MATAYO 22
22
Oluchelo lwelisabo lieshiselelo
(Luka 14:15-24)
1Yesu khandi yekhoonyela tsinjelo okhuboola nabandu, naboola ari, 2“Obwami bwa Nyasaye buli burinanwa; Yaliho omuruchi undi owakasilia omusianiwe lisabo lieshiselelo. 3Naruma abakholibe okhuboolela abali nibalaanjilwe mbu betse mwisabo, nebutswa baloba okhwitsa. 4Kho naruma abakholi bandi nende oburume buno khu abali nibalaanjilwe abo naboola ari, ‘Emalile okhurechekha lisabo lianje, tsiheyi nende ebimoosi bianera bisinzilwe, ebindu biosi birechekhwe. Mwitse mwisabo lieshiselelo!’ 5Nebutswa abacheni abali nibalanjilwe abo nibalateeba omulango okwo ta. Mana nibatsiililila nemilimo chiabwe. Mulala natsia mumukundakwe, oundi khubukhalabwe; 6ne abandi nabo nibakwa khubakholi abo nibabakhupa nibabeera. 7Omuruchi nasinyikha, naruma abelihebe okhumulula abeeri abo nende okhusamba litookho liabwe. 8Mana naboolela abakholibe ari, ‘Lisabo lieshiselelo lirechekhwe, nebutswa abacheni abalangwa shibaliteebile eshindu ta. 9Kho mutsie khumihanda, mulaanje boosi abamunyolakhwo, betse mwisabo lieshiselelo.’ 10Kho abakholi abo nibarula nibatsia khumihanda nibakhung'asia boosi ababanyalilwa okhunyoola, abalayi nende ababi. Inzu yelisabo niyitsulamwo abacheni.
11“Omuruchi natsia okhulola abacheni abo, nalola omundu undi nafwalile tsingubo etsilali tsieshiselelo ta. 12Omuruchi namureeba ari, ‘Owashianje, winjiile muno orie nolafwalile tsingubo tsieshiselelo ta?’ Naye omundu oyo nalaboolakhwo eshindu ta. 13#Mat. 8:12; 25:30; Luka 13:28Mana omuruchi naboolela abakholibe ari, ‘Mubohe omundu uno amakhono nende ebilenje, mumusukune elwanyi mushiilima. Ebweneyo alalila nende okhulumasia ameenoke.’ ” 14Mana Yesu namalilisia naboola ari, “Abanji balaangwa, nebutswa nibatiiti abalobolwa.”
Lireebo khukokhurunga obushuru khumuruchi wa Roma
(Mrk. 12:13-17; Luka 20:20-26)
15Abafarisayo barula nibatsia okhwirechekha shinga olwa bakhareka Yesu namarebo. 16Nibamurumila abeechi babwe nende abandi khubomukanda kwa Herode. Nibaboola bari, “Omwechesia, khumanyile shinga lwoboolanga akatoto. Wechesinjia akobwatoto khukokhwenya khwa Nyasaye, nolateeba akabandu bapaara ta. Okhuba iwe shioteebanga obukhongo bwomundu tawe. 17Khuboolelekhwo, olola orie? Kali habwene okhurunga obushuru khumuruchi wa Roma?”
18Nebutswa Yesu namanya emireko chiabwe emibi, kho nababoolela ari, “Inywe abekaati! Muteemanga okhuureka mbushiina? 19Manyiekhwo amapesa akamwikhoonyelanga okhurunga obushuru!”
Nibamureerera Idinari ndala. 20Nabareeba ari, “Eshifwanani shia omurwe nende eliira ebili khudinari yino, nebiawina?” 21Nibamukalusia bari, “Nebia omuruchi wa Roma.” Kho Yesu nababoolela mbu, “Kho murunje khumuruchi wa Roma ebili ebia omuruchi wa Roma, ne khu Nyasaye ebili ebia Nyasaye.” 22Olwa bahulila amakhuwa ako, bahuka, nibamulekha nibatsia.
Yesu yechesia khukobulamushi bwabafu
(Mrk. 12:18-27; Luka 20:27-40)
23 #
Ebikh. 23:8
Inyanga yene eyo, Abasadukayo bandi ababoolanga mbu, abandu shibalilamusibwa okhurula mubafu tawe, betsa khu Yesu. 24#Okhuk. 25:5Nibamureeba bari; “Omwechesia, Musa yaboola mbu, ‘Omundu nafwa nabula nabaana, omusiani wabwe akhoyile okhukalusia omukhasi omulekhwa oyo, yebulile omusiani wabwe abaana.’ 25Kho baliho abasiani musafu abomunzu ndala abamenyanga hano ninefwe. Owambeli nateshia, ne nafwa nalali nabaana ta. Omusiani wabwe nakalusia omukhasi omulekhwa oyo. 26Kho malala ako nikekholekha khuwakhabili, khuwakhataru okhuula khu womusafu. 27Olunyuma, omukhasi oyo namala yesi nafwa. 28Bulano khunyanga eyabafu balilamusibwa okhurula mubafu, omukhasi oyo yakhabe owa wina? Okhuba yali niyateshela boosi?”
29Yesu nabakalusia ari, “Mukorirwe, shichila shimumanyile aka Amahandiko noho obunyali bwa Nyasaye tawe. 30#Obuch. 5:5Okhuba olwa abafu bakhalamusibwe, bakhabe shinga abamalaika bomwikulu, ne shibakhateshianie tawe. 31Ne okhulondana nende akokhulamusibwa khwabafu; mushili okhusomakhwo aka Nyasaye yamuboolela? Yaboola ari, 32#Okhur. 3:6‘Nisie Nyasaye wa Aburahamu, Nyasaye wa Isaka khandi Nyasaye wa Yakobo.’ Ne shiali Nyasaye wabafu ta, habula owa abali mwoyo.”
33Ne olwa abemikanda bahulilakhwo amakhuwa ako, bahuchisibwa muno nende ameechesioke ako.
Lilako likhulundu mukoosi
(Mrk. 12:28-34; Luka 10:25-28)
34Olwa Abafarisayo bahulila mbu Yesu aholelesiye Abasadukayo, bakhung'ana halala, 35ne mulala khubo, owali omwechesia wamalako, namureeba khulwa okhumuteema ari, 36“Omwechesia nelilako shiina likhongo muno mumalako koosi.”
37 #
Okhuk. 6:5
Yesu nakalusia naboola ari, “ ‘Oheele OWAMI Nyasayewo nomwoyokwo kwosi, namapaaroko koosi nende amakaniko koosi.’ 38Lino nilio lilako likhongo muno khandi likhulundu mukosi. 39#Abal. 19:18Eliakhabili elili shinga elo ndielino mbu, ‘Oheele owashio shinga olwa wiheela omwene.’ 40#Luka 10:25-28Amalako ka Musa koosi nende amechesio kabalakusi keleetanga khumalako kabili kano.”
Lireebo khu Kristo
(Mrk. 12:35-37; Luka 20:41-44)
41Olwa Abafarisayo bakhung'ana halala Yesu yabareeba ari; 42“Mupaara murie khumakhuwa ka Kristo? Nowomulwibulo lwa wina?” Nibamukalusia nibaboola bari, “Nowomulwibulo lwa Daudi.” 43Nabareeba ari, “Kho nishiina eshiachila Roho niyemilila Daudi okhumulanga mbu, ‘Omwami’? Okhuba Daudi yaboola mbu,
44 #
Tsits. 110:1
‘Nyasaye yaboola khu Omwami wanje ari,
Yikhala hano khumukhono kwanje musaatsa
okhuula olwa era abasukubo hasi webilenjebio.’
45Kho Daudi naba niyamulanga mbu, ‘Omwami,’ Kristo yakhaba arie owolwibulo lwa Daudi tsana?”
46Abulaho owanyalilwa okhuhelesia Yesu likalusio ta, ne okhurula inyanga eyo abulaho omundu owatsaalikha okhumureeba amareebo kandi tawe.
Currently Selected:
MATAYO 22: OLUPR
Highlight
Share
Copy
Want to have your highlights saved across all your devices? Sign up or sign in