2 MACABEOS 15
15
Bix pa'abic u muuk yéetel bix quíimic Nicanor
(1 Mac 7.29-50)
1Le ca tu yojéeltaj Nicanor ti' yaan Judas yéetel u aj ba'atelo'ob tu tojil Samariae', tu tucultaj bin u ca'a u puljubáa tu yóokolo'ob, ba'ale' tu yo'olal ma' u dzáicuba'ob tu táan u chi' quíimile', tu puljubáa tu yóokolo'ob tu kiinil je'elel. 2Le judíob j beeta'ab u bino'ob te j ba'atel quex ma' u káato'obo', tu ya'alajo'ob ti': Ma' a quiimsico'ob bey ba'alche', tzic u kiinil Ku, le máax cu yilic tuláacal ba'al, tu nojbe'eniltaj yéetel tu jun páaycuntaj.
3Ba'ale', le ma' pucsi'ikalo', tu káat chi'itaj wa yaan ti' ca'an jun túul Yuumtzil máax túuchi'imajil le kiin u ti'al u kiinbesa'al u kiinil je'elelo'. 4Leti'obe' tu núucajo'ob ti':
Yuumtzil máax cuxa'an: yaan u páajtalil j ca'ane', leti' túuchi'itmajil to'on ca c kiinbese u siete kiin.
5Nicanor túune' tu núucaj:
Tene' yaan in páajtalil j lu'um, ca tu ya'alaj ca ch'a'abac u nu'ucul le ba'atelo', ca dzo'obesac ba'ax cu ya'alic ajaw.
Ba'ale', ma' páatchaj u dzo'ocbesic u kaakas tuuculi'. 6Nicanor ichil u noj ba'alil yéetel u ca'anal ichile', u tucultmaj ca'ach u beetic u pakil ka'ajsajil ich caaj yéetel le ba'axo'ob bíin u toc ti' Judas. 7Ba'ale' Macabeoe', ma' tu luksaj u yocsaj óol, chuup yéetel alab óolal tumen bíin áanta'ac tumen Yuumtzili', 8beyo' cu dzáic u yóol u yéet aj ba'atelo'ob u ti'al ma' u ch'a'ico'ob sajaquil ti' le ma' ocsaj óolo'ob, ba'ale' bey cu ka'ajal ti'ob le áantaj dzo'oc u kamico'ob ti' Kuo', cu pa'atico'ob xan u dza'abal pa'a muuk ti'ob tumen Junab Kue' u Yuumil tuláacal páajtalil. 9Tu dzaj u yóolo'ob yéetel u t'aan aj bóobato'ob, tu ka'ajsaj ti'ob le ba'atelo'ob dzo'oc u beetico'obo', ca tu beetaj u chuca'anta u yóolo'ob. 10Cu dzo'ocol u dzáic u yóolo'obe', tu tzolaj u xiquino'ob yéetel tu ye'esaj ti'ob bix tu manba'alcuntajo'ob u jalach t'aano'ob le ma' ocsaj óolo'obo'.
11Beyo' tu asab mu'uka'anquinto'ob yéetel u t'aano'ob, tac ti' le muuk cu dzáic chimalo'ob yéetel lóomte'ob. Tu yóokol lelo' tu tzicbaltaj ti'ob jun p'éel náay, cu páajtal u yocsaj óolta'al tu wayaktaj leti', lelo' tu beetaj u qui'imacchajal u yóol tuláacalo'ob. 12Le náaya' leti' lela': Onías u úuchben noojoch aj kiino'ob, jun túul j xiib jach utz, mix jun téen ca'analchaj u yich bey xan utz u bisicubáa, jach utz u t'aan, yéetel toj u cuxtal likbal tu chichanile', u tich'maj u kabo'ob táan u payalchi' tu yo'olal u caajil judíob. 13Tu séeblaquile' j chíicpaj jun láak jun túul j xiib, séeb u kaj óolta'al tu yo'olal u tzo'otzel u pool sac, tzicbe'en xan; le tzicbe'en bakpachmailo' cu ye'esic ma' chéen jun túul je'el máaxe', leti'e' jun túul ca'anal méektáanil. 14Oníase', j t'aanaje' ca tu ya'alaj: Leti'e' Jeremías u aj bóobat Ku, u yéet óol u láako'ob cu payalchi' tu yo'olal le cajnáalo'obo' bey xan tu yo'olal le quili'ich caajo'. 15Jeremíase' tu tich'aj u kabe', ca tu dzaj ti' Judas jun p'éel máascab oro u ca'aje' ca tu ya'alaj ti': 16Ch'a'a le quili'ich máascab cu dzáic teech Kua'; yéetel leti' bíin a xu'uls a aj p'eeco'ob.
17Le ca j dzo'oc u ch'a'ic u yóolo'ob yéetel u t'aano'ob Judas, t'aano'ob cu dzáic j xiibil yéetel cu sutic mu'uka'an máaquilo'ob le j xi'ipalo'obo' tu tucultajo'ob ma' unaj u p'áatalo'ob tu cúuchil tu'ux cu je'elelo'obi', ba'ale' unaj u pulicuba'ob yéetel j xiibil te j ba'atelo', yéetel j xiibil unaj u ba'atelo'ob tu jujun túulilo'ob u ti'al u toquicuba'ob, tumen Jerusalén, u ocsaj óolalo'ob yéetel le kulnajo' ta'itac u to'ocol ti'ob. 18U sajaquilo'ob tu yo'olal u yatano'ob, u paalalo'ob yéetel u láaktzilo'obe', mix ba'al tu tzéel tu yo'olal u sajaquilo'ob tu yo'olal le kulnaj ma' úuch cu yutzquinta'al yanilo'. 19U chi'ichnaquil le máaxo'ob p'aatalo'ob te j caajo', bey je'el bix u chi'ichnaquilo'ob le yano'ob tu'ux cun úuchul le ba'atelo'. 20Tuláacalo'ob táan u pa'atico'ob u yilico'ob ba'ax cun úuchul. Le aj p'eeco'obo' dzo'oc ca'ach u much'quintico'ob u muuko'ob; le aj ba'atelo'obo' dzo'oc u nu'ucbesicuba'ob u ti'al le ba'atelo', le elefanteobo' dza'ano'ob ti' ma'alob cúuchil, tu tzéelo'obe' ti' yaan le tzíimino'ob. 21Le ca tu yilaj Macabeo le aj ba'atelo'ob cu náadzal, bey xan u jejeláas nu'uculo'ob u ba'atelo'ob yéetel u dzíiquil le elefanteobo', tu tich'aj u kabo'ob j ca'ane' ca j payalchi'inaj ti' Yuumtzil, cu beetic máactzilo'ob, tumen u yojele', Yuumtzile' cu dzáic pa'a muuk ti' máaxo'ob najmatic, ma' u nu'ucul ba'atelo'ob dzáiqui', leti' dzáic. 22Payalchi'inaj ti' Yuumtzil beya': Teche' Yuumtzil, tu kiinilo'ob Ezequías u ajaw Judae', ta túuxtaj a ángele', ca ta xu'ulsaj ciento ochenta y cinco mil j xiibo'ob ti' u cúuchil u je'elel Senaquerib; 23bejela'e' u Yuumtzil ca'an, túuxte jun túul utzul ángel t táan u ti'al u pak sajaquil yéetel sat óolal. 24Loobiltej yéetel u páajtalil u muuk a kab le ma' ocsaj óolo'ob cu p'a'astiquecho'oba', yéetel cu pulicuba'ob tu yóokol a quili'ich kulnaj. Bey dzo'oquic le payalchi'o'.
25U aj ba'atelo'ob Nicanore' j xíimbalnajo'ob ca'aliquil táan u pa'axal trompetaob yéetel u yúuchul u kaayilo'ob ba'atel; 26u aj ba'atelo'ob Judase' tu puljuba'ob j ba'atel yéetel káat óolalo'ob bey xan yéetel payalchi'ob, 27bey ba'atelnajo'ob yéetel u kabo'ob táan u payalchi'ob tu kaaba' Junab Ku tu pucsi'ikalo'obo', tu p'atajo'ob jaytal j lu'um míin treinta y cinco mil aj p'eeco'ob, ca sen qui'imacchaj u yóolo'ob tumen áanta'abo'ob tumen Ku. 28Cu dzo'ocol le ba'atelo', u ti'al u lukbalo'ob chuupo'ob yéetel qui'imac óole', tu yilajo'ob Nicanor yéetel u búuquil ba'atele', j quíim ichil le ba'atelo'. 29Bey túuno' tu chúumuco'ob awato'ob yéetel ka'aytajo'obo', tu qui' t'antajo'ob Yuumtzil je'el bix tu canajilo'ob ti' u t'aanilo'ob tu mejentaquilo'obe'. 30Judas le máax u kubmajubáa tu jaajil u yóol ti' le ba'atel táanil ti' u chuucáano'ob tu yo'olal u yéet caajalo'obe', bey ma' u tu'ubs u yaacunaj ti' u caajal likbal tu chichanilo', tu téec a'alaj ca ku'upuc u pool yéetel u x no'oj kab u ti'al ca bisa'ac Jerusalén.
31Judas xane' j bin Jerusalén, cu dzo'ocol u much'quintic u yéet caajalo'ob yéetel le aj kiino'obo', j wa'alaj tu táan u multuunil kultaj, ca tu túuxtaj t'anbil le máaxo'ob yaan ichil le caajo' 32ca tu ye'esaj ti'ob u pool le ma' ocsaj óol Nicanor yéetel u muuk u kab le tu tich'aj yéetel noj ba'alil tu tojil u quili'ich kulnaj u Yuumil tuláacal páajtalil; 33cu dzo'ocole' tu xotaj u yaak le ma' ocsaj óol Nicanoro' ca tu beetaj u p'ap'ay xo'otol u ti'al dzaabil ti' ch'íicho'ob cu jaantico'ob quimeno'ob, bey xan ca dzabac u muuk u kab tu táan kulnaj u ti'al u bo'olil u ma' na'atil. 34Tuláacalo'ob túune' tu líikesaj u yicho'ob j ca'ane' ca tu qui' t'antajo'ob Yuumtzil, tu dzajubáa tu tzéelo'ob, tu ya'alajo'ob: ¡Qui' t'antbil Yuumtzil ma' tu cha'aj u kascunta'al u yanil u kulnaji'! 35Judase' tu ch'uyquintaj ti' le caaj u pool Nicanor, u ti'al u chíiculal ti' tuláacal máac u Yáantaj Yuumtzil, 36beyo' tuláacalo'ob yéetel jun p'éelili' tuucule', tu ya'alajo'ob ma' bin u p'ato'ob x ma' ka'ajsajil le kiinoo', ba'ale' bíin u kiinbeso'ob tu kiinil trece ti' le winal doce, cu kaaba'intic Adar ich arameo, jun p'éel kiin táanil ti' u kiinbesajil Purim.
U dzooc t'aano'ob
37Bey úuchic le ba'alo'ob tu yo'olal Nicanor, likbal ti' le kiino'obo', le caajo' j p'áat tu kab le hebreob.
Tene' way cu dzo'ocol in tzicbale'. 38Wa ma'alob dzíiba'anil bey xan tu tzoolol yane', lelo' bey tin tucultaj in beetic. Wa jach óotzil yéetel mix ba'al u biilale', chéen le j páatchaj in beetic. 39Je'el bix ma' qui' u yu'ukul ja' yéetel vino jujun páay, ba'ale' u yu'ukul vino xa'aka'an yéetel ja'e' jach qui' ti' chi', bey xan u yúuchul jun p'éel dzíib, wa cu dzíibta'al jadzutze', jadzutz u yu'uba'al tumen máaxo'ob xoquic. Yéetel lela' cu dzo'ocol ba'ax quin tzicbaltic.
Currently Selected:
2 MACABEOS 15: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.