2 Timoteo 2
2
Mana ajayaypa willakunanpaq ninqan
1Timoteo, kuyay tsurïnö kaptikim niq: Jesucristo yanapaykäshuptikiqa mana ajayaypa pay munanqannö kawakuy. 2Runakunapa puntanchö yachatsinqaqta confiakuypaq kaq wawqikunata yachatsiy paykunapis wakin kaqkunata yachatsikuyänanpaq.
3Jesucristupa soldädun kaykarqa imaykata sufrirpis pay munanqannö kawakuy. 4Manam ni mayqan soldädupis soldädu kayninta dëjaskir juk rurayman aywantsu. Masbienmi mandaqnin ninqanta ruran. 5Tsaynöllam llallinakuypa cörriqkunapis premiuta chaskiyänanpaq reglamentu ninqannölla cörriyan. Tsaynö mana cörrirqa manam ni ima premiutapis chaskiyantsu. 6Murukuq runapis murunqan mikuy wayuptinmi puntata yawan. 7Kay ninqaqkunata shumaq yarpachakuptikiqa Señor Jesucristum yanapashunki shumaq tantiyakunaykipaq.
8Timoteo, rey David ayllupita Jesucristo yurinqanta y wañuskir kawamunqanta mana qonqar willakuy. Tsayllatam noqapis willakuykä. 9Tsayta willanqäpitam alläpa sufrir imayka wañutsikushqanö carcelchö qaykuraykä. Qaykuraptïpis Jesucristupa willakuynintaqa manam imapis tsapantsu. 10Tsaymi imaykata sufrirpis mana ajayaypa Jesucristupa willakuyninta willakuykä. Tsaynöpam akranqan kaqkuna Jesucristuman creyikuyaptin Dios Yaya salvanqa gloriachö imayyaqpis kawakuyänanpaq.
11Kay willakuyqa rasunpa kaqmi:
Jesucristuwan wañushqana kaykarqa paywanmi kawakushun.#Rom. 6.8; Col. 2.20.
12Imaykata sufrirpis awantarqa paywanmi mandakushun.#Rom. 8.17; 1Ped. 4.13.
Nëgashqaqa paypis nëgamäshunmi.#Mat. 10.33; Luc. 12.9.
13Prometinqantsikta mana cumplishqapis payqa cumplinmi.
Pay prometinqantaqa manam imaypis nëgakuntsu.
Dios munanqannö willakunanpaq ninqan
14Kay ninqaqkunata wawqikunata y panikunata imaypis yarpätsinki. Dios Yayapa shutinchö tantiyatsiy mana alli yachatsikuykunata mana chaskiyänanpaq. Tsaykunata chaskirmi Dios Yaya munanqannötsu kawayan. Tsaynöllam wawqikunata y panikunata alläpa jaqayätsiyan.
15Dios Yaya munanqannö willakuyninta shumaq yachatsikuy. Alli yachatsikurqa alli arupukuq runa mana penqakunqannömi qampis penqakunkitsu. 16Llutan yachatsikuqkunawan ama piñanakuytsu. Paykunawan piñanakuptikiqa wawqikunapa y panikunapa shonqunkunam mas chukruyanqa.
17Llutan yachatsikuyqa imayka cáncer qeshyaynömi maytsaymanpis chan. Himeneuwan Filetum mana allikunata yachatsikur puriykäyan. 18Paykunam niyan Jesucristuman creyikur kawamushqanöna kar wañunqantsikpita manana kawamunapaq kanqanta. Tsay yachatsikuyninkunawan pantatsiyaptinmi wakin wawqikuna y panikuna Jesucristuman creyikuyannatsu.
19Peru wakin kaqkuna mana creyikuyaptinpis Dios Yaya akranqan kaqkunam sïqa alli cimientuyuq wajinö firmi kayan. Tsaymi Diospa palabranchö nin: <<Payman confiakuqkunatam Dios Yaya reqin>>.#Núm. 16.5; Juan 10.14; 1Cor. 8.3.
Tsaynöllam nin: <<Dios Yayaman#2.19 Wakin qepa kaq griego copiakunaqa Cristuman niyanmi. creyikuqkunaqa jutsata ama rurayätsunnatsu>>.
20Rïcu runapa wajinchöqa manam qorillapitatsu ni qellayllapitatsu plätukuna, sinöqa qerupita y mitupitapis kanmi. Qoripita y qellaypita plätukunaqa manam llutakunachö manijanapaqtsu. Peru qerupita y mitupita kaqkunam sïqa imaykachöpis lluta manijanapaq. 21Pipis qoripita plätunö kananpaq jutsata manana rurar kawakutsun y llutan yachatsikuykunata ama chaskitsuntsu. Tsaynöpam qoripita rurashqa manëjukunata rïcu runa üsanqannö paytapis allita rurananpaq Dios Yaya üsanqa.
Timoteo imanö kawakunanpaq ninqan
22Wakin kaq jövinkuna mana allikunata rurayaptinpis qamqa ama ruraytsu. Masbien Dios Yaya munanqannö kawakuy, payman confiakuy, pïmaytapis kuyay y llapan runakunawanpis shumaq kawakuy. Tsaynölla Señor Jesucristuta alabar limpiu shonquyuqkunawan imaypis qorikay.
23Mana alli yachatsikuykunapita wakin runakuna piñanakuyaptinpis ama tsayman mëtikuytsu. Tsaynö piñanakurmi jaqayätsinakuyan. 24Señor Jesucristupa serviqnin kaykarqa piwanpis mana piñanakur kawakuy. Tsaynölla llapan runakunawanpis shumaq kawakuy, alli yachatsikuy y pacienciaykipis katsun.
25Contrayki shäriqkunata alli shimillaykipa tantiyatsiy. Tsaynö tantiyatsiptiki talvezchi Dios Yaya tantiyatsinqa jutsankunapita arrepentikur pay munanqannöna kawayänanpaq. 26Tsaynö kawakurmi diablupa poderninpita yarquskir Dios Yayapa poderninchöna kawakuyanqa.
Currently Selected:
2 Timoteo 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.