MATAYO 7
7
Akokhukhalachila abashienywe eshiina
(Luka 6:37-38,41-42)
1“Shimulakhalachile abashienywe eshiina ta, nenywe mwesi khandi shimukhalachilwa eshiina tawe. 2#Mrk. 4:24Okhuba Nyasaye alamukhalachila inywe eshiina munjila ndala, eyamukhalachilamwo abashienywe, khandi alekhoonyela amalako malala tsana akamwikhoonyela khubashienywe. 3Nishiina eshichila nolola akhakokha akhali mumoni yowashio, ne nolanyala okhulola eshirundu eshili mumoniyo ta? 4Kata wakhaboolela orie owashio mbu, ‘Lekha ekhuyinie akhakokha akhali mumoniyo,’ olwa nawe oli neshirundu mumoniyo? 5Iwe omwikaati! Ranjilila oyinie eshirundu eshili mumoniyo, kho mana olole obulayi lwoyinia akhakokha akhali mumoni yowashio.
6“Shimulahelesiakhwo tsimbwa ebindu ebitakatifu ta.Khandi shimulafuubilakhwo tsimbiitsi tsilulu tsienywe ta, tsiakhetsukhana tsiatsisenachilila butswa nebilenje biatsio, ne nitsikalukha okhumuseera inywe.
Sabe, Khaabe, Khong'onde omuliango
(Luka 11:9-13)
7“Sabe Nyasaye, naye alamuhelesia, khaabe, ne mulanyoola; khong'onde, naye Nyasaye alamwikulilaho. 8Okhuba buli omundu ousaba, alaheebwa, ne oukhaba, alanyoola; naye oukhong'onda omuliango, alekulilwa. 9Kata niwiina khwinywe womwanawe amusaba omukaate, naye namuhelesia lichina? 10Noho namusaba inyeeni, naye namuhelesia inzokha? 11Kho inywe kata nimuli abamayanu murio, mumanyile okhuhelesia abaana benywe ebindu ebilayi; kho toto mwene Senywe ouli mwikulu alahelesia abo abamusaba ebindu ebilayi muno!
12 #
Tob. 4:15; Luka 6:31 “Kho mukholelenje abashienywe amalayi aka mwesi mwakhekomba mbu boosi bamukholele inywe. Shino nishio eshisina shiamalako ka Musa nende amechesio kabalakusi.
Omuliango Omunyelele
(Luka 13:24)
13 #
Sira 15:17
“Mwinjilile mumuliango omunyelele. Shichila omuliango okwinjila mumulilo nomubambalifu khandi omuhanda kwokhutsiamwo nomubambalifu, ne abaloondakhwo nabanji. 14Nebutswa omuliango okwinjila mubulamu bwobumeli neshinyelele, khandi omuhanda kwokhutsiayo nomunyelele; ne abaloondakhwo nibatiiti.
Omusaala nende ebiamo biakwo
(Luka 6:43-44)
15“Mwilinde okhurula khubalakusi bobubeeyi abamwitsila, elwanyi bali shinga amakondi, nebutswa mukari bali shinga ebisutse ebihalaba. 16#Sira 27:6Mulabamanya khulwa ebikhole biabwe. Abandu bakhanokakhwo tsinzabibu okhurula khubisisia? Kata amakhuyu okhurula khumarakalu? 17Khulweshio, omusaala omulayi kwamanga ebiamo ebilayi; nebutswa omusaala omubi, kwamanga ebiamo ebibi. 18Omusaala omulayi shikunyala okhwama ebiamo ebibi ta, nakwo omusaala omubi shikunyala okhwama ebiamo ebilayi tawe. 19#Mat. 3:10; Luka 3:9Buli omusaala okulaama ebiamo ebilayi ta, kularemwa, nikusukunwa mumulilo. 20#Mat. 12:33Khulweshio mulamanya abalakusi bobubeeyi khulwebikhole biabwe.
Inyanga yokhukhalachilwa eshiina
(Luka 13:25-27)
21“Shikali mbu, buli mundu ounanga naboola ari, ‘Omwami, Omwami’ niye oulinjila mubwami obwa Nyasaye tawe; habula oyo oukholanga akokhwenya khwa Papa ouli Mwikulu. 22Khundukho yokhukhalachilwa eshiina abanji bakhareebe bari, ‘Omwami, Omwami, shikhwayaala muliiralio, kata shikhwarusia ebishieno muliiralio, khandi shikhwakhola akamakana amanji muliiralio?’ 23#Tsits. 6:8Nilwo olwa nasi siesi ndilibaboolela habulafu endi, ‘Shindamumanyakhwo ta, muurulekhwo inywe abandu abamayanu!’
Inzu eyombakhwa khulwanda nende eyombakhwa khumuyeshe
(Luka 6:47-49)
24“Kho buli mundu ouhulila amakhuwa kanje nende okhukakhola, ali shinga omundu omuchesi owombakha inzuye khulwanda. 25Ifula yinyinji yakwa, emikhula nichibira, imbumbuyeka niyihutsa, nibiikhupa khunzu eyo; nebutswa inzu tsana shiyakwa hasi ta, okhuba omuse kwayo kwasimikhwa khulwanda. 26Ne buli mundu ouhulila amakhuwa kanje kano, ne nalakakhola ta, ali shinga omuyingwa, owombakha inzuye khumuyeshe, 27ne olwa ifula yinyinji yakwa, emikhula nichibira, imbumbuyeka niyihutsa, nibikhupa inzu eyo, nayo niyikwa hasi. Ne okhukwa khwayo nikhuba okhukhongo khwokhuhuchisia.”
28 #
Mrk. 1:22; Luka 4:32 Mana olwa Yesu yamala okhuboola amakhuwa ako, abemikanda bahuchisibwa muno nende amechesioke, 29okhuba shiyabeechesia shinga abeechesia bandi bamalako bechesinjia ta, habula yabeechesia nobunyali.
Currently Selected:
MATAYO 7: OLUPR
Highlight
Share
Copy
Want to have your highlights saved across all your devices? Sign up or sign in