MARIKO 15
15
Yesu areerwa imbeli wa Pilato
(Mat. 27:1-2,11-14; Luka 23:1-5; Yoh. 18:28-38)
1Ne olwa eshialo bwashia, abesaaliisi abakhulundu, abakofu, abahandichi bamalako nende abeshiina boosi, bafuchilisania, mana nibaboha Yesu, nibamurusia nibamuhaana mumakhono ka Pilato. 2Naye Pilato nareeba Yesu ari, “Niwe omuruchi owa Abayahudi?” Naye Yesu namukalusia ari, “Niwe ouboolile orio.” 3Mana abesaaliisi abakhulundu nibamwinjilila namakhuwa amanji. 4Pilato namureeba khandi ari, “Shiolikhwo nelikhuwa liokalusia ta? Lolakhwo amakhuwa akachilanga nibakhusitaaka shinga olwa kali amanji!” 5Nebutswa Yesu shiyakalusiakhwo likhuwa liosi liosi khandi ta, mana Pilato nahuka.
Yesu akhalachilwa okhwirwa
(Mat. 27:15-26; Luka 23:13-25; Yoh. 18:39–19:16)
6Buli khunyanga yelisabo lia Pasaka, Pilato yabalekhuulilanga omubohe mulala, owa benyanga mbu alekhuulwe. 7Ne mu abakhayi bamalako abali mumbohe, abali nibeera abandu mukhukhola induli, yalimwo oundi owalangwa mbu Baraba. 8Mana abandu abanji nibetsa nibachaaka okhureeba Pilato mbu, abakholele shinga olwa yabakholelanga buli lwosi. 9Naye nabakalusia nabareeba ari, “Mwenya mbu emulekhuulile omuruchi owa Abayahudi?” 10Yabareeba ario okhuba yali namanyile mbu, abesaaliisi abakhulundu bahaana Yesu khuye shichila imbalikha. 11Nebutswa abesaaliisi abakhulundu basema abandu nibabatsuuba mbu, bareebe Pilato abalekhuulile Baraba. 12Mana Pilato khandi nabareeba ari, “Kho mwenya ekholele shiina omundu wa mulanganga mbu, Omuruchi owa Abayahudi uno?” 13Mana abandu boosi nibayiiba nibakalusia bari, “Mubambe!” 14Pilato naye nabareeba ari, “Shichila shiina? Nikhuwa shiina libi liakholile?” Nebutswa nabo bameeta butswa okhuyiiba obutinyu nibaboola bari, “Mubambe!”
15Ne, shichila Pilato yenya okhuchamisia abomukanda okwo, yabalekhuulila Baraba. Mana Pilato nasubula abandu abo mbu, banyweshe Yesu khandi namuhaana mbu bamubambe khumusalaba. .
Abelihe Abaroma batseshelela Yesu
(Mat. 27:27-31; Yoh. 19:2-3)
16Mana abelihe nibarusia Yesu nibamuyila mulwanyi lwomukari lweitookho, (olulangwa mbu, Puritoriamu). Kho nibalanga omukanda kwa belihe nibakhung'ana halala boosi. 17Nibamufwala ikanzu yobukondo bweisambarau. Ne nibalukha olusimbi lwamahwa, nibara khumurwe kwa Yesu. 18Nibachaaka okhumwinamila nende okhumushiesia nibaboola bari, “Oyindile, iwe Omuruchi wa Abayahudi!” 19Kho nibamunywekha khumurwe nende indabushi yelikata nende okhumunyilikhakhwo amare. Mana nibamusikamila nende okhumwinamila. 20Ne olwa bali nibamalile okhumutseshelela, bamufwalula ikanzu yobukondo bweisambarau eyo, ne nibamufwala ebifwalo bibie biene. Mana nibamurusia nibamuyila okhumubamba khumusalaba.
Yesu abambwa khumusalaba
(Mat. 27:32-44; Luka 23:26-43; Yoh. 19:17-27)
21 #
Abaro. 16:13
Ne khunjila, abelihe abo babukaana nende omundu undi owali nabirangaho, owali nachelelanga mwitookho narula mungongo tsindi, oulangwa mbu, Simoni Omukirene, samwana Alekisanda nende Rufu. Kho nibanichilisia omundu oyo mbu, achinje omusalaba kwa Yesu. 22Mana nibayila Yesu habundu ahalangwa mbu, Goligotsa, (Eshisina mbu, Habundu aha eshihanganga). 23Nibateema okhumuhelesia idivai eyatsokaasibwamwo manemane#15:23 manemane: Omusaala okwa Abayahudi batsokaasinjia mudivai mbu ibe indulu. niyiranyile mbu, anywe. Nebutswa Yesu shiyachinywa tawe. 24#Tsits. 22:18Kho nibamubamba khumusalaba, ne nibakabana ebifwalobie munjila yokhubikhupila ikha, khulwa okhumanya ingubo ya buli mundu akhoyile okhubukula. 25Tsiali tsisaa tsitaru tsiomusenya, olwa bamubamba khumusalaba. 26Nalio lihandiko eliamanyia obumayanu bwachila Yesu nabambwa liali liri, “Omuruchi Owa Abayahudi.” 27#Isa. 53:12Yesu yabambwa halala nende abanuuli babili. Mulala khumukhonokwe musaatsa ne oundi khumukhonokwe mukhasi. [ 28Kho akaboolwa mu Amahandiko nikoosibwa, akaboola mbu, yabasilibwa halala nende abakhayi.] 29#Tsits. 22:7; 109:25; Mrk. 14:58; Yoh. 2:19Nabo abali ababirangaho boosi bamunyekanga nibamuresilia emirwe chiabwe nibaboola bari, “Wale! Iwe owabele niwenyanga okhulikulula Ihekalu mama ochiumbashe khulwa tsinyanga tsitaru, 30wihoniekhwo omwene, mana wishe orule khumusalaba!” 31Khandi abesaaliisi abakhulundu nende abahandichi bamalako bosi nibatseshelela Yesu, nimuboolela bari, “Yahoniyenje abandu bandi, ne shianyala okhwihonia omwene ta! 32Leshe khulolekhwo Kristo, Omuruchi owa Isiraeli, niyekha bulano okhurula khumusalaba kho mbu, khusuubile.” Khandi aba yabambwa ninabo bosi bamunyeka.
Okhufwa khwa Yesu
(Mat. 27:45-56; Luka 23:44-49; Yoh. 19:28-30)
33Ne olwa isaa yakhasasaba yeshiteere yola, eshialo shiosi shielima, okhuula khusaa ya shienda yokhungoloobe. 34#Tsits. 22:1Mana khusaa ya shienda eyo, Yesu nalila nomwoyo omukhongo naboola ari, “Eloi, Eloi, Lema Sabakitsani?” Eshisina mbu, “Nyasaye wanje, Nyasaye wanje, undeshile mbushiina?” 35Ne olwa abandi, abali nibasinjiileho bahulilakhwo amakhuwa ako, baboola bari, “Lole, alanganga Eliya.” 36#Tsits. 69:21Mana oundi niyelukha tsimbilo, niyetsusia idivai eyiranyile mushiangwe, nara khwikata lielitundu, namukhofia khumunwa mbu, anywe, ne naboola ari, “Lekha khulolekhwo Eliya naba niyetsa okhumurusia khumusalaba.” 37Mana Yesu nalila nomwoyo omukhongo ne nakwisia omwoyo. 38#Okhur. 26:31-33Nayo ingubo yishinga yomuhekalu niyirandukhamwo ebitonye bibili, okhurula ikulu okhuula hasi. 39Mana lwomwimilisi wabelihe, owali nasinjiile imbeliwe namuhenganga yalola shinga olwa Yesu yalila nakwisia omwoyo, yaboola ari, “Toto mwene, omundu uno abeele Omwana wa Nyasaye!” 40#Luka 8:2,3Ne baliho abakhasi bandi, abali nibasinjiile ehale nibahenganga. Ne mubelihe abo, Mariamu Magadalene, Mariamu nyinamwana Yakobo owali omushe nende, Yose nende Salome bosi balimwo. 41Ne olwa Yesu yali mu Galilaya, abo boosi bali nibamulondilenjekhwo, nibamukhalabanila. Khandi baliho abakhasi bandi abanji, abali nibetsile ninaye okhuula Yerusalemu.
Okhuyabilwa khwa Yesu
(Mat. 27:57-61; Luka 23:50-56; Yoh. 19:38-42)
42Ne eshialo bwali nibwakhela. Ne inyanga eyo yali eyokhwirechekha, (Eshisina mbu, inyanga eyiranjilila Isabato). 43Yosefu owa Arimatsaya, omukofu woluyali khandi mulala khubakofu bomushiina, owali yesi nalindililanga Obwami bwa Nyasaye, yoma ikholo ne natsia khu Pilato, namusaba mbu aheebwe omubili kwa Yesu. 44Pilato yakanakania mumwoyokwe okhuhulila mbu toto Yesu amalile okhufwa. Kho nalanga omwimilisi wabelihe, namureeba okhumanya nikaba mbu toto Yesu amalile okhufwa. 45Ne olwa yaboolelwa nende omwimilisi wabelihe oyo mbu, Yesu amalile okhufwa, yafuchilila okhuhelesia Yosefu omubili kwa Yesu. 46Mana Yosefu nakula isanda yeikitani, narusia omubili kwa Yesu khumusalaba nakura hasi, ne nakukanyila musanda yeikitani eyo. Niyalisia omubili kwa Yesu mung'ani, eyali niyayabwa mulwanda, ne naserenjesia lichina likhongo nalifuunikha khung'ani eyo. 47Nabo Mariamu Magadalene nende Mariamu nyinamwana Yosefu nibalola aha Yesu yali niyalisiibwe.
Currently Selected:
MARIKO 15: OLUPR
Highlight
Share
Copy
Want to have your highlights saved across all your devices? Sign up or sign in