MATAYO 4
4
Okhuteemwa khwa Yesu
(Mrk. 1:12-13; Luka 4:1-13)
1 #
Abaheb. 2:18; 4:15 Mana Roho niyemilila Yesu okhutsia mushitsiimi khulwa okhuteemwa nende Setani. 2Ne olwa yali nahonjile inzala tsinyanga amakhumi kane, eshilo neshiteere, inzala yamuluma. 3Kho Setani niyetsa khuye namuboolela ari, “Noba noli Omwana wa Nyasaye, laka amachina kano mbu kekhole emikaate.”
4 #
Okhuk. 8:3
Nebutswa Yesu yamukalusia ari, “Kahandikwa mbu, ‘omundu shialabetsanga mwoyo khulwa okhulia omukaate kwonyene ta, habula khulwa buli likhuwa elirula mumunwa kwa Nyasaye.’ ”
5Mana Setani namuyila mwitookho litakatifu, namusinjisia khubutenje obwa Ihekalu. 6#Tsits. 91:11,12Namuboolela ari, “Noba noli Omwana wa Nyasaye, ruuma okwe hasi, shichila kahandikwa mbu:
‘Nyasaye alalachilisia abamalaikabe khwiwe,
bakhuchinje mumakhono kabwe,
kho mbu oleshe okhukwa hasi nosaalila omubilikwo.’ ”
7 #
Okhuk. 6:16
Yesu namuboolela ari, “Khandi kahandikwa mbu: ‘Shiolamuteema OMWAMI Nyasayewo tawe.’ ”
8Mana khandi Setani namuyila khushikulu eshiraambi muno, namumanyia oburuchi bwosi bwokhushialo, nende oluyali lwabwo lwosi. 9Ne namuboolela ari, “Bino biosi ndalakhuhelesia noba nokwa mumakulu kanje niunzinamila.” 10#Okhuk. 6:13Mana Yesu namuboolela ari, “Rulakhwo otsie, Setani! Kahandikwa mbu, ‘Winamilenje OMWAMI Nyasayewo, nomukhalabanila ye yenyene.’ ” 11Kho Setani namulekha, ne abamalaika nibetsa nibakhalabanila Yesu.
Yesu achaaka emililmochie Galilaya
(Mrk. 1:14-15; Luka 4:14-15)
12 #
Mat. 14:3; Mrk. 6:17; Luka 3:19,20 Olwa Yesu yahulila mbu Yohana ali mumbohe, yamala atsie Galilaya. 13#Yoh. 2:12Shiyamenya Nazareti ta, habula yatsia Kaperinaumu litaala elili ahambi nende inyanza ya Galilaya, mumbali etsia Zebuluni nende etsia Nafutali, namenya ebweneyo. 14Yakhola ako kho mbu akomulakusi Isaya yaboola koosibwe habwene mbu,
15 #
Isa. 9:1,2 “Inywe abeshialo shia Zebuluni nende eshia Nafutali,
inywe abokhunjila eyihenjile khunyanza, injelekha womwalo kwa Yorodani,
Iwe Galilaya, eshialo eshiabamahanga!
16Abandu abamenya mushiilima balalola obulafu obukhongo.
Nabo abamenya mushialo eshieshilima shielifwa, obulafu bulabaashila.”
17 #
Mat. 3:2
Ne okhurula olwene olwo, Yesu yachaka okhuyaala naboola ari, “Mwikalukhasie nimulekha obwonooni bwenywe, okhuba Obwami bwa Nyasaye busitile ahambi!”
Yesu alaanga abanaabi bane okhuba abaloondibe
(Mrk. 1:16-20; Luka 5:1-11)
18Olwa Yesu yali nachendanga khuluchinga lweinyanza ya Galilaya, yalola abanaabi babili, Simoni owalangwa mbu Petero, nende Andereya omwana wabwe nibanaabanga tsinyeni nolukhanda munyanza. 19Yesu nababoolela ari, “Mwitse munoondekhwo, nasi ndalamukhola okhuba abanaabi babandu.” 20Habwene nahabwene, nibalekha tsikhanda tsiabwe nibamuloondakhwo. 21Olwa Yesu yatsiakhwo hambeli hatiiti yalola khandi abasiani babili, Yakobo nende Yohana, abaana ba Zebedayo. Boosi bali muliaro liabwe halala nende Zebedayo sabwe, nibarechekhanga tsikhanda tsiabwe. Yesu nabalanga mbu bamulondekhwo, 22ne mubwangu obwo nibarula muliaro nibalekhamwo sabwe, nibalonda khu Yesu.
Yesu yechesia, ayaala nende okhuhonia abandu
(Luka 6:17-19)
23 #
Mat. 9:35; Mrk. 1:39 Yesu yatsia buli habundu mu Galilaya, niyechesinjia mutsisinagogi, nayaalanga Amakhuwa Amalayi aka Obwami bwa Nyasaye, nende okhuhonia abandu abobuteshele nende obulwale bwetsimbia tsiosi. 24Ifumaye yatswana mushialo shia Siria shiosi. Abandu nibamureerera abalwale abali nobutsuunwi nende obuteshele bwahukhane; abebishieno abeindulume, nende abafwokoya, naye nabahonia. 25Emikanda emikhongo chiamuloondakhwo okhurula Galilaya, Dekapoli, Yerusalemu, Ebuyahudi nende mutsingongo etsili injelekha womwalo kwa Yorodani.
Currently Selected:
MATAYO 4: OLUDC
Highlight
Share
Copy
Want to have your highlights saved across all your devices? Sign up or sign in