MATEU 18
18
Owahambakana vakwavo iya?
(Mako 9.33-37; Luka 9.46-48)
1Halwola luze vene tumbaji twenyi vapandamine kuli Yesu nakumwihula ngwavo, Nyi iyaze ou nahambakana vakwavo muwangana wamelu?
2Asanyikile mwana wamundende eze kuli Ikiye, amwimikile mukaci kavo,
3avambile ngwenyi, Camwenemwene nangumilweza ngwami, #19.14; Mako 10.15; Luka 18.17.Xina kuvanga namwalumuka nakupwa nge vana vavandende, mokomoko kamwexi kukengila muwangana wameluko.
4Xikaho wose mwalinyisa nge uno mwana wamundende, ikiye vene ou nahambakana vakwavo muwangana wamelu.
5 #
10.40; Luka 10.16; Yowa. 13.20. Kaha wose mwetavila mwana wamundende umwe nge ou halijina lyami, nangwitavilAmi.
Kulimbwisa vakwenu
(Mako 9.42-48; Luka 17.1-2)
6Oloze wose mwakalimbwisa umwe wakuli ava vavandende vakakufwelela kuli Ami, cinawahe kuli ikiye kaci vanamukaxilila lilolwa lyakucekesa unga lyalinene muxingo, nakumulondomanyisa mumwambe wamukalungalwiji.
7Mama lelo hali vaka-mavu mwomwo havimbunji! Mwomwo #Luka 17.1-2.kacexi kuhasa kulinga mwakuhonesa vimbunji kusolokako, oloze #26.24.mama lelo hali mutu uze mwaneha cimbunji!
8Xikaho #5.29-30.kaci nge livoko lyove, cipwe nge lihinji lyove lyeji kukulimbwisanga, livatulelyo, mbilalyo. Cinawahe kuli ove kwingila kukuyoya ucitonji, nalihinji limwe kaha, kuhambakana kutwama namavoko avali namahinji avali nakukumbila mukakahya kahaya myaka yosena.
9Kaha kaci nge liso lyove lyeji kukulimbwisanga, litombongonyemo, mbilalyo. Cinawahe kuli ove kwingila naliso limwe kaha kukuyoya, kuhambakana kutwama nameso avali nakukumbila #5.22.muNgehena yakakahya.
Ciximo camukoko ou mwajimbala
(Luka 15.3-7)
10Nyingililenunga, kuli ava vavandende kanda mukalumbilisako umweko, mwomwo nangumilweza ngwami, Mwilu #Vili. 12.15.vangelo javo veji kumonanga meso aTata ali mwilu hamakumbi osena.
11Mwomwo #Luka 19.10.Mwanamutu neza mangana alwile cize cajimbalile.
12Munaxinganyeka muka? Kaci nge kuli mutu ali namikoko jenyi likulukaji, kaha nge kuli vakivo kunalaluka umwe, vaze makumi atanu naawana navatanu navawana kexi kuvasezako numba, himwaya kujipili nakumutonda uze nalaluka?
13Kaha kaci nge mwamuwana, Camwenemwene nangumilweza ngwami, mwawahilila cikuma hali uze alalukanga, kuhambakana kuwahilila cahali ava makumi atanu naawana navatanu navawana vanazeneka kulaluka.
14Ngoco nawa kuli ava vavandende Senu ali mwilu kasakile ngwenyi, umwe akanongeko.
Ndumbwove ou mwakuvulumuna
15Kaha #Luka 17.3; Ngale. 6.1; Yako. 5.19-20; Levi 19.17.kaci nge ndumbwove mwakuvulumuna mulonga, yako ukamulweze mulonga wenyi kwauka wenu naikiye kaha. Kaci nge mwakwivwilila, kaha kunahu unamuwane ceka ndumbwove.
16Oloze kaci nge mwakana kukwivwilila, kaha yenu namukwenu umwe, cipwe navavali, mangana #Luxi. 19.15; Yowa. 8.17; Koli. 2, 13.1; Cimo. 1, 5.19; Hepe. 10.28.mutunwa twavinjiho vavali, cipwe vatatu, mazu osena akakole mbe.
17Kaha kaci nge mwakana kuvevwilila navakivo nawa, #Koli. 1, 6.1-6.cambulule kuliuka. Oloze nge mwakana kulivwilila naliuka nawa, kaha apwenga jino nge muka-lifuci lyeka kuli ove, nge muka-kukonga milambu kaha.
18Camwenemwene nangumilweza ngwami, #16.19; Yowa. 20.23.Vyexovyo namukakasa hamavu navikapwanga vyakukasa namwilu nawa, kaha vyexovyo namukakasununa hamavu navikapwanga vyakukasununa namwilu nawa.
19Ceka nawa nangumilweza ngwami, #7.7; 21.22; Yako. 1.5-7; Yowa. 1, 5.14; Yowa. 14.13.Kaci nge muli enu muli vavali navevwasana cose cuma navalomba hamavu, navakavalingilaco kuli Tata ali mwilu.
20Mwomwo kuze kuli vavali cipwe vatatu vanakunguluka mulijina lyami, kwakuze vene nguli muli vakivo.
Ciximo candungo ou akanyine kukonekela mukwavo
21Haze vene Petulu ejile, amwihwile ngwenyi, Ove Mwata, ndumbwami mwanguvulumuna kangahi nayami nangumukonekela? kuheta #Luka 17.4.mukatanu nakavali tahi?
22Yesu amulwezele ngwenyi, Kangwexi kukwamba ngwami, Kuheta mukatanu nakavaliko, oloze ngwami, Kuheta mumakumi atanu namakumi avali, ngoco vene katanu nakavali.
23Ngoco wangana wamelu vanaufwanyisa nge mwangana asakile ngwenyi, #25.19.alave mikuli yavo navandungo jenyi.
24Omu aputukile kulava, vamutwalilile umwe apwile namukuli #18.24:Talende kana yapwile kafwe jipondo makulukaji avali.wajitalende kanunu.
25Oloze omu #Luka 7.42.ahonene vyakukuka, kaka yenyi avalwezele ngwenyi, vamulande napwevo lyenyi navana venyi navyuma vyenyi vyosena, mangana akuke.
26Xikaho uze ndungo alimbilile hamavu nakulifukula kuli ikiye, amwambile ngwenyi, Ove mwata, acingutalilileko cikoki mwane, nangukakukukila vyosena.
27Kaha kaka yayauze ndungo amwivwilile keke, amwecele, amukonekelele uze mukuli wenyi.
28Oloze uze udungo alovokele, awanyine mukwavo muvapwilile muundungo, uze atambwile mukuli wenyi #18.28:Ndenali yimwe yapwile kafwe sikisi natiki.wajindenali likulukaji. Amukwacile nakumucikita kumiliu, amwambile ngwenyi, Ngukukile mukuli wami.
29Xikaho uze ndungo mukwavo alimbilile hamavu, amulembelelele ngwenyi, Acingutalilileko cikoki mwane, nangukakukukila.
30Ikiye akanyine, Oloze ayile nakumuhaka muzuvo yaufunge, mangana ngwenyi, atwamengamo palanga nomu mwakakuka mukuli wenyi.
31Vaze vandungo vakwavo hakumonomu alingile, vanyengetelele cikumakuma, kaha vayile nakumwambulila kaka yavo vyuma vyosena vize alingile.
32Haze vene kaka yenyi himwamusanyika eze kuli ikiye, kaha amwambile ngwenyi, Ove ndungo wamupi, mukuli wove wosena ngwakukonekelangawo mwomwo wangulembelelanga.
33Kaha catelanga nakuli ove nawa nyi? kumutetela mukwenu ndungo nganomu ngwakutetelangove.
34Kaha kaka yenyi akwacile matoto, amuhanyine kuli vaka kumuyanjisa, mangana ngwenyi vamuyanjisenga palanga nomu mwakakuka mukuli wenyi wosena.
35 #
6.14. Mukiko nawa mumwakalinga Tata wamwilu kuli enu nge enu muvosena namukana kukonekela mutu himutu ndumbwenyi mumicima yenu.
Currently Selected:
MATEU 18: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.