Lucas 17
17
Jutsaman pitapis mana ishkitsinanpaq Jesús tantiyatsinqan
Mateo 18.6-7, 21-22; Marcos 9.42
1Tsaypitanam discïpulunkunata Jesús nirqan: <<Runa majinta jutsaman ishkitsiqkunam imaypis kayanqa. Peru ¡allaw, pitapis jutsaman ishkitsiq runa! 2Juk wamrallatapis jutsaman ishkitsiptinqa mas allim kanman mulinu rumita kunkanman watarkur lamarman jitarpuyaptin. 3¡Tsaynö kaykaptinqa cuidädutaq pitapis jutsaman ishkitsiyankiman!
Runa majintsikta perdonanapaq Jesús yachatsikunqan
<<Runa majiki mana allita rurashuptiki, piñaparnin plëtunki. <Perdonaykallämay> niyäshuptikiqa perdonanki. 4Juk junaqllachö qanchis kuti contrayki mana allita ruraskir qanchis kuti <perdonaykamay> nishuptikiqa perdonanki>>.
Mas creyikuq kayänanpaq mañakuyanqan
5Tsaynam apostolninkuna Señor Jesústa niyarqan: <<Mas firmi creyikayämunäpaq yanapaykayällämay>>.
6Señor Jesúsnam nirqan: <<Mostäzapa murunnö ichikllapis creyikuynikikuna kaptinqa kay sicómoro jachata <kaypita tirakaskir lamarman jawikay> niyaptikipis cäsuyäshunkimanmi>>.
Servikuqnölla kanapaq Jesús ninqan
7<<Maski mayqaykipapis serviqnikikuna yapyakunqanpita o mitsikunqanpita chaykamuptin ¿acäsu <päsakamuy jamaykur mikuskinaykipaq> niyankiku? 8Masbienmi niyanki: <Meriendä kusinaskir qaramay. Mikur upyar ushanqäyaq servimay. Tsaypitanam qamqa mikukunki>. 9Tsaynö mandayanqaykita ruraykaptinpis ¿acäsu tsay servikuqnikita pächi nikuyankiku? Manam.
10<<Tsaynöllam qamkunapis Dios Yaya mandayäshunqaykikunata cumpliskir niyankiman: <Noqantsikqa Diospa serviqninlla karmi mandamanqantsikllata ruraykantsik> >>.
Leprawan qeshyaykaq chunka runakunata Jesús kutikätsinqan
11Jerusalénman aywaykarmi Galilea y Samaria mujunninpa Jesús päsarqan. 12Juk takshalla markaman chaykaptinmi leprawan qeshyaykaq chunka runakuna tinkupäyarqan. Peru manaraq charmi karullapita 13qayaraypa jinchi niyarqan: <<¡Tayta Jesús, llakipaykäyällämay!>>
14Paykunata rikaykurnam Jesús nirqan: <<Rikäyäshunaykipaq sacerdötikunaman aywayay>>.
Aywaykarnam kutikaskiyarqan. 15Kutikashqana kanqanta tantiyaskirmi jukaqllana Dios Yayata alabarnin jinchi qayaykachar Jesúsman kutirqan. 16Chaykurnam urkunpis patsaman chanqanyaq Jesúspa puntanman qonqurikuykur <<¡gracias, taytay!>> nirqan. Tsay runaqa Samariapitam karqan.
17Jesúsnam nirqan: <<Kutikaqkunaqa ¿manaku chunkaq kayashqa? ¿Maytan wakinqa? 18Kay juklä runallam Dios Yayata agradëcikurnin kutimushqa>>.
19Tsay runatam nirqan: <<Sharkur aywakuy. Confiakunqaykipitam kutikashkanki>>.
Dios Yayapa mandakuynin imay chämunanpaq kanqanta Jesústa tapuyanqan
Mateo 24.23-28, 36-41
20Juk kutim fariseukuna Jesústa tapur niyarqan: <<Dios Yayapa mandakuynin ¿imaytan chämunqa?>>
Jesúsnam nirqan: <<Dios Yayapa mandakuynin chämunanpaqqa manam ima señaltapis rikäyankitsu. 21Manam pipis ninqatsu <kaychömi> o <washachömi kaykan>. Dios Yayapa mandakuyninqa qamkuna kaqchönam kaykan>>.
Jesús manaraq kutimuptin imanö kananpaq ninqan
22Tsaypitanam discïpulunkunata nirqan: <<Shamuq watakunachömi Runapa Tsurin juk junaqkunallapis mandakuq kanqanta rikayta munayanki, peru manam rikäyankitsu. 23<Kaychömi kaykan> o <washachömi kaykan> niyäshuptikipis ama cäsuyankitsu ni rikaq aywayankitsu. 24Illaqukuptin ciëlupa juk kuchunpita jukaq kuchunyaq atsikyanqanta rikäyanqannömi Runapa Tsurin kutimuptin llapanpis rikäyanqa. 25Peru tsaykuna manaraq päsaptinmi kanan tiempu runakuna payta chikirnin alläpa ñakatsiyanqa.
26<<Noé kawanqan witsay runakuna kawayanqannömi#Gén. 6.5-8. Runapa Tsurin shamunqan witsaypis kawayanqa. 27Arcaman Noé yaykunqan junaqyaqmi runakuna mikur, upyar y casarar kayarqan. Tsaynö kaykäyaptinmi diluviu shamur llapan runakunata jankat ushakaskatsirqan.
28<<Tsaynöllam Lot kawanqan witsaypis#Gén. 19.1-29. runakuna mikur, upyar, rantipakur, rantikur, murupakur y wajikunata rurar kayarqan. 29Peru Sodoma markapita Lot yarqunqan junaqmi ciëlupita azufrintin nina runtu tamyamur llapan runakunata ushakätsirqan. 30Tsaynöllam kanqa Runapa Tsurin kutimunqan junaqpis.
31<<Tsay junaqqa waji jananchö kaykaqkuna#17.31 Tsay witsaymi wajita qatayanqanpa rantin teranti jananman tsaqllaskir qetäwan lashtayaq. Tsay jananchömi awakuyaq, aqakuyaq y trïgutapis akrakuyaq. imantapis jorquq ama wajinkunaman yaykuyätsuntsu. Chakrachö kaykaqkunapis ama wajinman kutiyätsuntsu. 32¡Yarpäyay Lotpa warminta ima päsanqantapis!#Gén. 19.17, 26. 33Kawayninta salvayta munaqkunam kawayninta oqrayanqa. Kawayninta oqraqkunam sïqa kawayninta salvayanqa.#17.33 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; Mar. 8.35; Juan 12.25.
34<<Noqam niyaq: Tsay paqasmi juk cämachö ishkaq puñuykäyaptin jukaqta pushanqa y jukaqtana dëjanqa. 35Maraychö ishkaq warmikuna aqakuykäyaptinmi jukaqta pushanqa y jukaqtana dëjanqa. 36[Ishkaq runakuna chakrachö aruykäyaptinmi jukaqta pushanqa y jukaqtana dëjanqa]>>.
37Tsaynam tapuyarqan: <<Taytay, ¿maychötan tsaynö kanqa?>>
Jesúsnam nirqan: <<Maychöpis wañushqakuna jitaräyanqanmanmi wiskulkuna qorikäyanqa>>.#17.37 Tsaynö nirmi Jesucristo tantiyatsirqan ninqankuna maytsaychö päsananpaq kanqanta.
Currently Selected:
Lucas 17: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.