinbesa'al úuchic u síijil ajaw. Le quéen kuchuc u kiinil ku Bacoe', le caajo' cu beeta'al u jóokolo'ob u xíimbalo'ob ich caaj u dzaamajo'ob u péet jo'olo'ob beeta'ano'ob yéetel u kabo'ob Yedra.
8Tu yáanal u táabsaj u cajnáalilo'ob Tolemaidae', j dzaab jun p'éel túuchi' t'aan u ti'al beyo' le caajo'ob griego'ob naadz yanilo'obo', ca beeta'ac xan u jaantico'ob le judíob le ba'alche'ob cu ku'ubulo'ob bey quíimsbil ba'alche'o'; 9le máaxo'ob ma' tu yóoltico'ob u beeto'ob le ba'axo'ob cu beetico'ob le griego'obo' bíin ku'upuc u caalo'ob. Tuláacal lelo' cu beetic u yila'al le yajil cu náadzalo'.
10Jun téene' ca'a túul co'olelo'ob j bisa'abo'ob tu táan aj p'is óolo'ob tumen tu súuy kuptajo'ob u xiibil u paalalo'ob; cu dzo'ocol u beeta'al u xíimbalo'ob tu táan tuláacal le caajo', bey u méekmajil u paalalo'obo' léech'inta'abo'ob tu ca'analil le tuulumo'. 11U láako'ob cu much'icuba'ob ti' áactuno'ob naadz yanilo'ob u ti'al u kiinbesico'ob u kiinil je'elele', le ca j ta'ac u poolo'ob tu táan filipoe', láaj múuch' tóoca'abo'ob, bey tumen cu tziquico'ob u kiinil je'elele' ma' tu yóoltajo'ob u tocjuba'obi'.
12Quin káat óoltic ti' le máaxo'ob xoquic le ju'una' ma' u lúubul u yóolo'ob tu yo'olal le yaj óolo'oba', ba'ale' u na'ato'obe' le yayaj óolalo'obo' u ti'al u tojquinta'al u beel c caajal, ma' u ti'al u xu'ulsa'alo'obi'. 13Tumen u chíiculal u yaacunaj kue' ma' u chíimpoltic kebano'ob, ba'ale' cu séeb jadzico'ob; 14u ti'al ca u jadz u láak múuch' caajo'obe', Yuumtzile' cu pa'atic u chúucpajal u ya'abil u kebano'ob, ba'ale' to'one', 15cu séeb jadzico'on tu yo'olal ma' c sen kebantal. 16Tumen leti'e' ma' tu lukesic to'on u yaacunaj, tumen quex cu tojquintic cuxtal yéetel yajilo'obe', ma' tu xunp'attico'on. 17Ma' kabéet ca in ka'ajes te'ex u láak ba'alo'obi'; bey dzo'oc xot'ic le tzicbala', co'ox ca'a ch'a'a óoltic.
Cu quíimsa'al Eleazar
18Eleazar jun túul u nojochil u aj ca'anbesajo'ob a'almaj t'aane', jun túul máac ch'ija'an jach tzicbe'ene', táan ca'ach u ja'apal u chi' u ti'al u beeta'al u jaantic u bakel kéeken. 19Ba'ale' leti'e' tu yéeyaj jun p'éel tziiquil quíimil tu tzéel subtzil cuxtale', tu juunal u yóol j bin tu cúuchil u quíimsa'al 20cu dzo'ocol u túubic le bako'. Tu beetaj ba'ax unaj u beetic le máaxo'ob ma' tu jaantico'ob ba'ax ma' unaje', mix u ti'al u toquicuba'ob ti' quíimil. 21Le máaxo'ob ilic u jaanta'al le ba'axo'ob ma' utz tu táan a'almaj t'aano', bey tumen úuch u kaj óolto'ob le j xiibo', tu dzajo'ob jun tzéelile' ca tu ya'alajo'ob ti' ca u taas bak cu páajtal u jaantic leti' nu'ucbesmajil, u ti'al ca u beet bey táan u jaantic le bak kuba'an bey quíimsbil ba'alche' je'el bix u ya'almajil ajawo'. 22Beyo' je'el u púudzul ti' le quíimilo', leti'ob xane' bey úuch jo'op'oc u bisicuba'ob tu yéetelo' je'el u ch'a'ico'ob óotzilil ti'e'. 23Ba'ale' Eleazare', tu cha'a jo'oltaj u ye'esic buca'aj nojoch u tziiquil, tu yo'olal dzo'oc u ya'abtal u ja'abilo'ob, ch'ija'an yéetel dzo'oc u sactal u tzo'otzel u pool, u chíiculal u meyajo'ob yéetel u tzicbe'enil, lelo' cu ye'esic bix tojil u cuxtal líikbal tu chichanil, u ti'al u tziquic u quili'ich a'almaj t'aan Kue', tu núucaj: Quíimsene'ex jun puli'. 24Tu yo'olal in ja'abilo'obe' ma' utz ca tuusnaqueni'; ma' in káat ca u tuculte le xi'ipalalo'ob, teen Eleazar yaan teen noventa ja'abo'obe' ti' wocsaj óoltaj Táanxel lu'umil ocsaj óolal, 25beyo' tu yo'olal in ca'a p'éel ichil bey xan tu yo'olal jun p'éel cóomcom cuxtale', ca lúubuco'ob ti' tuusil chéen tin wo'olal. Beyo' je'el in taasic ti' yóokol in ch'ija'anil jun p'éel subtzilil manba'alcunaje'. 26Yéetel u láak ba'ale', quex ca púudzuquen bejela'a' ti' u jaadz wíinico'obe', mix cuxa'anen mix quimenen je'el in púudzul tu kab le Aj páajtalilo'. 27Le o'olale' quin p'atic le cuxtal yéetel j xiibila', u ti'al ca in we'es u tziiquil in nuxibil, 28quin p'atic ti' le j xi'ipalalo'ob jun p'éel e'esaj toj cuxtalil, tumen quin kubic in cuxtal tu yo'olal c quili'ich a'almaj t'aano'ob. Le ca tu ya'alaj lelo' j bin tu séeblaquil tu'ux bíin quíimsa'aco'. 29Le máaxo'ob bisico' le ca tu yu'ubajo' bix u t'aane', tumen tu tucultajo'ob táan u t'aan bey jun túul máac chocol u poole', tu kexaj u ch'a'a óotzililo'ob yéetel kasa'anil. 30Ba'ale' Eleazar ta'itac u quíimil yéetel jaadzo'obe', tu ya'alaj táan u ch'a'ic u yiik: Yuumtzile' u láaj ojel. Leti'e' u yojel quex tumen páatchaj in púudzul ti' quíimile', quin mukyajtic tin wíinclil nucuch mukyajo'ob tu yo'olal jaadzo'ob; ba'ale' leti'e' u yojel sen qui'imac in wóol tin baatzil tu yo'olal in tzicmail. 31Bey quíimico', tu p'ataj le ca'a quíime', jun p'éel nojoch ca'anbesaj ma' chéen ti' xi'ipalalo'obi', ba'ale' ti' tuláacal caaj tu p'ataj jun p'éel j xibil cuxtal u ti'al jadzutz ka'ajsajil.
Currently Selected:
2 MACABEOS 6: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.